ކޮވިޑް ފެތުރޭ 17 ރަށެއް، އަދިވެސް ހާލަތު އެންމެ ގޯހީ ދުވާފަރުގައި

ކޮވިޑްގެ ކޭސްތައް ފެނިގެން ބަންދުކޮށްފައިވާ ރަށްތަކުގެ އަދަދު 17 އަށް އިތުރުވެއްޖެ އެވެ.

މިހާރު ބަންދުކޮށްފައި އޮތް ރަށްތަކުގެ ތެރެއިން އަދިވެސް އެންމެ ހާލަތު ގޯހީ ރ. ދުވާފަރުގަ އެވެ. މިދިޔަ މެއި މަހުގެ 25 ވަނަ ދުވަހު ބަންދުކުރި އެ ރަށުން، 916 މީހަކު މިހާތަނަށް މި ބައްޔަށް ޕޮޒިޓިވެ ވެފައި ވާއިރު އެކްޓިވް ކޭސްތަކުގެ އަދަދު މިހާރު ހުރީ 148 ގަ އެވެ.

އެޗްޕީއޭ އިން އާންމުކުރި ލިސްޓުގައިވާ ގޮތުން އެންމެ ފަހުން ބަންދުކޮށްފައި ވަނީ އދ. މަހިބަދޫ އެވެ. މިއަދު އެ ރަށް ބަންދުކުރިއިރު، މިއީ ކޮވިޑްގެ ކޭސްއެއް ފެނިގެން އެ ރަށް ބަންދުކުރި ތިން ވަނަ ފަހަރެވެ. އެ ރަށް އަލުން ބަންދުކުރީ، އެ ރަށުގައި ހުންނަ އދ. އަތޮޅު ހޮސްޕިޓަލަށް ދެއްކި ކުޑަކުއްޖަކާއި އޭނާގެ މައިންބަފައިން ކޮވިޑަށް ޕޮޒިޓިވްވެފައި ވާތީ އެވެ.

ކޮވިޑްގެ ހަތަރު ކޭހެއް ފެނިގެން، ށ. މިލަންދޫ ވެސް ވަނީ އިއްޔެ ބަންދުކޮށްފަ އެވެ. އެއީ އެ ރަށު ސްކޫލުގައި ކިޔަވާ ތިން ކުއްޖަކާއި ބޮޑު މީހަކު ކަމަށް މައުލޫމާތު ލިބެ އެވެ.

މީގެ އިތުރުން މިހާރު މޮނީޓަރިންގައި އޮތް ރަށްތަކަކީ ހއ. އިހަވަންދޫ، ށ. ފީވައް، ދ. ކުޑަހުވަދޫ، އއ. ހިމަންދޫ، އދ. ހަންޏާމީދޫ ، ގއ. ކަނޑުހުޅުދޫ، މ. މަޑުއްވަރި، ކ. ގާފަރު، ކ. ކާށިދޫ، ގދ. ގައްދޫ، ގދ. މަޑަވެލި، ތ. ވޭމަންޑޫ، ލ. މުންޑޫ އަދި ފުވައްމުލަކެވެ.

ޖުމްލަކޮށް ރާއްޖޭގައި ކޮވިޑް ކޭސްތައް ދަށްވެފައިވާއިރު، މިހާރު އާންމުކޮށް ދުވާލަކު މި ބައްޔަށް ޕޮޒިޓީވް ވަނީ 100 މީހުންނެވެ. މި ބަލީގައި މިހާތަނަށް 225 މީހަކު މަރުވެފައިވެ އެވެ.

ވެކްސިންގެ ކަވަރޭޖް ފުރިހަމަ ކޮށްފައިވާ ރަށަކުން ކޮވިޑް ޖެހިފައިވާ މީހަކު ފެނުނަސް، މުޅި ރަށް ބަންދުނުކުރާ ގޮތަށް ހެދުމަށް އުސޫލު ބަދަލުކުރަން މަޝްވަރާކުރާ ކަމަށް މި މަހު ވަނީ ބުނެފަ އެވެ.

ކޮވިޑުން ދިފާއުވުމަށް 12-17 އަހަރާ ދެމެދުގެ ކުދިންނަށް ވެސް މިހާރު އަންނަނީ ވެކްސިން ދެމުންނެވެ. މިހާތަނަށް 300،000 އަށް ވުރެ ގިނަ މީހުން ވަނީ ވެކްސިންގެ ދެ ޑޯޒު ވެސް ފުރިހަމަ ކޮށްފަ އެވެ.