ދެ އަހަރު ފަހުން ރިތިކް ފިލްމީ މަސައްކަތަށް

ފިލްމީ މަސައްކަތެއް ނުކުރާތާ ދެ އަހަރު ފަހުން، ބޮލީވުޑްގެ މަޝްހޫރު އެކްޓަރު ރިތިކް ރޯޝަން ސޮއިކޮށްފައި އޮތް ދެ ފިލްމުގެ ތެރެއިން "ވިކްރަމް ވޭދާ" ގެ ޝޫޓިން ފަށައިފި އެވެ.

މީގެ ތިން އަހަރު ކުރިން ރިލީޒްކުރި ތަމަޅަ އެކްޝަން ތުރިލާގެ ހިންދީ ރިމޭކްގެ މަސައްކަތް ހޮނިހިރު ދުވަހު ފެށީ ޔޫއޭއީގަ އެވެ. މީގެ ސެޓުން ނަގާފައިވާ ބައެއް ފޮޓޯތަކާއި ވީޑިއޯތައް އާންމު ކޮށްފައިވެ އެވެ. ރިތިކްގެ ސޯޝަލް މީޑީއާ އެކައުންޓްތަކުގައި ޕޯސްޓް ކޮށްފައިވާ ވީޑިއޯއެއްގައި ވެސް ދެ އަހަރު ފަހުން ކެމެރާ ކުރި މައްޗަށް ނުކުތް ވާހަކަ ބުނެފައިވެ އެވެ.

އޭނާގެ އެންމެ ފަހުގެ ފިލްމުތަކަކީ 2019 ގެ "ސުޕަ 30" އާއި "ވޯ" އެވެ.

"ވިކްރަން ވޭދާ" ގައ ރިތިކާ އެކު ސައިފް އަލީ ޚާން ވެސް މުހިއްމު ރޯލެއް ކުޅޭނެ އެވެ. މިދިޔަ ހަފުތާގައި އޭނާ ޑައިރެކްޓަރު އޯމް ރައުތުގެ "އާދިޕުރުޝް" ގެ ޝޫޓިން ނިންމާލާފައިވާތީ މި ހަފުތާގެ ތެރޭގައި ޔޫއީއޭ އަށް ފުރާނެ އެވެ. ރިތިކާއި ސައިފް ކުރިން 2002 ގެ "ނަ ތުން ޖާނޯ ނަ ހަމް" ގައި ވެސް މަސައްކަތްކުރި އެވެ.

"ވިކްރަމް ވޭދާ" ގެ ހިންދީ ރިމޭކް ވެސް އޮރިޖިނަލް ފިލްމު ޑައިރެކްޓްކުރި ޕުޝްކާރް-ގަޔަތުރީ ޑައިރެކްޓްކުރާ އިރު، މީގައި ރިތިކް ކެރެކްޓާގެ އަކީ ވޭދާ ކިޔާ ގޭންގްސްޓާރެއްގެ ރޯލެވެ. ސައިފް ކުޅޭ ވިކްރަމް އަކީ ފުލުހެކެވެ.

އޮރިޖިނަލް ފިލްމުގައި ވޭދާ އަކީ ވިޖޭ ސެތުޕަތީ އެވެ. ވިކްރަމް އަކީ އާރް މާދްވަން އެވެ.

ސައިފާއި ރިތިކާ އެކު "ވިކްރަމް ވޭދާ" ސިނަމާތަކަށް ގެންނަން ނިންމާފައި ވަނީ އަންނަ އަހަރުގެ ސެޕްޓެމްބަރު 30 ގަ އެވެ.

ރިތިކް، 47، ސޮއިކޮށްފައި އޮތް އަނެއް ފިލްމަކީ ދީޕިކާ ޕަދްކޯނާ އެކު ކުޅެން ހަމަޖެހިފައިވާ "ވޯ" ގެ ޑައިރެކްޓަރު ސިދާންތު އާނަންދުގެ "ފައިޓާ" އެވެ.