ދުވާފަރު މޮނިޓަރިންގައި ތިން މަސް؛ 740 މީހަކަށް ކޮވިޑް ޖެހިއްޖެ

ކޮވިޑް-19 ފެނިގެން މިދިޔަ މެއި މަހު މޮނިޓަރިންގެ ހާލަތަށް ގެނެސްފައިވާ ރ. ދުވާފަރުން މިހާތަނަށް ކޮވިޑް ޖެހުނު މީހުންގެ އަދަދު 745 އަށް އަރައިފި އެވެ.

ކޮވިިޑް ފެތުރެތީ ދުވާފަރު ބަންދުކުރީ މެއި މަހުގެ 25 ގަ އެވެ. ތިން މަސްވާން ގާތްވެފައިވާއިރު މިހާތަނަށް އެރަށުން ބަލި ޖެހުނު 745 މީހުންގެ ތެރެއިން 155 މީހަކު އަދިވެސް ބަލިން ރަނގަޅު ނުވެ އެބަ ތިއްބެވެ.

ދުވާފަރު ހެލްތު ސެންޓަރުގެ މެނޭޖަރު އާމިރު އަހުމަދު، "މިހާރު" އަށް ވިދާޅުވި ގޮތުގައި ކޮންމެ ތިން ދުވަހަކުން އުނގޫފާރުން އެރަށަށް މެޑިކަލް ޓީމެއް ގޮސް، ހައި ރިސްކް ބަލި މީހުންނަށް ޒިޔާރާތް ވެސް ކުރެ އެވެ. ބަލި ޖެހިފައިވާ މީހުންގެ ތެރޭގައި މިވަގުތު ތިބީ ހައި ރިސްކް 27 މީހަކު ކަމަށް އޭނާ ވިދާޅުވި އެވެ.

އާބާދީ 5،000 އަށްވުރެ ބޮޑު ދުވާފަރުން ބަލި ޖެހުނު މީހުންގެ ތެރެއިން ކުޑަކުއްޖަކާއި އިތުރު ބަލި މީހަކަށް އޭދަފުށީ މެޑިކަލް ފެސިލިޓީގައި ވެސް ފަރުވާ ދެމުން ގެންދެ އެވެ. އަދި ހުޅުމާލޭ މެޑިކަލް ފެސިލިޓީ އާއި ދަރުމަވަންތަ ހޮސްޕިޓަލުގައި ވެސް ފަރުވާދެމުން އަންނަ ކަމަށް އާމިރު ވިދާޅުވި އެވެ.

ދުވާފަރުގެ 60 ވަރަކަށް ގެ މިވަގުތު ވެސް ކަރަންޓީނުގައި އޮތްއިރު އަދިވެސް ރަށުގެ ހާލަތަށް މާބޮޑު ބަދަލެއް ނާންނަ ކަމަށް އާމިރު ވިދާޅުވެ އެވެ. އޭނާ ވިދާޅުވީ، އިއްޔެ ނަތީޖާ ލިބުނު ސާމްޕަލްތަކުން އެއްވެސް މީހަކު ބައްޔަށް ޕޮޒިޓިވްވެފައި ނުވިޔަސް އަދިވެސް 127 ސާމްޕަލެއް ޕެންޑިންގައި އެބަ ހުއްޓެވެ.

ކޮވިޑާ ގުޅިގެން ގިނަ ފިޔަވަޅުތަކެއް ވެސް ދުވާފަރުގައި ވަނީ އަޅައިފަ އެވެ. ހެނދުނު ހަތަރަކުން ފަތިހު ހަތަރަކަށް ކާފިއު ހިންގަމުން އަންނައިރު އެނޫން ވަގުތުތަކުގައި ބޭރަށް ނިކުމެވެނީ ޒަރޫރީ ކަންކަމުގައި އެކަންޏެވެ. އަދި ކެފޭ/ ހޮޓާތައް ވެސް ބަންދުކޮށްފައި އޮތްއިރު ޕާކުތައް ވެސް ބަންދުކޮށް، އެއްވެ އުޅުން ވެސް މަނާކޮށްފައިވާ ކަމަށް އާމިރު ވިދާޅުވި އެވެ.

މި ހުރިހާ ފިޔަވަޅުތަކުގެ ސަބަބުން ގިނަ ބަޔަކަށް ދަތިވެފައިވާ ކަމަށާއި އެކަމަކު މިވަގުތު ބަލިން އަރައިގަނެވެން އޮތީ މި ފިޔަވަޅުތަކަށް ބޯލަނބައިގެން ކަމަށް އޭނާ ވިދާޅުވި އެވެ. ނޫން ނަމަ ފުލް ލޮކްޑައުންއަކަށް ދާންޖެހިދާނެ ކަމަށް ވެސް އޭނާ ވިދާޅުވި އެވެ.

"އެއްބަޔަކު މަސައްކަތްކޮށްގެނެއް ނުވާނެ ރަނގަޅެއް. މިއޮތީ ކޮންމެ ގޮތަކުން ވިޔަސް ބަލި ރަށަށް އައިސްފަ. އެހެންވީމަ އެންމެން ގުޅިގެން މިކަމުން އަރައިގަނެވޭނީ. އެންމެނަށް ވެސް ފިޔަވަޅު އަޅާފަ އޮތީމަ އުނދަގޫވާނެކަން އެނގޭ،" އާމިރު ވިދާޅުވި އެވެ.

މުޅި ރާއްޖެއަށް ބަލާއިރު ކޮވިޑްގެ ހާލަތު ޖުމްލަ ގޮތެއްގައި މި ވަގުތަށް ފެންނަނީ ވަރަށް ބޮޑަށް ކޮންޓްރޯލް ވެފައި ވާތީ އެވެ. ކުރިން ހާލަތު އެންމެ ގޯސްކޮށް އޮތް މާލޭން ވެސް މިހާރު ކޮންމެ ދުވަހަކު ފެންނަ ކޭސްތަކުގެ އަދަދު ވަނީ ވަރަށް ބޮޑަށް ދަށްވެފަ އެވެ. މިހާތަނަށް މުޅި ރާއްޖޭން ކޮވިޑް ޖެހުނީ 79،000 މީހަކަށެވެ. އޭގެ ތެރެއިން 77,031 މީހަކު ރަނގަޅުވެފައި ވާއިރު ބަލީގައި މަރުވީ 222 މީހެކެވެ.