ލަންކާގައި ޓެރަރިސްޓް ހަމަލާއެއް ދޭން އެބައުޅޭ: އެމެރިކާ

ސްރީ ލަންކާގައި ޓޫރިސްޓުންގެ މެދުގައި މަގުބޫލު އަރުގަމް ބޭ ސަރަހައްދުގައި ޓެރަރިސްޓް ހަމަލާތަކެއް ދޭން އުޅޭ ކަމުގެ މައުލޫމާތު ލިބިފައިވާ ކަމަށާއި އެހެންވެ އެކަމަށް ސަމާލުވާން އެމެރިކާއިން އިލްތިމާސްކޮށްފި އެވެ.

އެމެރިކާގެ ސްޓޭޓް ޑިމާޓްމަންޓުން ނެރުނު ޓްރެވަލް އެޑްވައިޒަރީގައި ވަނީ ސްރީ ލަންކާއަށް އަށް ދާ އެމެރިކާ މީހުން އަރުގަމް ބޭ ސަރަހައްދަށް ނުދާން އަންގައިފަ އެވެ. އަދި މިކަމުގައި ވަކި ގޮތަކަށް އަންގަންދެން އެ ސަރަހައްދަށް ނުދާން ބުނެފައިވެ އެވެ.

ސްޓޭޓް ޑިޕާޓްމަންޓުން ބުނީ ހަމަލާއާ ގުޅޭ ގޮތުން ލިބިފައިވަނީ ވަރަށް ޔަގީން މައުލޫމާތު ކަމަށެވެ.

ދޭން އުޅޭ ކަމަށް ބުނާ ހަމަލާއާ ގުޅޭ ގޮތުން ޝައްކުވާ އެއްވެސް ކަމެއް ފެނިއްޖެ ނަމަ އެކަން ލަންކާގެ ކަމާބެހޭ އިދާރާތަކަށް ވަގުތުން ރިޕޯޓްކުރުމަށާއި ރައްކާތެރިކަމަށް ނުބެލެވޭ ތަންތަނަށް ނުދިއުމަށާއި މުއާސަލާމަތުކުރެވޭނެ ވަސީލަތެއް އަބަދުވެސް ގެންގުޅުމަށާއި ފަހުގެ މައުލޫމާތު އަބަދުވެސް ހޯދަމުން ދިއުމަށް އެމެރިކާއިން ވަނީ އެ ގައުމުގެ ރައްޔިތުންނަށް އިލްތިމާސްކޮށްފަ އެވެ.

މިކަމާ ބެހޭ ގޮތުން ސްރީ ލަންކާ ސަރުކާރުން އަދި ވާހަކައެއް ނުދައްކަ އެވެ.

އެމެރިކާއިން މި އިންޒާރު ދީފައި މި ވަނީ އަރުގަމް ބޭ ސަރަހައްދުގައި އިޒްރޭލުގެ އުފެއްދުންތައް ބޮއިކޮޓްކުރުމަށް ގޮވާލައި ސޯޝަލް މީޑިއާގައި ކެމްޕެެއިނެއް ފަށާފައި ވަނިކޮށެވެ. ސްރީ ލަންކާގައި ގިނައީ ބުޑިސްޓުން ކަމަށް ވިޔަސް އިޒްރޭލުން ފަލަސްތީނުގައި ހިންގާ ލާއިންސާނީ އަމަލުތަކާ ދެކޮޅަށް މުސްލިމުން ކުރާ މުޒާހަރާތަކުގައި އެ ގައުމުގެ ގިނަ ބަޔަކު ބައިވެރިވެ ތަރުހީބުދެ އެވެ.

ސްރީ ލަންކާގައި 2019 ވަނަ އަހަރު އީސްޓަ އާ ދިމާކޮށް ދިން ނުރައްކާތެރި ހަމަލާތަކަށް ފަހު އެ ގައުމުގައި އަދި އެ ބާވަތުގެ ހަމަލާއެއް ނުދެ އެވެ. ކްރިސްޓިއަން ފައްޅިތަކާއި ބައެއް ޓޫރިސްޓް ހޮޓާތަކަށް އެއް ވަގުތެއްގައި ދިން އެ ހަމަލާތަކުގައި 279 މީހަކު މަރުވި އެވެ. އޭގެ ތެރެއިން 45 މީހުންނަކީ ޓޫރިސްޓުންނެވެ.