ހިޖްރަ ގްރޫޕު އެއް ލައްކަ ރުފިޔާއިން ޖޫރިމަނާކޮށް އިތުރު ފިޔަވަޅުތައް އަޅައިފި

އަލް-ހިޖްރަ ޓްރެވެލްސް އެންޑް ޓުއާސް އިން މިދިޔަ ޑިސެމްބަރު މަހު އުމްރާއަށް ގެންދިޔަ މީހުން ހާލުގައި ޖެއްސި މައްސަލާގައި އެއް ލައްކަ ރުފިޔާ އިން ޖޫރިމަނާކޮށް، އެ ކުންފުންޏާ ދެކޮޅަށް ބޮޑެތި ފިޔަވަޅުތަކެއް އަޅަން އިސްލާމިކް މިނިސްޓްރީން މިއަދު ނިންމައިފި އެވެ.

އުމްރާގެ އަޅުކަމަށް މީހުން ގެންދިއުމުގެ ހުއްދަ ވެސް އޮންނަ އެ ކުންފުނީގެ ހަވާލުގައި ދިޔަ މީހާއާ އެކު ޖުމްލަ 24 އުމްރާވެރިން ހިމެނެ އެވެ. އޭގެ ތެރޭގައި އުމުރުން 18 އަހަރުން ދަށުގެ ފަސް ކުދިން ވެސް ތިއްބެވެ.

އެ މީހުންނަށް ނާދެވި އަދިވެސް ސައުދީގައި ތާށިވެފައިވާއިރު، އެންމެ ފަހުން އެ މީހުންނާ ހަވާލުވާން ޖެހުނީ ރާއްޖެ އިން ހައްޖާއި އުމްރާ އަށް މީހުން ގެންދަން ސަރުކާރުން އުފައްދާފައިވާ ކުންފުނި ހައްޖު ކޯޕަރޭޝަނަށެވެ.

އެ މައްސަލާގައި އިސްލާމިކް މިނިސްޓްރީން މީގެ ކުޑައިރުކޮޅެއް ކުރިން ބުނީ، ޑިސެމްބަރު އުމްރާ އަށް ގެންދިޔަ އުމްރާވެރިން ފައިސާ ދެއްކިޔަސް އެ ފައިސާ އިން އުމްރާވެރިންގެ ދެކޮޅު ޓިކެޓު ހަމަނުޖައްސައި، އެހެން ކަމަކަށް ބޭނުންކޮށްފައިވާ ކަމަށް ހިޖްރަ ގްރޫޕުން އިއުތިރާފުވެފައިވާ ކަމަށެވެ.

މައްކާ އިން ރާއްޖެ އަށް އައުމަށް ޓިކެޓު ނަގާފައި ނެތުމުން އެ އުމްރާވެރިން ވަނީ އިސްލާމިކް މިނިސްޓްރީގެ އެހީތެރިކަމަށް އެދިފައި ކަމަށް ވެސް ބުންޏެވެ. އެހެންވެ، ހާލުގައި ޖެހިފައި ތިބި 23 އުމްރާވެރިން ވަނީ މިނިސްޓްރީގެ އިރުޝާދުގެ ދަށުން ހައްޖު ކޯޕަރޭޝަނުގެ ބެލުމުގެ ދަށަށް ގެންގޮސްފައި ކަމަށް މިނިސްޓްރީން ބުނެ އެވެ.

އިސްލާމިކް މިނިސްޓްރީން ބުނި ގޮތުގައި ރާއްޖެ އިން އުމްރާ އަށް މީހުން ގެންދިއުމާ ބެހޭ އުސޫލާ ހިލާފުވުމުގެ ސަބަބުން ހިޖްރަ ގުރޫޕާ ދެކޮޅަށް ވަނީ ފަސް ފިޔަވަޅެއް އަޅައިފަ އެވެ.

އެއީ:

- ރާއްޖެ އިން އުމްރާ އަށް މީހުން ގެންދިއުމަށް އިސްލާމިކް މިނިސްޓްރީން، އަލްހިޖްރަ ޓްރެވަލް އެންޑް ޓްއާސް އަށް ދޫކޮށްފައިވާ ހުއްދަ ހިފެހެއްޓުން.

- އެއްލައްކަ ރުފިޔާ އިން ޖޫރިމަނާކުރުން.

- ހިޖުރަ ކުންފުނި އަދި އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާ އަށް މީހުން ގެންދިއުމުގެ ހުއްދަނުދިނުން.

- ހިޖުރަ ކުންފުނީގެ ފަރާތުން އުމްރާއަށް ގެންގޮސް ހާލުގައި ޖެހުނު މީހުން ރާއްޖެ ގެނައުމަށް މިނިސްޓްރީން ކުރި ހަރަދު އެ ކުންފުނިން ހޯދުން.

- ހިޖުރަ ކުންފުނީގެ ފަރާތުން އުސޫލާ ހިލާފުވެފައިވާތީ އެ މައްސަލަ ތަހުގީގުކޮށް ގާނޫނީ ފިޔަވަޅު އެޅުމަށް ފުލުހުންނަށް ހުށަހެޅުން.

މިނިސްޓްރީން ބުނީ އެ ފިޔަވަޅުތައް ތަންފީޒުކުރުމަށް ކުރަންޖެހޭ އިދާރީ ކަންކަމާއި ގާނޫނީ މަސައްކަތްތައް ފަސް ޖެހުމެއް ނެތި ކުރާނެ ކަމަށެވެ.

ސްކޫލު ބަންދާ ދިމާކޮށް 28،500ރ. ދައްކައިގެން އުމްރާއަށް ގެންދިޔައީ ދެކޮޅު ޓިކެޓާއި ވިސާގެ ހުރިހާ އިންތިޒާމުތަކެއް ވެސް ހިޖްރަ ކުންފުނިން ހަމަޖައްސާ ގޮތަށެވެ. އެ މީހުން ދިޔައީ އުމްރާގެ އަޅުކަން ނިންމައި މިދިޔަ އާދިއްތަ ދުވަހު އަންނަ ގޮތަށެވެ. އެކަމަކު ރާއްޖެ އަނބުރާ ނާދެވުނު މައްސަލަ ސޯޝަލް މީޑިއާގައި ފެންމަތިކުރުމުން އެ ކުންފުނިން ބުނެފައި ވަނީ އެހެން ދިމާވީ ކުންފުންޏަށް ދިމާވި މާލީ ދަތިތަކެއްގެ ސަބަބުން ކަމަށެވެ.

އެ ކުންފުނީގެ ޑިރެކްޓަރުންގެ ބޯޑުގައި ދެ މީހަކު ތިބެ އެވެ. އެއީ ޅ. ނައިފަރުގެ ދެމީހުން ކަމަށްވާ ފިރާގު މުހައްމަދަފުޅާއި މުސްތަފާ މުހައްމަދުފުޅެވެ. އެ ގްރޫޕްގެ ހަވާލުގައި އުމްރާއަށް ދިޔަ މީހުންގެ ތެރޭގައި ވެސް ނައިފަރު މީހުން ވަރަށް ގިނަ އެވެ.

މިދިޔަ އަހަރުގެ ރޯދަ މަހު އުމްރާއަށް މީހުން ގެންގޮސް ހާލުގައި ޖެއްސި މައްސަލައެއް ފެންމަތިވެފަ އެވެ. އެ ފަހަރު ވެސް އަލް-މަޝްއަރު ޓުއާސްގެ ހަވާލުގައި އުމްރާއަށް ދިޔަ މީހުން ގެންނަން ޖެހުނީ ސަރުކާރުންނެވެ. އެ މައްސަލައާ ގުޅިގެން ފުލުހުން މައްސަލަ ބެލުމަށް ފަހު ވަނީ އެ ކުންފުނީގެ ވެރިންނަށް ދައުވާ ކުރަން ފޮނުވައިފަ އެވެ.