ވ. އަތޮޅާ އެކު ރާއްޖޭގެ ހުރިހާ އަތޮޅެއްގައި އޭ ލެވެލް އަށް ކިޔަވައިދޭން ފަށައިފި

ރާއްޖޭގައި އެންމެ މީހުން މަދު އަތޮޅު، ވ. އަތޮޅާ އެކު ހުރިހާ އަތޮޅެއްގައި އޭ ލެވެލް އަށް ކިޔަވައިދޭން ފަށައިފި އެވެ.

މަތީ ސާނަވީ ޕޮލިސީއަށް މި ފަހުން ގެނައި ބަދަލުގައިވާ ގޮތުން ދަރިވަރުން މަދު ނަމަވެސް ސްކޫލުގައި ވަސީލަތްތައް ހުރި ނަމަ، އެޑިއުކޭޝަން މިނިސްޓްރީގެ ހުއްދައާ އެކު އޭ ލެވެލްއަށް ކިޔަވައިދޭން ފެށޭނެ އެވެ. އެހެންވެ، މި ފަހަރު ތިން ސްކޫލެއްގައި އޭ ލެވެލްއަށް ކިޔަވައިދޭން ފަށާފައިވެ އެވެ.

އެ އުސޫލު ކުރިން އޮތް ގޮތުން އޭލެވެލް ފެށޭނީ 10 ކުދިންނަށް ވުރެ ގިނައިން ތިބޭ ނަމަ އެވެ.

އަލަށް އޭ ލެވެލް ފެށީ ގއ. ދާންދޫ، އއ. ތޮއްޑޫ އަދި ވ. ކެޔޮދޫ ސްކޫލުގަ އެވެ. އެ ސްކޫލުތަކާއެކު މި ވަގުތު 34 ސްކޫލެއްގައި، މިދިޔަ އާދިއްތަ ދުވަހުން ފެށިގެން އަންނަނީ އޭ ލެވެލް ކިޔަވައިދެެމުންނެވެ.

ކެޔޮދޫ ސްކޫލުގެ ޕްރިންސިޕަލް ޒައިމާ ހުސެއިން "މިހާރު" އަށް ވިދާޅުވީ އެ ސްކޫލުގައި އޭ ލެވެލް ފެށުމަކީ ދަރިވަރުންނަށް އަދި ރަށުގެ އާއްމުންނަށް ވެސް ލިބުނު ވަރަށް ބޮޑު ލުއެއް ކަމަށެވެ. އަތޮޅުގެ އެހެން ރަށެއްގައި ވެސް އޭ ލެވެލް ކިޔަވައިނުދޭތީ، އޯ ލެވެލް ނިންމުމަށް ފަހު މީގެ ކުރިން ގިނަ ދަރިވަރުން އާއިލާއާއެކު ބަދަލުވަނީ މާލެއަށް ކަމަށް އޭނާ ވިދާޅުވި އެވެ.

"ބޮޑު ހަރަދެއް ކޮށްފައި އާއިލާއާ އެކު މާލެ މި ބަދަލުވަނީ މަތީ ސާނަވީއަށް. ރަށުގައި 11 ފެށީމަ ވަރަށް ބޮޑު ލުއެއް ލިބިގެންދާނެ އެންމެންނަށް ވެސް،" 800 އަށްވުރެ ގިނަ މީހުން ދިރިއުޅޭ ރަށުގެ ސްކޫލު ޕްރިންސިޕަލް ވިދާޅުވި އެވެ.

ކެޔޮދޫ ސްކޫލުން މިދިޔަ މެއި/ޖޫން މަހު އޯ ލެވެލް ހެދީ ނުވަ ދަރިވަރުންނެވެ. އޭގެ ތެރެއިން 75 ޕަސެންޓު ދަރިވަރުން ފަސް މާއްދާއަށް ވުރެ ގިނަ މާއްދާއިން ފާސްވި އެވެ. އޭ ލެވެލް ފެށީ އެ ތަނުން ހަ ދަރިވަރުންނާއެކުގަ އެވެ.

ފައުންޑޭޝަނުން ފެށިގެން ގްރޭޑު 11 އަށް ކިޔަވައިދޭ ކެޔޮދޫ ސްކޫލުގައި މި ވަގުތު 212 ދަރިވަރުން އެބަތިއްބެވެ.