މޮނިޓަރިންގައި އޮތް ރަށްތަކުން 60 ޕަސެންޓަށް ވެކްސިން ނުދެވެނީ ދުވާފަރުގައި އެކަނި، ފުރާއިރު ޓެސްޓްކުރަން ޖެހޭނެ

ކޮވިޑް ފެތުރޭތީ މިވަގުތު 11 ރަށެއް ބަންދުކޮށްފައި އޮތްއިރު އޭގެ ތެރެއިން ރަށުގެ ވެކްސިން ޖެހޭ އާބާދީގެ 60 ޕަސެންޓް މީހުންނަށް ކޮވިޑް ވެކްސިން ފުރިހަމަ ނުކުރެވި އޮތް ހަމައެކަނި ރަށަކީ ރ. ދުވާފަރު ކަމަށް އެޗްޕީއޭގެ ތަފާސްހިސާބުތަކުން ދައްކައިފި އެވެ.

ރަށުގެ އާބާދީގެ 60 ޕަސެންޓް މީހުންނަށް ވެކްސިން ދެވެންދެން، ރަށުން ފުރާ މީހުންގެ ސާމްޕަލް ނެގުމަށް އެޗްޕީއޭ އިން އިލްތިމާސްކުރެ އެވެ. އެންމެ ފަހުން މޮނިޓަރިން އުވާލި، ހއ. ދިއްދޫއަށް ޑިރެކްޓާ ޖެނަރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއިކުރައްވައި ފޮނުއްވި ލިޔުމުގައި ވަނީ އެރަށުގެ އާބާދީގެ 60 ޕަސެންޓް މީހުނަށް ވެކްސިން ދެވެންދެން އެގޮތަށް އަމަލުކުރުމަށެވެ.

ރަށްރަށުން ވެކްސިން ޖަހާފައިވާ އާބާދީގެ ނިސްބަތް އެޗްޕީއޭ އިން އާންމުކޮށްފައިވާއިރު އޭގައިވާ ގޮތުން ދުވާފަރު ފިޔަވައި، ދެން މޮނިޓަރިންގައި އޮތް ހއ. ތަކަންދޫ، ށ. ފޯކައިދޫ، ށ. ފީވައް، ކ. ކާށިދޫ، އއ. ހިމަންދޫ، މ. ކޮޅުފުށި، ތ. ހިރިލަންދޫ، ލ. ފޮނަދޫ އަދި ދ. ކުޑަހުވަދޫގައި 18 އަހަރުން މަތީގެ އާބާދީގެ 60 ޕަސެންޓަށް ވުރެ އިތުރަށް ވެކްސިން ފުރިހަމަކޮށްފައިވެ އެވެ. ދުވާފަރުގައި އެ ނިސްބަތް އުޅެނީ 45 ޕަސެންޓުގަ އެވެ.

އެހެންވެ، ދުވާފަރު އާބާދީގެ 60 ޕަސެންޓަށް ވެކްސިން ދެވެންދެން، ރަށުން ފުރާ މީހުންގެ ސާމްޕަލް ނަގަން ޖެހޭނެ އެވެ. އެ ރަށަކީ މިވަގުތު މޮނިޓަރިންގައި އޮތް ރަށްތަކުގެ ތެރެއިން އެންމެ ގިނަ ދުވަސް ވަންދެން މޮނިޓަރިންގައި އޮތް ރަށެވެ. އެ ރަށް ބަންދުކުރީ މިދިޔަ މެއި މަހުގެ 25 ގަ އެވެ.