ހަތަރުމަސް ފަހުން ދުވާފަރުގެ މޮނިޓަރިން އުވާލައިފި

ކޮވިޑް ފެތުރޭތީ ރ. ދުވާފަރު ބަންދުކޮށްފައި އޮންނަތާ ހަތަރު މަސް ފަހުން މިއަދު މޮނިޓަރިން އުވާލައިފި އެވެ.

ކޮވިޑް-19 އަށް ބަޔަކު ޕޮޒިޓިވްވުމުން، އެ ރަށަށް އަރައި ފޭބުން މަނާކުރީ މިދިޔަ މެއި މަހުގެ 25 ގަ އެވެ. އެއަށްފަހު، މިދިޔަ ދުވަސްތަކުގައި ދުވާފަރުން 1،038 މީހުން ޕޮޒިޓިވްވެ، އެ ބަލީގައި އަށް މީހަކު މަރުވެފައިވެ އެވެ.

މޮނިޓަރިން އުވާލި އިރު ވެސް މި ވަގުތު ކޮވިޑް ބަލީގެ 25 މީހުން އެ ރަށުގައި އެބަތިއްބެވެ.

ދުވާފަރު ކައުންސިލްގެ މެމްބަރު މުހައްމަދު ޝާމް ވިދާޅުވީ މޮނިޓަރިންގެ ހާލަތުން ނެގީ ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ލަފާގެ މަތިން ރެންޑަމް ސާމްޕަލް ނަގައި އެ ހުރިހާ ސާމްޕަލެއް ނެގެޓިވްވުމުން ކަމަށެވެ.

ދުވާފަރަކީ، މި ފަހުން މޮނިޓަރިންގައި އެންމެ ގިނަ ދުވަސްވަންދެން އޮތް ރަށެވެ. މި ވަގުތު ވެސް ކޮވިޑް ފެތުރޭތީ 16 ރަށަކަށް އަރައި ފޭބުން މަނަލެވެ.

ޝާމް ވިދާޅުވީ އެތައް ބަޔަކު ޕޮޒިޓިވްވިޔަސް ގިނައީ ޑައިރެކްޓު ކޮންޓެކްޓުވެގެން ޕޮޒިޓިވްވި މީހުން ކަމަށެވެ. އޭގެ ސަބަބެއް ގަބޫލުކުރެވެނީ، ގިނަ ބަޔަކު ތޮއްޖެހިގެން ދިރިއުޅެންޖެހުމެވެ.

"ރައްކާތެރިކަމުގެ ފިޔަވަޅުތަކަށް ބޯލަނބައި ފާއިތުވި ދުވަސްތަކުގައި މި އުޅުނީ. ބަލީގެ ހާލަތު ގޯސްނުވެ ކޮންޓްރޯލްވެގެން މި ދިޔައީ އެހެންވެ،" ޝާމް ވިދާޅުވި އެވެ.

މޮނިޓަރިންގެ ހާލަތުން ނެގިއަސް މާސްކުއަޅައި ގައިދުރުކަން ބަހައްޓައިގެން އުޅެން ދުވާފަރު ކައުންސިލުން އެދެ އެވެ.

ރ. އަތޮޅުގައި އެންމެ އާބާދީ ބޮޑު ރަށުގެ 87 ޕަސެންޓު މީހުން ވަނީ ވަނީ ވެކްސިންގެ ފުރަތަމަ ޑޯޒު ޖަހައިފަ އެވެ. ދެ ވަނަ ޑޯޒު ފުރިހަމަކުރީ 48 ޕަސެންޓު މީހުންނެވެ.