ގައުމީ އަންހެން ފުޓުބޯޅަ ޓީމު ފުޑް ޕޮއިޒަންވެ ބޮޑު ދެރައެއް

އޭއެފްސީ ވިމެންސް އޭޝިއަން ކަޕް ކޮލިފައިންގައި ވާދަކުރަން ރާއްޖޭގެ އަންހެން ގައުމީ ފުޓުބޯޅަ ޓީމު ތަޖިކިސްތާނަށް ކުރި ދަތުރުގައި ޓީމުގެ ކުޅުންތެރިންނާ އޮފިޝަލުން ފުޑް ޕޮއިޒަންވެފައިވާ ކަމަށް ޓީމުގެ ހެޑު ކޯޗުގެ މަގާމާ ހަވާލުވެ ހުރި އެފްއޭއެމްގެ ޓެކްނިކަލް ޑިރެކްޓާ އަހްމަދު ޝަރީފް (ޑުންގާ) ބުނެފި އެވެ.

ކޮލިފައިންގައި ރާއްޖެ ކުޅޭ ފަހު މެޗުގެ ކުރިން "މިހާރު" އާ ވާހަކަ ދައްކަމުން ޑުންގާ ބުނީ ޓީމު ތަޖިކިސްތާނަށް އައި ގޮތަށް ފުޑްޕޮއިޒަންވެ، ފުރަތަމަ މެޗަށް ނުކުތް އިރު ވެސް ކުޅުންތެރިންގެ ހާލަތު ރަނގަޅު ނުވާ ކަމަށެވެ.

"ޓީމުތެރޭގައި ވަރަށް ބޮޑަށް ވައިރަލް ފީވާ އަދި ރޯގާ ވަނީ ފެތުރިފައި. މިތަނަށް އައިގޮތަށް ފުޑް ޕޮއިޒަން ވެއްޖެ މުޅި ޓީމު. އަޅުގަނޑު ވެސް ޕޮއިޒަންވެފައި. އަދިވެސް ލޫސް މޯޝަންގައި،" ޑުންގާ ބުންޏެވެ.

"ދަނޑުމަތީގައި ހަމަ ވަރަށް ދަށްކޮށް ދިޔައީ. ކުޅެން ތިބެފައި އެބަ ޖެހޭ ފާހާނާއަށް ދާން. އެކަމު އެ ހުރިހާ ކަމެއް ޗެލެންޖަކަށް ނަަގައި، ކުޅުންތެރިން ކުރި މަސައްކަތަށް ސާބަސް ދެން އަހަރެން،" ކޮލިފައިންގެ ފުރަތަމަ މެޗާ ބެހޭގޮތުން ޑުންގާ ބުންޏެވެ.

"(މިރޭގެ މެޗަށް ނުކުންނައިރު) ވިއެޓްނާމް މެޗުގެ އަސަރު ހުންނާނެ ދެއްތޯ. އެއީ ވަރަށް ތަފާތު ބޮޑު ނަތީޖާއެއް. ނަމަވެސް މިރޭގެ މެޗުން ރަގަޅު ނަތީޖާއަކަށް މި އުންމީދު ކުރަނީ، އަދި މަސައްކަތް ވެސް ކުރާނެ މި ކުދިން."

މިރޭ ތަޖިކިސްތާނުގައި އެ ގައުމުގެ އަންހެން ފުޓުބޯޅަ ޓީމާ ދެކޮޅަށް ކުޅޭ މެޗަކީ ރާއްޖޭން ތަޖިކިސްތާނާ ދެކޮޅަށް ނުކުންނަ ފުރަތަމަ މެޗެވެ. އެ ގައުމުން ވަނީ ކޮލިފައިން އަށް ތައްޔާރުވާން ސިންގަޕޫރާ ދެކޮޅަށް ރަހުމަތްތެރިކަމުގެ މެޗެއް ކުޅެފަ އެވެ. މިމަހު 20 ވަނަ ދުވަހު ކުޅުނު މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ.

ރާއްޖޭގެ ގައުމީ އަންހެން ފުޓުބޯޅަ ޓީމުން ވަނީ 2019 ވަނަ އަހަރުގެ ފަހު ކޮޅު އޮތް ސައުތު އޭޝިއަން ގޭމްސް އަށް ފަހު، ކޮލިފައިންގެ ކުރިން ވާދަވެރި ސިފައެއްގައި މެޗެއް ކުޅުނީ މިދިޔަ މަހު ޔޫއޭއީއާ ދެކޮޅަށް ކުޅުނު ދެ މެޗު އެކަންޏެވެ.

އެގާރަ އަހަރަށް ފަހު އޭޝިއަން ކަޕް ކޮލިފައިންގައި ރާއްޖޭގެ ގައުމީ އަންހެން ޓީމު ވާދަކުރާއިރު ތަޖިކިސްތާނަށް ދިޔަ ޓީމަކީ ނިސްބަތުން ޒުވާން ޓީމެކެވެ. ތަފާތު ސަބަބުތަކާ ހުރެ ކޮލިފައިންގެ ފުރަތަމަ މެޗުގެ ނަތީޖާ ދަށްކޮށް ދިޔަ ނަމަވެސް ޓީމުގެ މުސްތަގުބަލް ރަނގަޅު ވާނެކަމަށް ޑުންގާ ބުންޏެވެ.

"ޓީމުގައި އެބަތިބި އަލަށް ގައުމުން ބޭރަށް ދަތުރުކުރި ކުދިން ވެސް. މިތާނގެ (ތަޖިކިސްތާނުގެ) މޫސުން މި ކުދިންނަށް ވަރަށް އުނދަގޫވި. މިއީ އަސްލު ޑިވެލޮޕްމަންޓް ސްޓޭޖަކުން ފަށައިގެން މި އުޅެނީ. އިރާދަ ކުރެއްވިއްޔާ މުސްތަގްބަލް ރަނގަޅު ވާނެ."

ތަޖިކިސްތާނާ ދެކޮޅަށް ކުޅޭ މެޗު ފެށުމަށް ހަމަޖެހިފައި ވަނީ ރާއްޖެ ގަޑިން މިރޭ އިރުއޮއްސި 6 ޖަހާއިރެވެ.