ލަންކާގައި ހަމަލާދޭން އުޅުނު މައްސަލައިގައި ހައްޔަރުކުރި މީހުންގެ ތެރޭ ދިވެއްސެއްގެ ދަރިއެއް

ސްރީ ލަންކާގައި ޓޫރިސްޓުންގެ މެދުގައި މަގުބޫލު އަރުގަމް ބޭ ސަރަހައްދުގައި ހަމަލާދޭން އުޅުނު ކަމުގެ ތުހުމަތުގައި ދެ މީހަކު ހައްޔަރުކޮށްފައި ވާއިރު އޭގެ ތެރެއިން އެކަކީ ދިވެއްސެއްގެ ދަރިއެއްކަން އެނގިއްޖެ އެވެ.

ލަންކާގެ ބައެއް ނޫސްތަކުން ރިޕޯޓުކޮށްފައިވާ ގޮތުގައި، އެ ހަމަލާ ދޭން އުޅުނު ކަމުގެ ތުހުމަތުގައި، ލަންކާގެ ޓެރަރިޒަމް އިންވެސްޓިގޭޝަން ޑިވިޝަން (ޓީއައިޑީ) އިން މިއަދު ވަނީ ދެ މީހަކު ހައްޔަރުކޮށްފަ އެވެ. އެއީ ލަންކާގެ ދެމީހުންނެވެ. އެކަމަކު، އެތަނުން އެކަކަކީ ރާއްޖެ މީހެއްގެ ދަރިއެކެވެ.

އެނގިފައިވާ ގޮތުގައި، އޭނާ ބައްޕައަކީ ދިވެއްސެކެވެ. މަންމައަކީ ލަންކާ މީހެކެވެ. ނަމަވެސް އޭނާ އަކީ އެއްވެސް އިރަކު ދިވެހި އައިޑީ ކާޑެއް އަދި ޕާސްޕޯޓެއް ވެސް ހެދި މީހެއް ނޫން ކަމަށް ވަނީ އެނގިފަ އެވެ. އަދި ރާއްޖެ އަށް ވެސް ނާންނަ ކަމަށް އެނގިފައި ވެ އެވެ. އޭނާގެ ބައްޕަ އާއި މަންމަ ވަރިކޮށްފައިވާއިރު، ބައްޕަ އުޅެނީ ރާއްޖޭގައި އެހެން މީހަކާ އިނދެގެން ކަމަށް މައުލޫމާތު އެނގޭ މީހަކު ބުންޏެވެ.

ތުހުމަތުކުރެވޭ ދެމީހުންގެ މައުލޫމާތު ލަންކާގެ ޓީއައިޑީއާ ހިއްސާކުރީ އިންޑިއާގެ އިންޓެލިޖެންސް އެޖެންސީން ކަމަށް ވެސް ރިޕޯޓްތައް ބުންޏެވެ.

އަރުގަމް ބޭ ސަރަހައްދުގައި މިހާރު ދަނީ ސިފައިންނާއި ފުލުހުން ހަތިޔާރާ އެކު ސަލާމަތީ ކަންކަން ބަލަހައްޓަމުންނެވެ. ފުލުހުން ބުނީ އެ ސަރަހައްދުގައި އިޒްރޭލު ބަޔަކު ހިންގާ "ޗަބާދް ހައުސް" ކިޔާ ތަނަކަށް ހަމަލާ އަމާޒުކުރާނެ ކަމުގެ މައުލޫމާތު ލިބިފައި ވާތީ އެތަން ބަލަހައްޓަމުން އަންނަ ކަމަށެވެ. ފުލުހުންގެ ތަރުޖަމާނު ނިހާލް ތަލްދޫވާ އޭއެފްޕީއަށް ވިދާޅުވެފައިވާ ގޮތުގައި މުސްލިމުން ގިނަ އަރުގަމް ބޭ ސަރަހައްދުގައި، ޗަބަދް ހައުސް އަށް ދާ އިޒްރޭލު ޓޫރިސްޓުންނާއި މުސްލިމުންނާ ދެމެދު މި ފަހުން ކުރިމަތިލުންތައް ހިނގާފައިވާ ކަމަށެވެ.

ހަމަލާދޭން އުޅޭ ކަމުގެ މައުލޫމާތު އެންމެ ކުރިން ދީފައިވަނީ އެމެރިކާގެ ސްޓޭޓް ޑިޕާޓްމަންޓުންނެވެ. އެއީ އިޒްރޭލު މީހުންނަށް އަމާޒުކޮށް ދޭން އުޅުނު ހަމަލާއެއް ކަމަށް ވެސް އެމެރިކާއިން ބުނެފައިވެ އެވެ. އެހެންވެ، ލަންކާއަށް ދާ އެމެރިކާ މީހުން ސަމާލުވާން ވަނީ އަންގައިފަ އެވެ.

އެމެރިކާގެ ސްޓޭޓް ޑިމާޓްމަންޓުން ނެރުނު ޓްރެވަލް އެޑްވައިޒަރީގައި ވަނީ ލަންކާއަށް ދާ އެމެރިކާ މީހުން އަރުގަމް ބޭ ސަރަހައްދަށް ނުދާން އަންގައިފަ އެވެ. އަދި އެކަމުގައި ވަކި ގޮތަކަށް އަންގަންދެން އެ ސަރަހައްދަށް ނުދާން ބުނެފައިވެ އެވެ.

އެމެރިކާއިން މި އިންޒާރު ދީފައި ވަނީ އަރުގަމް ބޭ ސަރަހައްދުގައި އިޒްރޭލުގެ އުފެއްދުންތައް ބޮއިކޮޓްކުރުމަށް ގޮވާލައި ސޯޝަލް މީޑިއާގައި ކެމްޕެެއިނެއް ފަށާފައި ވަނިކޮށެވެ. ސްރީ ލަންކާގައި ގިނައީ ބުޑިސްޓުން ކަމަށް ވިޔަސް އިޒްރޭލުން ފަލަސްތީނުގައި ހިންގާ ލާއިންސާނީ އަމަލުތަކާ ދެކޮޅަށް މުސްލިމުން ކުރާ މުޒާހަރާތަކުގައި އެ ގައުމުގެ ގިނަ ބަޔަކު ބައިވެރިވެ ތަރުހީބުދެ އެވެ.