ހުޅުމާލެ ކިއޮސްކްތައް ދޫކޮށް ބޭނުންކުރަން ފަށައިފި

ހުޅުމާލެ ފޭސް ދޭއްގައި ހަޓްތައް ހިންގި ސަރަހައްދުގައި ހެދި ކިއޮސްކުތަކަށް ކުރިމަތިލީ މީހުންގެ މެދުގައި ގުރު ނަގައި އެ ތަންތަން ދޫކޮށްފި އެވެ.

އެ ތަނުގައި ހަދާފައިވާ ވިހި ކިއޮސްކަށް އެދި 183 މީހަކު ކުރިމަތިލި އެވެ. މިދިޔަ ސެޕްޓެމްބަރު މަހުގެ ފަހުކޮޅު ގުރު ނެގުން ފަސްކުރީ އެ ތަންތަނަށް ކުރިމަތިލި މީހުންގެ މެދުގައި ކަންބޮޑުވުންތަކެއް އޮތުމުންނެވެ.

އެޗްޑީސީގެ އޮފީޝަލަކު "މިހާރު" އަށް ވިދާޅުވީ ކިއޮސްކަށް އެދި ކުރިމަތިލި މީހުންގެ މެދުގައި މީގެ ދުވަސްކޮޅެއް ކުރިން ގުރު ނަގައި، އެ ތަންތަން ދޫކޮށްފައިވާ ކަމަށެވެ.

ބައެއް ކިއޮސްކްތަކުގައި ހެދިކާ ވިއްކަން ވަނީ ފަށައިފަ އެވެ. އެކަމަކު އަދި ބައެއް ތަންތަނުގައި ވިޔަފާރި ނުފަށަ އެވެ.

އެއް އަހަރަށް ދޫކުރި ކިއޮސްކްތަކުގެ ކުލީގެ ގޮތުގައި މަހަކު 3،500ރ. ދައްކަން ޖެހެ އެވެ. އިކުއިޒިޝަން ފީގެ ގޮތުގައި 5،000ރ. ނަގާއިރު، ލީސް ޑިޕޮސިޓްގެ ގޮތުގައި 10،500ރ. ދައްކަން ޖެހެ އެވެ.

މިތަންތަން ދޫކުރީ ހިޔާ ފްލެޓްގެ ވެރިފަރާތް ނުވަތަ ހިޔާ ފްލެޓުގައި ދިރިއުޅޭ މީހުންނަށެވެ. އެޗްޑީސީ އަށް ދައްކަންޖެހޭ އެއްވެސް ފައިސާއެއް ނުދައްކާ ހުރި މީހަކަށް މިތަން ދުލެއް ނުކުރެ އެވެ.

އެޗްޑީސީން ބުނި ގޮތުގައި ކިއޮސްކް ހިންގުމުގެ ހުރިހާ މަސައްކަތެއްގައި އުޅެން ޖެހެނީ ދިވެހިންނެވެ.

ކިއޮސްކްގައި ކުރުން މަނާ ކަންކަން:

• ކިއޮސްކް ހިންގުމުގެ ހުއްދަ ދީފައިވާ މީހާ އެހެން މީހަކަށް ކުއްޔަށް ދިނުން.

• އަލިފާން ހިފާ ޒާތުގެ ތެލާއި ގިރިސް އަދި ގޭސް ގެންގުޅުން.

• ކިއޮސްކްގައި އެއްވެސް ބާވަތެއްގެ އެއްޗެއް ކެއްކުމާއި ފިހުން އަދި ތެލުލުން.

• ކިއޮސްކްގެ ބޭރުގައި އެއްވެސް ބާވަތެއްގެ ތަކެއްޗާއި ކުނި ބެހެއްޓުން.

• ކިއޮސްކްގެ ބޭރުގައި ގޮނޑި އާއި މޭޒު ބަހައްޓައިގެން ވިޔަފާރިކުރުން.

ހިޔާގެ ޓަވަރުތަކުގެ މެދުގައި އޮންނަ ހުސް ބިމުގައި، އެންމެ ފުރަތަމަ އެތަނުގައި އުޅުނު މީހުން ވިޔަފާރި ކުރަން ހަޓު ހެދީ ހުއްދައެއް ނެތި އެވެ. އެހެންވެ، އެޗްޑީސީން ހަޓުތައް ނެގުމުން، އެމީހުން އެ ވިޔަފާރި ފެށީ މޫދާ ދިމާލުން އޮންނަ ހުސް ބިމުގަ އެވެ. އެތަނުގައި ވެސް ގިނަ އަދަދެއްގެ ހަޓު ހަދައިގެންނާއި ޕިކަޕުތަކުގައި ކާބޯތަކެތީގެ ވިޔަފާރި ފެށީ ހުއްދައެއް ނެތި އެވެ.