ހާލުގައި ޖެހުނު އުމްރާވެރިން ހޮނިހިރު ދުވަހު ރާއްޖެ ގެންނަނީ

އަލް-ހިޖްރަ ޓްރެވެލްސް އެންޑް ޓުއާސް އިން އުމްރާއަށް ގެންގޮސް އަނބުރާ ރާއްޖެ ނާދެވި ހާލުގައި ޖެހުނު މީހުން އަންނަ ހޮނިހިރު ދުވަހު ގެންނާނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިރޭ ވިދާޅުވެއްޖެ އެވެ.

އުމްރާއަށް މީހުން ގެންދިއުމުގެ ހުއްދަ ދީފައިވާ އެ ކުންފުނިން އުމްރާއަށް ދިޔަ 23 މީހަކަށް އަނބުރާ ރާއްޖެ ނާދެވިގެން އުޅޭ މައްސަލައެއް ފެންމަތިވީ އިއްޔެ ރެ އެވެ. އެކަން އިސްލާމިކް މިނިސްޓްރީގެ ސަމާލުކަމަށް އައުމާ އެކު ވަނީ އެމީހުން އަނބުރާ ރާއްޖެ ގެނެވެންދެން އުމްރާވެރިންގެ ކަންކަން ބެލެހެއްޓުމަށް ހައްޖު ކޯޕަރޭޝަންއާ ހަވާލުކޮށްފަ އެވެ.

މިނިސްޓަރު ވިދާޅުވީ ހާލުގައި ޖެހުނު އުމްރާވެރިން ހައްޖު ކޯޕަރޭޝަންގެ އުމްރާވެރިން ތިބި ހޮޓަލަށް މިހާރު ބަދަލުކޮށްފައިވާ ކަމަށެވެ. އަދި ގަތަރު އެއާވޭސްގައި އެ މީހުން އަންނަ ހޮނިހިރު ދުވަހުގެ ހެނދުނު 8:10 ގައި ރާއްޖެ ގެނެވޭނެ ކަމަށް މިނިސްޓަރު ވިދާޅުވި އެވެ.

ސްކޫލު ބަންދާ ދިމާކޮށް އެ މީހުން އުމްރާއަށް ދިޔައީ އެ ކުންފުންޏަށް 28،500ރ. ދައްކައިގެން ދެކޮޅު ޓިކެޓާއި ވިސާގެ ހުރިހާ ކަމެއް ވެސް ކުންފުނިން ހަމަޖައްސާ ގޮތަށެވެ. އެކަމަކު އުމްރާވެ ނިމިގެން މިދިޔަ އާދިއްތަ ދުވަހު ރާއްޖެ އަންނަ ގޮތަށް ކުރިން އޮތަސް ޓިކެޓުގެ އިންތިޒާމުތައް ހަމަނުޖައްސާ ހުރުމުން ނާދެވުނީ އެވެ.

އެ މައްސަލަ ސޯޝަލް މީޑިއާގައި ފެންމަތިވުމުން އިއްޔެ ކުންފުނިން ބުނެފައި ވަނީ ދިމާވި މާލީ ދަތިތަކުގެ ސަބަބުން އެމީހުން އަނބުރާ ނުގެނެވުނީ ކަމަށެވެ.

އެކަމަކު އެ ކުންފުންޏާ ދެކޮޅަށް މިހާރު އިސްލާމިކް މިނިސްޓްރީން ވަނީ ފިޔަވަޅު އަޅައިފަ އެވެ. އެއް ލައްކަ ރުފިޔާ އިން ޖޫރިމަނާކުރުމާ އެކު އެ ގްރޫޕަށް ދޫކޮށްފައިވާ ހުއްދަ ވެސް ވަނީ ހިފަހައްޓައިފަ އެވެ. އަދި އެ ކުންފުންޏާއި ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާ އަށް މީހުން ގެންދިއުމުގެ ހުއްދަ ނުދިނުމާއި އުސޫލާ ހިލާފުވި މައްސަލަ ފުލުހަށް ހުށަހެޅުމަށް ވެސް ވަނީ ނިންމައިފަ އެވެ.

މިނިސްޓްރީން ބުނި ގޮތުގައި ހާލުގައި ޖެހުނު މީހުން ރާއްޖެ ގެނައުމަށް މިނިސްޓްރީން ކުރި ހަރަދު އެ ކުންފުނިން ހޯދާނެ އެވެ.

އެ ކުންފުންޏަކީ ޅ. ނައިފަރުގެ ދެ މީހުން ކަމަށްވާ ފިރާގު މުހައްމަދަފުޅާއި މުސްތަފާ މުހައްމަދުފުޅުގެ ކުންފުންޏެކެވެ. އެ ގްރޫޕްގެ ހަވާލުގައި އުމްރާއަށް ދިޔަ މީހުންގެ ތެރޭގައި ވެސް ގިނައީ ނައިފަރު މީހުންނެވެ.