މިނިމަމް ވޭޖް ކަނޑައެޅުން މާދަމައަށް ފަސްކޮށްފި

އެންމެ ކުޑަ މުސާރައިގެ ގޮތުގައި ދޭނެ ވަރެއް، ކަނޑައެޅުމަށް މިއަދަށް ތާވަލް ކުރި މިނިމަމް ވޭޖް ބޯޑު ބައްދަލުވުން މާދަމާއަށް ފަސްކޮށްފި އެވެ.

ވޭޖް ބޯޑުގެ މެމްބަރު އަދި ޓީމުގެ ސެކްރެޓަރީ ޖެނެރަލް މައުރޫފް ޒާހިރު (މާއްޓެ) ވިދާޅުވީ، ބައްދަލުވުން މާދަމާ މެންދުރު 2:00 ގައި އޮންނާނެ ކަމަށެވެ. ބައްދަލުވުން ފަސްކުރި ސަބަބެއް ހާމައެއް ނުކުރެ އެވެ.

މިނިމަމް ވޭޖް ބޯޑުން ނިންމާ ނިންމުން ހިއްސާކުރާނީ އިކޮނޮމިކް މިނިސްޓްރީއާ އެވެ.

މީގެ ކުރިން އިކޮނޮމިކް މިނިސްޓާރު ފައްޔާޒު އިސްމާއިލް ވިދާޅުވީ، މިނިމަމް ވޭޖް ކަނޑައެޅުން ލަސްވަނީ، ވޭޖް ބޯޑުން ގޮތެއް ނިންމުން ލަސްވާތީ ކަމަށެވެ.

ވަޒީފާއާ ބެހޭ ގާނޫނުގައިވާ ގޮތުން، މިނިމަމް ވޭޖް ކަނޑައަޅަން ޖެހޭނީ ވޭޖް ބޯޑުން ދޭ ލަފާގެ މަތިން އިކޮނޮމިކް މިނިސްޓަރެވެ. އެއީ މަސައްކަތްތެރިންނާއި ވަޒީފާ ދޭ ފަރާތްތައް ހިމެނޭ ގޮތަށް އުފައްދާފައިވާ މިނިވަން ބޯޑެކެވެ.

މިނިމަމް ވޭޖެއް ކަނޑައެޅުމުން އޭގެ އެންމެ ބޮޑު ފައިދާއެއް ވާނީ އެންމެ ކުޑަ މުސާރަ ލިބޭ މުވައްޒަފުންނަށެވެ. ސަރުކާރުން މިނިމަމް ވޭޖްގެ ގޮތުގައި ކަނޑައަޅާފައި އޮތް ސީލިންގަކީ 6،700ރ. އާއި 8،900ރ. އާ ދެމެދުގެ އަދަދެކެވެ. މިނިމަމް ވޭޖް ބޯޑުން އެއްބަސްވަނީ ސަރުކާރުން ބޭނުންވާ އަދަަދަށް ކަމެއް އަދި ސާފެއް ނޫނެވެ.

މިނިމަމް ވޭޖެއް ކަނޑައެޅުމަށް އެކި ފަހަރު މަތިން ސަރުކާރުން ވަނީ ތާރީހުތަކެއް ދީފަ އެވެ.