ރާއްޖެ ބަލިވުމުގެ ފަހަތުގައިވާ ސަބަބުތައް

އެންމެ ފަހުގެ ޗެމްޕިއަންގެ ގޮތުގައި އަމިއްލަ ފަސް ގަނޑުގައި ސާފް ޗެމްޕިއަންޝިޕާ ދިވެހިން ކުރިމަތިލުމުން މުބާރާތާ މެދު އުންމީދު އާވި އެވެ. ރޭ އިންޑިއާ އަތުން ބަލިވެ ރާއްޖެ މުބާރާތުން ކެޓުމުން ގައުމީ ޓީމަށް ކުރިމަތިވި މައްސަލަތަކާ ބެހޭގޮތުން ސޯޝަލް މީޑިއާގައި ވާހަކަ ދައްކަން ފަށައިފި އެވެ.

ފައިނަލުގެ ކުރިން ރާއްޖެ އަށް މުބާރާތް ނިމުމުގައި ގިނަ ސަބަބުތަކެއް އެބަހުއްޓެެވެ. ސަރަހައްދުގެ ފުޓްބޯޅައިގައި އަބަދުވެސް ރާއްޖެ އަށް ބަލި ކުރަން އުނދަގޫ ޓީމެއްގެ ގޮތުގައި އޮތީ އިންޑިއާ އެވެ. ރާއްޖެ އިން ދެ ފަހަރު މުބާރާތް ކާމިޔާބުކުރި އިރު ވެސް ގުުރޫޕް ސްޓޭޖުގައި އިންޑިއާ އަތުން ބަލިވި އެވެ. އިންޑިއާއާ ދެކޮޅަށް ރާއްޖެ ވާދަކުރި ކޮންމެ މުބާރާތެއްގައި އެ ޓީމު އަތުން ކޮންމެވެސް ހިސާބަކުން ބަލިވެފައިވެ އެވެ. ދެހާސް އަށެއް އަދި 2018 ގައި އިންޑިއާ ބަލިކޮށް ރާއްޖެ ޗެމްޕިއަންކަން ހޯދި ދެ ފަހަރު ވެސް ގްރޫޕް ސްޓޭޖްގައި އިންޑިއާ އަތުން ބަލިވެފައިވެ އެވެ.

ބަންގްލަދޭޝް އާއި ސްރީ ލަންކާ އަދި ނޭޕާލް އަކީ ރާއްޖެއަށް ސީނިއާ ލެވަލްގައި އަބަދުވެސް ބަލި ކުރެވޭ ޓީމުތަކެވެ. އެކަމަކު މިފަހަރު މުބާރާތުގައި ނޭޕާލްގެ އަތްދަށުވެއްޖެ އެވެ. އެއީ ސާފް ޗެމްޕިއަންޝިޕެއްގައި ރާއްޖެ ނޭޕާލް އަތުން ބަލިވި ފުރަތަމަ ފަހަރެވެ.

ރާއްޖެ އަށް ނާކާމިޔާބުވި ސަބަބުތަކުގެ ގޮތުގައި ގައުމީ ކޯޗު އަލީ ސުޒޭން ވެސް ބައެއް ސަބަބުތައް ދައްކަ އެވެ.

"އެއް ސަބަބަކީ އިންޑިއާގެ ކުޅުންތެރިންނަށް ކޮމްޕެޓެޓިވް ލެވަލެއްގައި މިދިޔަ ދޮޅު އަހަރެއްގެ ތެރޭ ކުޅެން ލިބިފައި ހުރި މެޗުތައް ގިނަވުން،" ސުޒޭން ބުންޏެވެ. "އަޅުގަނޑުމެންގެ ލީގު ވެސް އޭޕްރީލްގައި ހުއްޓާލި ގޮތަށް އެ އޮތީ."

ކޮވިޑް-19 އާ ގުޅިގެން ރާއްޖޭގެ ލީގު އޭޕްރީލްގައި މެދުކަނޑާލި ގޮތަށް ދެން ޖހުނީ ސީޒަން ނިންމާލާށެވެ. ލީގުގެ ބާކީ އެއްބުރު އޮއްވައި ލީގު ހުއްޓާލަން ޖެހުމުން ގިނަ ކުޅުންތެރިންނަށް ސީޒަން ނިމުނީ އެވެ. ސާފް ޗެމްޕިއަންޝިޕް ކުރިމަަތީގައި އޮތް އިރު އެއީ ގައުމީ ޓީމަށް ވެސް ކުރިމަތިވާނެ މައްސަލައެއްކަން ކުރިން ވެސް އޮތީ ފާހަގަވެފަ އެވެ. އެކަމުން ނުކުންނާނެ މައްސަލަތައް ކުޑަ ކުރުމަށް އެފްއޭއެމުން މާބޮޑު ކަމެއް ކުރިތަނެއް ނުފެނުނެވެ.

މުބާރާތުގެ ފައިނަލަށް ދަތުރުކުރި ނޭޕާލަކީ މިފަހަރުގެ މުބާރާތުން ފެންނާނެ އެންމެ ފިޓް ޓީމެވެ. އެގައުމުގެ ލީގު މެއި މަހު ނިމުނު ގޮތަށް ކްލަބު ފުޓްބޯޅަ އޮތީ ނިމިފަ އެވެ. އެ ގައުމުގެ އާމީ ކްލަބަށް އޭއެފްސީ ކަޕްގެ ގުރޫޕް ސްޓޭޖަށް ނުދެވުމުން އެ ފުރުސަތު ވެސް ގެއްލުނީ އެވެ. ގައުމީ ޓީމުގެ އެ މައްސަލަތައް ކުޑަ ކުރުމަށްޓަކައި ނޭޕާލުން ގިނަ ފިޔަވަޅުތަކެއް އެޅި އެވެ. ގިނަ ފްރެންޑްލީ މެޗުތައް ކުޅުނެވެ.

އެކަމަކު ވޯލްޑް ކަޕް ކޮލިފިކޭޝަންގެ ދެ ވަނަ ބުރު ފިޔަވައި އިންޓަނޭޝަނަލް އެއްވެސް މެޗެއް ރާއްޖެއިން ނުކުޅެ އެވެ. ވޯލްޑް ކަޕް ކޮލިފިކޭޝަންގައި ޔުނައިޓެޑް އެރަބް އެމިރޭޓްސްގެ ދުބާއީގައި ކުޅުނު ތިން މެޗަށް ތައްޔާރުވާން ގައުމީ ޓީމަށް މާލޭގައި ޕްރެކްޓިސް ކުރާނެ ދަނޑެއް ނުލިބުނެވެ. ޓީމު ދުބާއީ އަށް ފުރައިގެން ދިޔައީ ހޮޓެލް ޖެންގައި ލައިޓް ޓްރޭނިންތަކެއް ހެދުމަށްފަހު އެވެ.

އޭރުގެ ކޯޗު މާޓިން ކޫޕްމަން އަށް މުބާރާތަށް ތައްޔާރުވާނެ އެކަށީގެންވާ ހާލަތެއް ނުލިބުނެވެ. އޭނާ އާމެދު ޓީމުގެ ބައެއް ކުޅުންތެރިން ހިތްހަމަނުޖެހުމުން ވަޒީފާއިން ވަކިކޮށްފައި ރަށަށް ފޮނުވާލީ އެވެ. އެފްއޭއެމުން އެ މަގާމަށް އައްޔަން ކުރީ ކޫޕްމަންގެ އެސިސްޓެންޓަކަށް ހުރި ސުޒޭން އެވެ.

ސާފް ޗެމްޕިއަންޝިޕަށް އިންޓަނޭޝަންލް ފްރެންޑްލީ މެޗުތަކެއް ނުލިބި ރާއްޖެ އަށް ޖެހުނީ ގަތަރުގެ ދަށް ޑިވިޝަންތަކުގެ ދެ ކްލަބަކާ ދެކޮޅަށް މެޗުތަކެއް ކުޅޭށެވެ. އެކަމަކު ގަތަރުގެ ޓްރޭނިންގައި ރާއްޖެއާ އެކު އެއް ހޮޓަލެއްގައި ތިބި ނޭޕާލް ޓީމުން ގަތަރުގައި އޮމާންއާ ދެކޮޅަށް ފްރެންޑްލީ މެޗުތަކެއް ކުޅުނެވެ. އޭގެ ކުރިން އިންޑިއާއާ ދެކޮޅަށް ދެ މެޗު ކުޅުނެވެ. އޭޕްރީލް މަހު ތިން ގައުމުގެ މުބާރާތެއް އަމިއްލަ ގައުމުގައި ބޭއްވި އެވެ.

ފްރެންޑްލީ މެޗުތަކެއް ހަމަޖައްސަން އެކަށީގެންވާ މަސައްކަތްތަކެއް އެފްއޭއެމަކަށް ނުކުރެވުނެވެ. ގައުމީ ޓީމުގެ ޕްރެކްޓިސް މާލޭގައި ފެށުމުގެ ކުރިން ބޭއްވި ޕްރެސް ކޮންފަރެންސްގައި ސުޒޭން ބުނެފައި ވަނީ ގަތަރުގެ ޓްރޭނިން ކޭމްޕުގައި ފަސް މެޗު ކުޅެން މަސައްކަތް ކުރާނެ ކަމަށެވެ. އެކަމަކު ސުޒޭން ދެކޭގޮތުގައި ފްރެންޑްލީ މެޗުތަކެއް ކުޅެގެން ފިޓްނަސް ރަނގަޅު ކުރުމަށް މާބޮޑު ކަންތައްތަކެއް ނުކުރެވޭނެ އެވެ.

"ޓްރޭނިން ކޭމްޕްގެ މައިގަނޑު ވިސްނުމަކީ މެޗު ކުޅުން. އެންމެ މަދު ވެގެން ހަތަރު މެޗު ފަސް މެޗު ވަރު ކުޅޭނަން. އެހެންވީމަ އޭގެ މާނައަކީ އެ މެޗުތަކުގެ ތެރެއިން މެޗު ފިޓްނަސް އާއި އެހެން ވިސްނުންތައް ވެސް ގެނެވޭނެޔޭ،" އޮގަސްޓް 26 ގައި ބޭއްވި ޕްރެސް ކޮންފަރެންސްގައި ސުޒޭން ބުންޏެވެ.

"ދެން މެޗު ފިޓްނަސްގެ ވާހަކަ އަކީ ވަރަށް ޓެކްނިކަލް ވާހަކައެއް. އެއީ ޕްރެކްޓިސް މެޗަކުންނެއް އެ ފިޓްނަސްއެއް ނުގެނެވޭނެ. ފުރަތަމަ ކަމަކަށް އެ ޕްރެޝާ އެ ވިސްނުން ބޮލަށް ލައިގެން އެތަނުގައި ފިޒިކަލީ މަސައްކަތް ކުރީމަ އަންނަ އެއްޗެއް މެޗު ފިޓްނަސް އަކީ. އެހެންވީމަ އެއަށް އަޅުގަނޑުމެން މެންޓަލީ ޖެހޭނީ ކުޅުންތެރިން ތައްޔާރު ކުރަން. ހަމަ ފްރެންޑްލީ މެޗެއް ކުޅޭއިރު ހުންނާނީ އެހެން ވިސްނުމެއް."

އެކަމަކު ރޭގެ މެޗަށް ފަހު މީީޑިއާއާ ވާހަކަ ދައްކަމުން ސުޒޭން ފާހަގަ ކުރި އެންމެ މުހިންމު މައްސަލަ އަކީ ރާއްޖޭގެ ކުޅުންތެރިންނަށް އިންޓަނޭޝަނަލް މެޗުތައް މަދުވުމެވެ. އޭނާ ބުނީ އުމުރުފުރާތަކުގެ ގައުމީ ޓީމުގައި ރާއްޖޭގެ ކުޅުންތެރިން ކުޅޭ މެޗުތައް ވެސް މަދު ކަމަށެވެ.

"އަޅުގަނޑުމެންގެ ކުޅުންތެރިޔަކު އޭޖު ގްރޫޕް ކުޅެމުން އައިސް ގައުމީ ޓީމާ ހަމައަށް އަންނައިރު 20 އަށް އިންޓަނޭޝަނަލް މެޗު ވެސް ނުކުޅެ މިއަންނަނީ،" ރޭގެ ޕޯސްޓް މެޗު ޕްރެސްގައި ސުޒޭން ބުންޏެވެ.

ރާއްޖޭގެ ކުޅުންތެރިންނަށް އިންޓަނޭޝަނަލް މެޗުތައް އިތުރު ކުރުމަށްޓަކައި އެފްއޭއެމުން ވެސް ކުރިމަގަށް ވިސްނައިގެން މަސައްކަތް ކުރަމުން ދާކަމަށް ސުޒޭން ބުންޏެވެ. އެގޮތުން އަންނަ މަހު ލަންކާގައި ބާއްވާ ފޯ ނޭޝަން މުބާރާތެއްގައި ބައިވެރިވުމަށް އެފްއޭއެމުން ނިންމާފައިވާކަން ސުޒޭން ފާހަގަ ކުރި އެވެ. އަންނަ މަހު ބާއްވާ އެ މުބާރާތުގައި ވާދަކުރާނީ ލަންކާ އާއި ރާއްޖޭގެ އިތުރުން ބަންގްލަދޭޝް އާއި ސީޝަލްސް އެވެ. އަންނަ މަހު 8-17 އަށް ކުރިއަށްދާ މުބާރާތް ކުޅޭނީ ކޮލަމްބޯގެ ރޭސް ކޯޒް ސްޓޭޑިއަމްގަ އެވެ. މުބާރާތުގެ ފައިނަލަށް ދާނީ އެންމެ ގިނަ ޕޮއިންޓް ހޯދާ ދެ ޓީމެވެ.

"އެހެންވީމަ އެކަހަލަ ކޮމްޕްޓޭޓިވް ލެވަލްގެ ބައިވަރު މުބާރާތްތަކެއް ކުޅެގެން ކުޅުންތެރިން އުފެއްދުމުގައި ނުވަތަ ކުޅުންތެރިންގެ އެންމެ މަތީ ލެވަލް ނެރުމަށްޓަކައި މަސައްކަތްތަކެއް ކުރޭ. އެންމެ މަތީ ލެވަލްގައި ވާދަކޮށްލުމުގެ ފުރުސަތު ލިބި، ނޭޕާލް އިންޑިއާ އަށް ލިބުނު ކަހަލަ ތަނަވަސް ފުރުސަތުތައް ލިބިގެން އަޅުގަނޑުމެންގެ ކުޅުންތެރިންނަށް އަދި ޓީމު ރަނގަޅު ކުރުމުގެ ފުރުސަތު ވެސް ލިބިގެންދާނެ،" ސުޒޭން ބުންޏެވެ.

ސްރީ ލަންކާ ފޯ ނޭޝަން މުބާރާތުގައި ރާއްޖެ ކުޅޭ މެޗުތައް

* ނޮވެމްބަރު 8: ސްރީ ލަންކާ - ދިވެހި ރާއްޖެ

* ނޮވެމްބަރު 11: ބަންގްލަދޭޝް - ދިވެހި ރާއްޖެ

* ނޮވެމްބަރު 14: ސީޝަލްސް - ދިވެހި ރާއްޖެ

އިންޑިއާ އަތުން ބަލިވުމުގައި ކުރިމަތިވި މައްސަލައަކީ ކޮބާ؟

ސުޒޭން ބުނީ ކަވަރިން، މާކިންގައި މައްސަލަ ދިމާިވި ކަމަށެވެ. އެ މައްސަލަ ދިމާވީ ފުރަތަމަ 15 މިނެޓް ތެރޭގައި ކަމަށް އޭނާ ބުންޏެވެ. އޭގެތެރެއިން މެޗުގެ ކޮންޓްރޯލް ރާއްޖެއަށް ގެއްލުނު ކަމަށް ސުޒޭން ބުންޏެވެ.

"މި މެޗު އަޅުުގަނޑުމެންނަށް ގެއްލުމުގައި އެންމެ ބޮޑު މައްސަލައަކަށްވީ ކުޑަކޮށް ބެކްފުޓްގައި ހަމަ ފެށުނީ. އިންޑިއާ މެޗުގެ ފެށުން ހަމަގައިމުވެސް ރަނގަޅު ކުރި. ހާއްސަކޮށް އެމީހުންގެ އެކްސްޕިރިއަންސް ކުޅުންތެރިންގެ ފަރާތުން އެމީހުންގެ އެންމެ މަތީ ކޮލިޓީ ފެނިގެން ދިޔަ،" ސުޒޭން ބުންޏެވެ.

"އެގޮތުން ކޮމްޕްޓެޓިވް ލެވަލެއްގައި އިންޑިއާ އަށް ގިނަ މެޗުތަކެއް ކުޅެން ފުރުސަތު ލިބުން އެއީ ހަމަގައިމު ވެސް މިކަހަލަ ޑިސައިޑިން މެޗަކަށް ދާއިރު އޭގެ އެޑްވާންޓޭޖަކަށް ވާނެ. މިކަހަލަ އެކްސްޕީރިއަންސް އެމީހުން ހުންނާނެ މިދިޔަ ތިން ހަތަރު މަހެއްގެ ތެރޭގައި ކޮށްފައި ވެސް. އަޅުގަނޑުމެންގެ ކުޅުންތެރިން ވާދަވެރި މެޗުތައް ތަންކޮޅެއް ކުޑަކޮށް ދިޔައީ."