ހިޔާ ފްލެޓް ސަރަހައްދުގައި ކްލިނިކެއް ހަދަން ހަވާލުކޮށްފި

ހިޔާ މަޝްރޫއުގެ ދަށުން ހުޅުމާލޭގެ ދެވަނަ ފިޔަވަހީގައި އިމާރާތް ކޮށްފައިވާ ފްލެޓުތައް ހިމެނޭ ސަރަހައްދުގައި ކްލިނިކެއް ހަދަން އެޗްޑީސީން ބަޔަކާ އިއްޔެ ހަވާލުކޮށްފި އެވެ.

"ލައިފް ސަޕޯޓް މެޑިކަލް ސެންޓަ" ގެ ނަމުގައި މި ކްލިނިކް ހުޅުވާނީ 12 ވަނަ ފްލެޓުގެ ހަތަރުވަނަ ޔުނިޓުގަ އެވެ.

އެ މަސައްކަތް ޕައިތަން ޕްރައިވެޓް ލިމިޓެޑާ ހަވާލު ކުރީ ތިން މަސް ދުވަހުގެ ތެރޭގައި ނިންމާ ގޮތަށެވެ.

އެޗްޑީސީން މިއަދު ބުނީ ފްލެޓުތަކުން ކުލި ނަގަން ފަށަންވާއިރަށް ކޮންމެހެން ބޭނުންވާ ހިދުމަތްތައް ފޯރުކޮށްދިނުމަށް މަސައްކަތް ކުރަމުން އަންނަ ކަމަށެވެ. އެހެންވެ، ލައިފް ސަޕޯޓު ކްލިނިކްގެ އިތުރުން ވެސް އިތުރު ދެ ކްލިނިކެއް ފްލެޓު ސަރަހައްދުގައި ހުޅުވަން ނިންމާފައިވާ ކަމަށް އެ ކުންފުނިން ބުންޏެވެ.

ހިޔާ ފްލެޓް ސަރަހައްދުގައި ދިރިއުޅޭ މީހުންނަށް ބޭނުންވާ ޒަރޫރީ ހިދުމަތްތަކާއި އެ ސަރަހައްދު ސާފުކޮށް ބާއްވަން ދޭން ޖެހޭ ހިދުމަތްތައް ކުރިއަށް އޮތް ތިން މަސް ދުވަހުގެ ތެރޭގައި ދޭން ފަށާނެ ކަމަށް ވެސް އެޗްޑީސީން ބުނެ އެވެ.

މިދިޔަ ޖުލައި މަހުގެ ތެރޭގައި ފްލެޓުތައް ވެރިފަރާތްތަކާ ހަވާލު ކުރަން ފަށާފައިވާއިރު، މިހާތަނަށް ގިނަ ބަޔަކު ވަނީ ފިނިޝިންގެ މަސައްކަތްތަކަށް ފަހު ފްލެޓުތަކަށް ބަދަލުވެފަ އެވެ. ފްލެޓުތަކުގެ ކުލި ނަގަން ފަށާނީ އަންނަ އަހަރުގެ ޖެނުއަރީ މަހުން ފެށިގެންނެވެ.