އެންމެ ބޮޑު ވައުދުގައި ނައިވާދޫ ވެސް ހިމަނައި ފާހަގަޖެހިއްޖެ: ރައީސް

އެއްވެސް ރަށެއް ތަފާތުނުކޮށް އަސާސީ ހިދުމަތްތައް ފޯރުކޮށްދިނުމަކީ އެމަނިކުފާނުގެ އެންމެ ބޮޑު ވައުދު ކަމަށާއި ހދ. ނައިވާދޫގެ ސާފު ބޯފެނުގެ ނިޒާމް ނިމި، ބޮޑު ވައުދުގެ ތެރޭގައި މި ރަށް ވެސް ހިމެނިއްޖެ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

ނައިވާދޫގެ ސާފު ބޯފެނުގެ ނިޒާމް އިފްތިތާހްކޮށްދެއްވައި ރައީސް ވިދާޅުވީ މި ރަށަކީ ވެސް ސަރުކާރުތައް ނިމިގެން ދިޔައިރު ރައްޔިތުންނަށް ދޭން ޖެހޭ އަސާސީ ހިދުމަތްތަކުގެ ތެރޭގައި ހިމެނޭ ސާފު ބޯފެން ނުލިބި އޮތް ރަށެއް ކަމަށެވެ. މާލެ އާއި 290 ކިލޯ މީޓަރު ދުރުގައި އޮތް މި ކުޑަ ރަށް ބާކީ ނުކުރުމަކީ އެމަނިކުފާނުގެ ސަރުކާރުގެ އަމާޒަކަށް ހެދި ކަމެއް ކަމަށް ވިދާޅުވި އެވެ.

"އަޅުގަނޑުމެން ވީ އެންމެ ބޮޑު ވައުދަކީ ތަފާތު ނުކުރުން. އެއްވެސް ރައްޔިތަކު ތަފާތުނުކޮށް ހަމަހަމަކާ އެކީގައި ހިދުމަތްތައް ފޯރުކޮށްދިނުން. އެ މީހަކު އުޅޭ ރަށެއް އަތޮޅެއް ސިޓީއެއް ތަފާތުނުކޮށް ހިދުމަތްތައް ހަމަހަމަކޮށް ދިނުން," ރައީސް ވިދާޅުވި އެވެ.

މިކަމަކީ މެނިފެސްޓޯގައި ލިޔެގެން ކުރަން ޖެހޭ ކަމެއް ކަމަށް ގަބޫލު ނުކުރައްވާ ކަމަށާއި އެކަން ފަހިކޮށްދިނުމަކީ އޭރެއްގައި އޮންނަ ސަރުކާރެއްގެ މައްޗަށް ގާނޫނުއަސާސީން ލާޒިމް ކަމެއް ކަމަށް ވިދާޅުވި އެވެ. އެމަނިކުފާނު ރައްޔިތުންނަށް ހުށަހެޅި މެނިފެސްޓޯގައި ރަށްރަށުގެ ސާފު ބޯފެން ފޯރުކޮށްދިނުމުގެ ވައުދެއް ނޯންނާނެ ކަން ފާހަގަކުރެއްވި އެވެ.

"އެއީ އެއަށްވުރެން މާ އަސާސީ ކަމަކަށް ވާތީ. ގާނޫނުއަސާސީގައި ބުނަނީ ރައްޔިތުންގެ މެދުގައި ތަފާތުނުކުރަން. ތަފާތު ނުކުރުމަކީ ހަމައެކަނި ކޯޓަށް ހުށަހެޅޭ މައްސަލައެއްގައި އެތާ އިންނަވާ ފަނޑިޔާރު ކުރައްވަންޖެހޭ ކަމެއް ނޫން. އަދި ފުލުސް އޮފީހަށް ހުށަހެޅޭ މައްސަލައެއްގައި އެތާ ތަހުގީގު ކުރައްވަން އިންނަވާ ބޭފުޅެއް ނޫން," ރައީސް ވިދާޅުވި އެވެ.

ނައިވާދޫގެ ސާފު ބޯފެނުގެ މަޝްރޫއު

- ސެޕްޓެމްބަރު 2019 ގައި މަޝްރޫއު ހަވާލުކުރީ ސާސީ ކޮންސްޓްރަކްޝަނާ.

- މިދިޔަ ޖޫން މަހު ނިމުނު މަޝްރޫއުއަށް 15.3 މިލިއަން ރުފިޔާ ހޭދަވި.

- 4.5 ކިލޯ މީޓަރުގެ ފެނުގެ ނިޒާމުގެ ވިއުގައެއް ވަނީ އަޅާފައި.

- ދުވާލަކު 40 ޓަނުގެ ފެން އުފައްދާ ދެ އާރުއޯ ޕްލާންޓް ވަނީ ބަހައްޓާފައި.

- ފެން ރައްކާކުރުމަށް 185 ޓަނުގެ ދެ ތާންގީ އަދި ވާރޭ ފެން ރައްކާކުރުމަށް 150 ޓަނުގެ ތާންގީއެއް ވަނީ ބަހައްޓާފައި.

- 174 ގޭބީސީއަށް ވަނީ ފެން ގުޅާފައި

ރައީސް ވިދާޅުވީ 2018 ގެ ރިޔާސީ އިންތިހާބުގައި އެމަނިކުފާނު ނައިވާދުއަށް ވަޑައިގެން ވާހަކަ ދެއްކެވިއިރު އަސާސީ ހިދުމަތްތަކުގެ ލިސްޓުގައި ދަތުރުފަތުރުގެ ފަސޭހަކަން ގެނެސްދެއްވުން ހިމެނުއްވި ކަމަށެވެ. އެ ދުވަހު އެމަނިކުފާނު ވިދާޅުވި ވާހަކަފުޅު ތަކުރާރު ކުރައްވަމުން މިއަދު ވިދާޅުވީ އާރުޓީއެލްގެ ފެރީއަކީ ދަތުރުފަތުރުގެ ނިޒާމަށް "ބޮޑު ބަދަލެއް" ކަމަށެވެ. ރައީސް ވިދާޅުވި ގޮތުގައި ހަލުވި ސްޕީޑުގެ ދަތުރުތަކާ އެކު ރައްޔިތުންނަށް ފަސޭހަކަން މިހާރު ލިބޭނެ ކަމަށެވެ.

އާބާދީގައި 800 މީހުން ހިމެނޭ ނައިވާދުއަށް މި ސަރުކާރުން ހިންގާ މަޝްރޫއުތަކާ ގުޅޭ ގޮތުން ވިދާޅުވީ ރާއްޖޭގެ އެހެން ރަށްތަކެކޭ އެއްގޮތަށް ދަތި އުނދަގޫ ތަހައްމަލްކުރަމުން ދިޔަ ނައިވާދޫން ވެސް ހުށަހެޅި އެއްކަމަކީ ސާފު ބޯފެން ފޯރުކޮށްދިން ކަމަށެވެ.

އެމަނިކުފާނު ވިދާޅުވި ގޮތުގައި ނައިވާދޫގައި ފެނަށް ޖެހި އެއްވެސް ވަރަކަށް ފެން ނުލިބި އުޅެން ޖެހުމުގެ އުނދަގޫ ރައްޔިތުންނަށް ޖެހިފައިވެ އެވެ. އެކަމަކު މި ރަށަށް ވަރަށް ބޮޑު ލުޔެއް ފެނުގެ ނިޒާމާ އެކު ލިބިފައިވާ ކަމަށް ވިދާޅުވި އެވެ.

މި ރަށުގެ ވެސް ފެނުގެ މަޝްރޫއު ފަށައިގަނެ ކުރިއަށް ގެންދަން ޖެހުނީ މުޅި ދުނިޔެ ބަންދުވި ކޮވިޑުގެ ދުވަސްވަރު ކަމަށާއި މަސައްކަތަށް ބޭނުންވާ ސާމާނު ގެނައުމަށް އިންތިހާއަށް ދަތިތަކެއް ކުރިމަތިވި ކަމަށް ވިދާޅުވި އެވެ.

އެހެންވިޔަސް ލަސްކުރުމެއް ނެތި މަސައްކަތްތައް ބަރާބަރަށް ކުރަމުން އަންނަ ކަމަށް ވިދާޅުވި އެވެ.

ރައީސް ވިދާޅުވި ގޮތުގައި ނައިވާދުއަށް އަދިވެސް ގިނަ ކަންކަން ކޮށްދޭން ޖެހެ އެވެ. މިހާތަނަށް ނުފެށި އޮތް ކަމަކީ ބަނދަރުގެ މަސައްކަތް ކަމަށާއި ލަސްތަކެއް ނުވެ އެކަން ވެސް ކުރިއަށް ގެންދާނެ ކަމަށް ވިދާޅުވި އެވެ.

ރައީސް ވިދާޅުވީ ހދ. އަތޮޅުގައި 199 މަޝްރޫއު ކުރިއަށް އެބަދާ ކަމަށެވެ. މި މަޝްރޫއުތަކަށް 970 މިލިއަން ހޭދަވެ އެވެ.

އެމަނިކުފާނު ވިދާޅުވި ގޮތުގައި ތަރައްގީގީއަކީ ހުއްޓުމެއް ނެތް ކަމެކެވެ. މި ރަށަށް އަދިވެސް ބޭނުންވާ ހިދުމަތްތައް އެބަހުރި ކަމަށާއި އެކަންކަން މި ސަރުކާރުން ކޮށްދޭނެ ކަމުގެ ޔަގީންކަން ދެއްވި އެވެ.