އޭ ލެވެލް އިމްތިހާނުގެ ނަތީޖާ ދޫކުރަން ފަށައިފި

މިދިޔަ އޮކްޓޯބަރު/ނޮވެމްބަރު މަހު ބޭއްވި އޭ ލެވެލް އިމްތިހާނުގެ ނަތީޖާ ދޫކުރަން ފަށައިފި އެވެ.

ޑިޕާޓްމަންޓް އޮފް ޕަބްލިކް އެގްޒަމިނޭޝަނުން ބުނީ މިއަދުން ފެށިގެން އިމްތިހާނު ސެންޓަރުތަކުން ދަރިވަރުންގެ ނަތީޖާ ލިބޭނެ ކަމަށެވެ.

އެ އިމްތިހާނުގައި 2،700 ދަރިވަރުން ބައިވެރިވި އެވެ.

އެޑެކްސެލް އިމްތިހާނު އެންމެ ފުރަތަމަ ބޭއްވީ މިދިޔަ އަހަރުގެ އޭޕްރީލް މަހުގެ ތެރޭގަ އެވެ. ނަމަވެސް ގިނަ ކަރުދާސްތަކެއް ލީކުވަމުން ދިއުމުގެ ސަބަބުން އެޑިއުކޭޝަން މިނިސްޓްރީން ނިންމީ އެ އިމްތިހާނު ކެންސަލް ކުރުމަށް ފަހު، މިދިޔަ އޮކްޓޯބަރު/ނޮވެމްބަރު އިންޓޭކުގައި އޭ ލެވެލް އިމްތިހާނު ކުރިއަށް ގެންދާށެވެ.

އެކަމަކު، އޭގެ ކުރިން މިދިޔަ މެއި/ޖޫން ހިސާބުގައި އިސްލާމާއި ދިވެހި މާއްދާގެ އިމްތިހާނު ބޭއްވި އެވެ.

އިމްތިހާނު ފަސްވަމުން ދިއުމުގެ ސަބަބުން އެޑިއުކޭޝަން މިނިސްޓްރީން ދެ ގޮތެއް ކުދިންނަށް އިހުތިޔާރުކުރަން ދިނެވެ. އެއީ އޭ ލެވެލް ހަދަން ބޭނުންވާ ކުދިންނަށް އެ ފުރުސަތު ދިނުމާއި ޓީޗާ ބޭސްޑު އެސެސްމަންޓެއް ހަދައި ކިޔެވުން ނިންމާލުމަށެވެ.

އެ ފުރުސަތުގައި 14 ސްކޫލަކުން 74 ދަރިވަރަކު ވަނީ ޓީޗާ ބޭސްޑު އެސެސްމަންޓެއް ހެދި އެވެ.