ދިވެހި އުމްރާވެރިންނަށް ކޮވިޑް ވެކްސިންގެ މައްސަލަ ކުރިމައްޗެއް ނުވާނެ: މިނިސްޓަރު

އުމްރާގެ އަޅުކަމަށް ސައޫދީ އަރަބިއްޔާ އަށް އެތެރެވެވޭނީ ވަކި ވައްތަރެއްގެ ކޮވިޑް ވެކްސިން ޖަހާފައި ތިބޭ މީހުންނަށް ކަމަށް ކަނޑައަޅާފައިވާއިރު، އެ ގައުމުގެ ވެކްސިން ލިސްޓުގައި ރާއްޖޭގައި ދޭ ވެކްސިން ނުހިމެނުނަސް ދިވެހިންނަށް ދައްޗެއް ކުރިމަތި ނުވާނެ ކަމަށް އިސްލާމިކް އެފެއާޒް މިނިސްޓަރު ޑރ. އަހުމަދު ޒާހިރު މިއަދު ވިދާޅުވެއްޖެ އެވެ.

އުމްރާގެ އަޅުކަމަށް ބޭރު ގައުމުތަކުން ދާ މީހުންނަށް ސައޫދީ އަށް އެތެރެވެވޭނީ އެ ގައުމުގެ އުމްރާ މިނިސްޓްރީން ކަނޑައަޅާފައިވާ ހަތަރު ބާވަތެއްގެ ވެކްސިންގެ ތެރެއިން ކޮންމެވެސް އެއް ވެކްސިނެއްގެ ދެ ޑޯޒް ފުރިހަމަ ކުރުމުންނެވެ. އެއީ ފައިޒާ އާއި މޮޑާނާ އާއި ޖޯންސަން ޖޯންސަންގެ ޖޭންސަންގެ އިތުރުން އެސްޓްރާޒެނެކާ އެވެ. ކޮވިޑުން ދިފާއު ވުމަށް ރާއްޖޭގައި އާންމުކޮށް ޖަހާ ކޮވިޝީލްޑް ވެކްސިން އޭގެ ތެރޭގައި ނުހިމެނެ އެވެ.

ނަމަވެސް އިސްލާމިކް މިނިސްޓަރު ޑރ. އަހުމަދު ޒާހިރު "މިހާރު" އަށް ވިދާޅުވީ، ބޭރު ގައުމުތަކުގައި އާންމުކޮށް ޖަހާ ކޮވިޑް ވެކްސިން [ރާއްޖޭގައި ނަމަ ކޮވިޝީލްޑް] ގެ ދެ ޑޯޒް ފުރިހަމަކޮށްގެން އުމްރާވެރިންނަށް ސައޫދީ އަށް އެތެރެވެވޭނެ ކަމަށް އެ ގައުމުގެ ރަސްމީ ބައެއް ވެބްސައިޓްތަކުގައި ބުނެފައިވާ ކަމަށެވެ.

"އެހެންކަމުން އުމްރާގެ އަޅުކަން އަދާކުރަން ދާ ފަރާތްތަކަށް އެއްވެސް ކަހަލަ ދައްޗެއް ދިމާ ނުވާނެ ކަމަށް މި ބަލަނީ،" މިނިސްޓަރު ވިދާޅުވި އެވެ.

ސައޫދީގައި ދިރިއުޅޭ މީހުންނަށް އުމްރާ ވުމުގެ ހުއްދަ އިއްޔެ އިން ފެށިގެން އަލުން ދީފައި ވާއިރު، ބޭރު ގައުމުތަކުން ދާ މީހުންނަށް އެ ގައުމަށް އެތެރެވެވޭނީ އަންނަ މަހުގެ 10 އިން ފެށިގެންނެވެ.

ސައޫދީގައި ކޮވިޑުގެ ހާލަތު މިދިޔަ އަހަރު ގޯސްވުމުގެ ސަބަބުން ފެބްރުއަރީ 2020 ގައި އުމްރާގެ އަޅުކަން މެދުކަނޑައިލުމަށް ފަހު، އަލުން އެ ފުރުސަތު ހުޅުވާލާފައި ވަނީ އޭގެ އަށް މަސް ފަހުން އެ އަހަރުގެ އޮކްޓޫބަރު މަހު އެވެ. ސައޫދީން މި އަހަރުގެ ހައްޖު ކާމިޔާބުކަމާ އެކު ނިންމާލާފައި ވާއިރު، އެއްވެސް ހައްޖާޖީއަކު ކޮވިޑަށް ޕޮޒިޓިވްވެފައެއް ނުވެ އެވެ.

މި އަހަރުގެ ހައްޖުގެ އަޅުކަމުގެ އިންތިޒާމުތައް ކާމިޔާބުކަމާ އެކު ނިންމައިލުމަށް ފަހު، ސައޫދީ ސަރުކާރުން ވަނީ ދުވާލަކު 20،000 މީހުންނަށް އުމްރާ ވެވޭނެ ގޮތަށް އިއްޔެ އިން ފެށިގެން ހަރަމްފުޅު ހުޅުވާލައިފަ އެވެ.