ވިމެންސް އޭޝިއަން ކަޕް ކޮލިފައިން: ރާއްޖޭގެ ފުތަރަމަ މެޗު ވިއެޓްނާމާ ދެކޮޅަށް

އޭޝިއަން ކަޕް ކޮލިފައިންގައި ރާއްޖޭގެ އަންހެން ފުޓުބޯޅަ ޓީމު ވާދަކުރާ ފުރަތަމަ މެޗުގައި މިރޭ ވިއެޓްނާމާ ދެކޮޅަށް ކުޅޭނެ އެވެ.

އަންނަ އަހަރުގެ ޖެނުއަރީ މަހު އިންޑިއާގައި ބާއްވަން ހަމަޖެހިފައިވާ އޭއެފްސީ ވިމެންސް އޭޝިއަން ކަޕުގެ ކޮލިފައިންގައި ރާއްޖެ ހިމެނޭ ގުރޫޕް ބީގެ މެޗްތައް ތަޖިކިސްތާނުގައި ކުރިޔަށް ދާއިރު، ރާއްޖެ އާއި ވިއެޓްނާމުގެ އިތުރުން މި ގުރޫޕުގައި ހިމެނެނީ ގުރޫޕް ހޯސްޓު ކުރާ ތަޖިކިސްތާނެވެ. ކުރިން މި ގުރޫޕުގައި އަފްގާނިސްތާން ވެސް ވާދަކުރާގޮތަށް އޮތް ނަމަވެސް ތާލިބާތުންގެ ސަރުކާރުން އަންހެން ޓީމަށް ހުއްދަ ނުދިނުމުން އެގައުމުން ވަނީ ކޮލިފައިންގައި ވާދަނުކުރާން ނިންމައިފަ އެވެ.

ވިއެޓްނާމަކީ ދެކުނު އިރުމަތީ އޭޝިއާގެ އަންހެން ފުޓުބޯޅައިގެ ވަރުގަދަ ނަމެކެވެ. ދުނިޔޭގެ ރޭންކިންގެ 32 ވަނައިގައި އޮތްއިރު އޭޝިއާ ބައްރުގެ ޓީމުތައް ރޭންކު ކުރާއިރު އެޓީމު އޮތީ ހަވަނައިގަ އެވެ. ދެކުނު އިރުމަތީ އޭޝިއާ ހިސާބުގެ ސަރަހައްދީ ފުޓުބޯޅަ މުބާރާތްތަކުގައި ވިއެޓްނާމަކީ ކާމިޔާބު ޓީމެއް ނަމަވެސް އެޓީމަކީ އޭޝިއަން ކަޕުގައި އެހާ ކާމިޔާބު ޓީމެކޭ ބުނެވޭނެ ޖާގައެއް ނެތެވެ. ސަބަބަކަށް ވަނީ 1999 ވަނަ އަހަރުން ފެށިގެން އޭޝިއަން ކަޕުގައި ވާދަކުރަމުން އައި ނަމަވެސް މުބާރާތުގައި ގުރޫޕް ސްޓޭޖް ފަހަނަޅައި ދެވިފައި ނުވުމެވެ.

ރާއްޖޭގެ އަންހެން ގައުމީ ފުޓުބޯޅަ ޓީމު ފުރަތަމަ މެޗެއް ކުޅުނީ ވެސް 2004 ވަނަ އަހަރު ވިއެޓްނާމްގައި ބޭއްވި ދެކުނު އިރުމަތީ އޭޝިއާ ސަރަހައްދުގެ ފުރަތަމަ ފުޓުބޯޅަ މުބާރާތުގަ އެވެ. ވިއެޓްނާމާ އެއް ގުރޫޕެއްގައި ހިމެނި، 14-0 އިން ރާއްޖެ ބަލިވި ނަމަވެސް 2007 ވަނަ އަހަރު އޮތް އޮލިމްޕިކް ކޮލިފައިންގައި ވިއެޓްނާމާ ވާދަކޮށް ރާއްޖޭން ވަނީ ބައިކޮޅަށް ވަން ލަނޑުގެ އަދަދު ފަހަކަށް ތިރި ކޮށްފަ އެވެ.

މީގެ އެއް މަސް ކުރިން ގައުމީ ޓީމު ވަނީ ކޮލިފައިންއަށް ތައްޔާރުވުމުގެ ގޮތުން ޔޫއޭއީގައި އެގައުމުގެ ސީނިއާ ފުޓުބޯޅަ ޓީމާއެކު ރަހުމަތްތެރިކަމުގެ ދެ މެޗް ކުޅެފަ އެވެ. ފުރަތަމަ މެޗުގައި 5-1 އިން ރާއްޖޭގެ ޓީމު ބަލިވިއިރު ދެވަނަ މެޗުގައި ބަލިވީ 2-0 އިންނެވެ. އޭގެ ކުރިން އަންހެން ގައުމީ ޓީމުން ބައިނަލްއަގުވާމީ ވާދަވެރި މެޗެއް ކުޅުނީ ޑިސެމްބަރު 2019 ގައި އޮތް ސައުތު އޭޝިއަން ގޭމްސްގަ އެވެ.

ކޮލިފައިންއަށް ރާއްޖޭގެ ޓީމު ތަޖިކިސްތާނަށް ދާން ފުރީ މިދިޔަ ހޮނިހިރު ދުވަހު އެވެ. މިއީ 2010 ވަނަ އަހަރު އޮތް އޭޝިއަން ކަޕް ކޮލިފައިންގައި ވާދަކުރި ފަހުން މި މުބާރާތުގެ ކޮލިފައިން ބުރުގައި ރާއްޖޭން ބައިވެރިވި ފުރަތަމަ ފަހަރެވެ. ގައުމީ އަންހެން ޓީމު ކޮލިފައިންގައި ވާދަކުރާނީ އެފްއޭއެމްގެ ޓެކްނިކަލް ޑައިރެކްޓާ އަހްމަދު ޝަރީފް (ޑުންގާ) ގެ ބެލުމުގެ ދަށުންނެވެ.

ވިއެޓްނާމާ ކުޅޭ މި މެޗު ފެށުމަށް ހަމަޖެހިފައި ވަނީ ރާއްޖެ ގަޑިން މިރޭ އިރުއޮއްސި 6 ޖަހާއިރެވެ.