ރާއްޖެ ހިމެނޭހެން އޭޝިއާގެ މަގްބޫލް ހަތް މަންޒިލަކަށް ފޯ ސީޒަންސްގެ ޕްރަައިވެޓް ޖެޓް ޓުއާއެއް

ރާއްޖެ ހިމެނޭހެން އޭޝިއާގެ މަގްބޫލް ހަތް މަންޒިލަކަށް ފޯ ސީޒަންސްގެ ޕްރައިވެޓް ޖެޓް ޓުއާ ބާއްވަން ނިންމައި، ރިޒަވޭޝަނަށް ހުޅުވާލައިފި އެވެ.

"އޭޝިއާ އަންވެއިލްޑް"ގެ ނަމުގައި ބާއްވާ އެ ޓުއާ ކުރިއަށް ދާނީ 2024، ޖެނުއަރީ 11 އިން 26 ވަނަ ދުވަހަށެވެ.

ޓުއާގެ ފުރަތަމަ ދަތުރު ކުރާނީ ޖަޕާނުގެ ޓޯކިޔޯއަށެވެ. އެއަށް ފަހު އިންޑޮނޭޝިއާގެ ބާލީ، ރާއްޖެ، ވިއެޓްނާމްގެ ހޮއި އަން، ބޫޓާން، ތައިލެންޑްގެ އެންގްކޮ ވަޓް އަށް ދިއުމަށްފަހު ޓުއާ ނިންމާލަން ހަމަޖެހިފައިވަނީ ބެންކޮކުންނެވެ.

ތަފާތު ސަގާފީ އަދި ގައުމީ ތަޖުރިބާތަކާއި ކެއުންތައް އެ ޓުއާގެ ބައިވެރިންނަށް ލިބޭނެ ކަމަށް ފޯ ސީޒަނުން ބުންޏެވެ. ސޯޅަ ދުވަހުގެ އެ ޓުވާގައި ކޮންމެ މަންޒިލެއްގައި ވެސް ދެ ތިން ދުވަހު މަޑުކޮށް އެތަންތަން ތަޖުރިބާކޮށްލަން ލިބެ އެވެ.

ޓުއާގެ ބައިވެރިން ރާއްޖޭގައި މަޑުކުރަން ހަމަޖެހިފައިވަނީ އެ އަހަރުގެ ޖެނުއަރީ 16 އިން 19 އަށެވެ.

ފޯ ސީޒަންސްގެ ވެބްސައިޓުގައި ވާގޮތުން، ވެލާނާ އިންޓަނޭޝަނަލް އެއާޕޯޓަށް ޖެޓު ޖެއްސުމަށްފަހު އެ ކުންފުނީގެ ރިސޯޓު، ކުޑަ ހުރަޔަށް ދަތުރުގެ ބައިވެރިން ގެންދާނެ އެވެ.

ރާއްޖޭގައި މަޑުކުރާ ދުވަސްތަކުގައި "ޓާޓްލް ސަފާރީ" ނުވަތަ ވެލާތަކުގެ ހިތްގައިމު މަންޒަރު ބަލާލަން ހާއްސަކޮށް ސަފާރީ ދަތުރެއް ބާއްވާނެ ކަމަށް ފޯ ސީޒަނުން ބުންޏެވެ.

ފަސްޓް ކްލާސް ހިދުމަތާއެކު، ޕްރައިވެޓް ޖެޓުގައި އޭޝިއާގެ އެންމެ މަގްބޫލް ހަތް މަންޒިލަށް ދަތުރުކުރުމުގެ ފުރުސަތު ލިބޭ މި ޓުއާގެ އަގަކީ ބޮލަކަށް 135،000 ޑޮލަރެވެ. އެކަނި ދަތުރުކުރާނަމަ އިތުރަށް 13،500 ޑޮލަރު ނަގަން ވަނީ ހަމަޖެހިފަ އެވެ.

ފޯ ސީޒަނުން ބުނިގޮތުގައި، އެ ޓުއާގެ ބައިވެރިން ގައުމުތަކުގައި މަޑުކުރާނީ އެ ކުންފުނީގެ އެންމެ ފެންވަރު ރަނގަޅު ރިސޯޓުތަކުގަ އެވެ. އަދި ފޯ ސީޒަންސްގެ ރިސޯޓެއް ނެތް ނަމަ، ފަސްތަރީގެ ހޮޓާތަކުން ބައިވެރިންގެ އެކޮމޮޑޭޝަން ހަމަޖައްސައިދޭނެ ކަމަށް އެ ކުންފުނިން ބުންޏެވެ.

ފޯ ސީޒަނުން ވަނީ 2024 ވަނަ އަހަރު ދުނިޔޭގެ އެހެނިހެން މަގްބޫލް ގިނަ މަންޒިލްތަކަކަށް ވެސް މިފަދަ ޕްރައިވެޓް ޖެޓް ޓުއާތައް އަޅަން ރާވައިފަ އެވެ.