ގަތަރާއި އެމެރިކާ ގުޅިގެން ހިޒްބުﷲ އަށް ދަތިކުރަނީ

ހިޒްބުﷲ ޖަމާއަތަށް މާލީ ގޮތުން އެހީތެރިކަން ފޯރުކޮށްދޭ ކަމަށް ތުހުމަތުކުރެވޭ ގަލްފުގެ ބައެއް ވަކިވަކި ފަރުދުންނަށް ދަތިކުރުމުގެ ފިޔަވަޅުތަކެއް، އެމެރިކާ އާއި ގަތަރު ގުޅިގެން އަޅައިފި އެވެ.

އެމެރިކާ އިން ތުހުމަތުކުރާ ގޮތުގައި ދަތިކުރުމުގެ ފިޔަވަޅުތައް އެޅި މީހުންނަކީ، މާލީ ގޮތުންނާއި މާއްދީ ގޮތުން، ލުބްނާންގެ ހިޒްބުﷲ ޖަމާއަތަށް ވާގިވެރިވާ މީހުންނެވެ. އެމެރިކާ އާއި ގަތަރު ގުޅިގެން ދަތިކުރުމުގެ ފިޔަވަޅުތައް މިފަހަރު އެޅީ ހަތް މީހަކަށެވެ.

އޭގެ ތެރޭގައި ހިމެނެނީ ގަތަރާއި، ސައޫދީ އަރަބިއްޔާ އާއި ބަހްރައިންގެ އިތުރުން ފަލަސްތީނަށް ނިސްބަތްވާ މީހުންނެވެ. އޭގެ އިތުރުން ރިއަލް އެސްޓޭޓް ވިޔަފާރިކުރާ ކުންފުންޏަކާ ދެކޮޅަށް ވެސް އެމެރިކާ އާއި ގަތަރުން ދަތިކުރުމުގެ ފިޔަވަޅުތައް އެޅި އެވެ.

އެމެރިކާ އިން ބުނާ ގޮތުގައި، ހިޒްބުﷲ އާއި އެ ޖަމާއަތާ ގުޅިފައިވާ އެހެން ބައެއް މުއައްސަސާތަކަށް ކޮންމެ އަހަރަކު އެ ކުންފުނިން އެތައް މިލިއަން ޑޮލަރެއް ފޮނުވަ އެވެ. އެއީ ގަތަރުގައި ބިމުގެ ވިޔަފާރި ހިންގާ ކުންފުންޏެއް ކަމަށްވާ އައްދާރު ޕްރޮޕަޓީސް އެވެ.

ދެ ގައުމު ގުޅިގެން ދަތިކުރުމުގެ ފިޔަވަޅުތައް އެޅި މީހުންގެ ތެރޭގައި، ވިޔަފާރިވެރީގެ ދާއިރާ އިން މަޝްހޫރު އަލީ އަލް ބަންނާއީ އާއި އަލީ ލާރީ އާއި އަބްދުލް މުއައްޔިދު ހިމެނެ އެވެ. މީގެ އިތުރުން ވެސް ހަތަރު މީހަކު ހިމެނޭ ގޮތުން އެޅި މި ފިޔަވަޅުތަކުގެ ސަބަބުން، އެމެރިކާގައި ހުރި އެ މީހުންގެ ހުރިހާ ފައިސާ އާއި މުދަލެއް މިހާރު ވަނީ ހިފަހައްޓައިފަ އެވެ.

އެމެރިކާ އިން ބުނި ގޮތުގައި، ދަތިކުރުމުގެ ފިޔަވަޅުތަކުގައި ހިމެނޭ ހަތް މީހުންނާ އެކުގައި ވިޔަފާރީގެ މުއާމަލާތްތައް ހިންގުމަކީ، އެމެރިކާ ރައްޔިތުންނަށް ވަރަށް ނުރައްކާތެރި ކަމެކެވެ.

މިކަމާ ގުޅޭ ގޮތުން ގަތަރު ސަރުކާރުން ބުނީ، ހަތް މީހަކާއި އެއް ކުންފުންޏަކާ ދެކޮޅަށް ދަތިކުރުމުގެ ފިޔަވަޅުތަކެއް އަޅާފައިވާނެ ކަމަށެވެ. ނަމަވެސް އެއީ ކޮން ބައެއް ކަމެއް ގަތަރުން ނުބުނެ އެވެ.

ގަތަރު ސަރުކާރުގެ އިސް އޮފިޝަލަކު ވިދާޅުވި ގޮތުގައި، އެމެރިކާއާ ގުޅިގެން ދަތިކުރުމުގެ ފިޔަވަޅުތަކެއް އެޅީ، ގަތަރުގެ އެތެރޭގަ އާއި ސަރަހައްދީ ފެންވަރުގައި އަދި ބައިނަލްއަގުވާމީ ފެންވަރުގައި ޓެރަރިޒަމާ ދެކޮޅަށް މަސައްކަތް ކުރުމަށް އެމެރިކާއާ އެކުގައި ވެފައިވާ އެއްބަސްވުމުގެ ދަށުންނެވެ.