ކޮވިޑުގައި ހާލު ދެރަވި މީހަކު އިތުރު ފަރުވާއަށް ގެންދިއުން ލަސްވެ، ނިޔާވުމުން ދުވާފަރުގައި މުޒާހަރާކުރަނީ

ރ. ދުވާފަރުގައި ކޮވިޑް-19 ގައި ހާލު ދެރަވި މީހަކު އިތުރު ފަރުވާއަށް ގެންދިއުން ލަސްވެ، ނިޔާވުމުން އެކަމާ ހިތްހަމަނުޖެހި ހެލްތު ސެންޓަރު ކުރިމަތީގައި މި ރޭ މުޒާހަރާކުރަން ފަށައިފި އެވެ.

އެ ރަށު ކައުންސިލްގެ މެމްބަރަކު ވިދާޅުވީ ކޮވިޑުގައި ހާލު ދެރަވި އަންހެނަކު އިރުއޮއްސުނުއިރު ހެލްތު ސެންޓަރަށް ގެންދިޔަ ކަމަށެވެ. އެ މީހާގެ އޮކްސިޖަން ލެވަލް ދަށްވާތީ، ބ. އޭދަފުށީގައި ހުންނަ ރީޖަނަލް ފެސިލިޓީއަށް ގެންދަން ދަތުރު ހަމަޖައްސައިދިނުމަށް ހެލްތު ސެންޓަރުން އެދުނެވެ. ނަމަވެސް ޕްރޮސެސް ފުރިހަމަވެ، އެ ރަށަށް ލޯންޗު ދިޔައީ އެކަމަށް އެދުނުތާ އެއް އެއްގަޑިއިރު ފަހުން ކަމަށް އޭނާ ވިދާޅުވި އެވެ.

"ލޯންޗު އައި އިރު ބަލި މީހާ ނިޔާވެއްޖެ. އެ ހިތްހަމަނުޖެހުންތަކާ ގުޅިގެން މުޒާހަރާ ކުރަން އެ ފެށީ،" އެ މެމްބަރު ވިދާޅުވި އެވެ.

ދުވާފަރަކީ ރ. އަތޮޅުގައި އެންމެ ގިނަ މީހުން ދިރިއުޅޭ ރަށެވެ. އެ ރަށުގެ އާބާދީ 5،000 އަށްވުރެ ގިނަޔަސް އެކަށީގެންވާ ސިއްހީ ފަރުވާ ނުލިބޭ ކަމުގެ ޝަކުވާތައް ކައުންސިލުން ވަނީ ކޮށްފަ އެވެ. އެ ކައުންސިލަރު ވެސް ވިދާޅުވީ ރަށުން އެކްސްރޭއެއް އަދި އަލްޓްރާ ސައުންޑް ސްކޭނެއް ވެސް ހެދެން ނެތް ކަމަށެވެ.

"އަޅުގަނޑުމެން ވަރަށް ކަންބޮޑުވޭ އާބާދީ ބޮޑު ރަށެއްގައި ރަނގަޅު ސިއްހީ ފަރުވާ ދެވެން ނެތީމަ. ކުރީގެ ކައުންސިލުން ވެސް މި ޝަކުވާތައް ކަމާބެހޭ އިދާރާތަކަށް ހިއްސާކުރި. އެކަމަކު އަދި އެއްވެސް ބަދަލެއް ނާދޭ،" އޭނާ ވިދާޅުވި އެވެ.

ކޮވިޑުގެ ކޭސްތަކަކާ ގުޅިގެން މިދިޔަ މެއި 25 އިން ފެށިގެން ދުވާފަރު އޮތީ މޮނިޓަރިންގެ ހާލަތުގަ އެވެ. މި ވަގުތު ވެސް އެ ރަށުގައި ކޮވިޑަށް ޕޮޒިޓިވް 170 އަށްވުރެ ގިނަ މީހުން އެބަތިއްބެވެ. އެ ބަލީގައި އެ ރަށުން ހަތަރު މީހަކު ނިޔާވެފައިވެ އެވެ.