ދުވާފަރު ލޮކްޑައުންކޮށް ހުރިހާ ގެޔަކުން ކޮވިޑަށް ސާމްޕަލް ނަގަނީ

ރ. ދުވާފަރުން ކޮވިޑް-19 ގެ ކޭސްތައް ފެންނަމުންދާތީ ބަލި ކޮންޓްރޯލް ކުރުމަށް މާދަމާ އިން ފެށިގެން 24 ގަޑިއިރުގެ ކާފިއުއެއް އިއުލާންކޮށް، ރަށް ލޮކްޑައުން ކުރުމަށް އެ ރަށު ޓާސްކް ފޯހުން މިއަދު ނިންމައިފި އެވެ.

ދުވާފަރު ކައުންސިލްގެ ނައިބް ރައީސް އިޒްމީލް އަހުމަދު ސޮއިކުރައްވައި ނެރުއްވި އިއުލާނުގައި ބުނެފައިވާ ގޮތުގައި އެރަށުގައި 24 ގަޑިއިރުގެ ކާފިއުއެއް ހިންގަނީ އެއް ހަފުތާއަށެވެ.

އެ ފިޔަވަޅަކީ އެރަށުގައި މިވަގުތު ބަލި ފެތުރިފައި އޮތް މިންވަރު ކުޑަކޮށް ބަލި ފެތުރުން ކޮންޓްރޯލް ކުރުމަށް އަޅާފައިވާ މުހިއްމު ފިޔަވަޅެއް ކަމަށް އިއުލާނުގައި ބުނެފައިވެ އެވެ.

އެ އިއުލާނުގައި ބުނި ގޮތުގައި އެ މުއްދަތުގެ ތެރޭގައި ރަށުގެ ހުރިހާ ގެއަކަށް ގޮސް ކޮވިޑް ސާމްޕަލް ނަގާނެ އެވެ. އެހެންވެ، ރައްޔިތުންގެ އެއްބާރުލުން ދިނުމަށް ވަނީ އެދިފަ އެވެ.

ދުވާފަރުގައި 24 ގަޑިއިރަށް ކާފިއު ހިންގި ނަމަވެސް ވިޔަފާރިކުރުމަށް ކޮންމެ ގެއަކަށް ވެސް ފާހެއް ދޫކުރާނެ އެވެ. އަދި ފާސް ލިބޭ މީހުންނަށް ހެނދުނު 8:00 އާއި މެންދުރު 12:00 އާ ދެމެދު ވިޔަފާރި ކުރުމަށް ނުކުމެވޭނެ އެވެ. އެ ނޫން ވަގުތުތަކުގައި ވިޔަފާރިތަކުން ޑެލިވަރީގެ ހިދުމަތް ދޭނެ އެވެ. އަދި ޒަރޫރީ ބޭނުމެއްގައި ގެއިން ބޭރަށް ނުކުންނަ ނަމަ ފުލުހުންގެ ހުއްދަ ހޯދަން ޖެހެ އެވެ.

ދުވާފަރު ހެލްތު ސެންޓަރުގެ ސީނިއާ އެޑްމިނިސްޓްރޭޓަރު، އާމިރު އަހުމަދު "މިހާރު" އަށް ވިދާޅުވި ގޮތުގައި މިވަގުތު އެރަށުގައި ކޮވިޑް ޖެހިފައި ތިބީ 54 މީހަކަށެވެ. އޭގެ ތެރޭގައި ހައި ރިސްކް މީހުން ވެސް ހިމެނެ އެވެ.

މާލެ ދަތުރުކުރާ ބޯޓެއްގެ ފަޅުވެރިއެއްގެ ކިބައިން ކޮވިޑްގެ އަލާމާތް ފެނިގެން ނެގި ސާމްޕަލުން އެ މީހާ ޕޮޒިޓިވްވެ، ދުވާފަރަށް އަރައިފޭބުން މަނާކުރީ މިދިޔަ މަހުގެ 25 ވަނަ ދުވަހު އެވެ. އާމިރު ވިދާޅުވީ، ރަށް މޮނިޓަރިންގައި އޮންނަތާ މަސް ދުވަސްވީއިރު 80 އަށް ވުރެ ގިނަ ގެ މިވަގުތު ވެސް ކަރަންޓީނުކޮށްފައިވާ ކަމަށެވެ.

އެ ރަށުން ފްލޫ އަދި ރެންޑަމް ސާމްޕަލް ވެސް ނަގަމުން އަންނައިރު ފިޔަވަޅުތައް މި ވަރުގަދަ ކުރީ ރެންޑަމް ސާމްޕަލެއްގެ އިތުރުން ރޯގާގެ އަލާމާތް ހުރެގެން ނަގާ ބައެއް ސާމްޕަލްތައް ވެސް ޕޮޒިޓިވްވަމުންދާތީ އެވެ.

ދުވާފަރުގައި އެންމެ ފުރަތަމަ ކާފިއު ހިންގަން ފެށީ ރޭގަނޑު 9:00 އިން ފަތިހު ހަތަކަށެވެ. ފަހުން ބަދަލުކުރީ ހަވީރު ހަތަރަކުން ފަތިހު ހަތަރަކަށެވެ. އެކަމަކު ބަލި ކޮންޓްރޯލް ކުރެވޭ ކަމަށް ނުފެންނާތީ 24 ގަޑިއިރަށް ކާފިއު ބަދަލުކުރީ އެވެ.

އާމިރު ވިދާޅުވީ 24 ގަޑިއިރު ކާފިއު ހިންގަނީ މީހުން ގެއިން ބޭރަށް ނުކުތުން މަދުކުރުމަށް ކަމަށެވެ. އަދި އެ މުއްދަތުގައި އެރަށުގައި ބަލި ފެތުރިފައި އޮތް މިންވަރު ދެނެގަނެވޭނެ ކަމަށް އޭނާ ވިދާޅުވި އެވެ. އަދި ރަށުގެ މޮނިޓަރިން ދިގުލައިގެންދާ ނަމަ، އޭގެ ގެއްލުން ރައްޔިތުންނަށް ލިބޭނެތީ އިދާރާތަކުގެ އެންގުންތަކަށް ބޯލަނބާ އެއްބާރުލުން ދިނުމަށް އޭނާ އެދިވަޑައިގަތެވެ.