ކެފޭ އުސޫލުން ޑްރަގު ވިޔަފާރިކުރާ ގެއެއްގެ ވެރިފަރާތަކަށް ފުރަތަމަ ފަހަރަށް ދައުވާކޮށްފި

ކެފޭ އުސޫލުން ޑްރަގު ވިޔަފާރި ކުރަން ބޭނުން ކުރާ ކަމަށް ބުނާ ގެއެއްގެ ވެރިފަރާތަކަށް ފުރަތަމަ ފަހަރަށް ޕީޖީ އޮފީހުން ދައުވާ ކޮށްފި އެވެ.

ފުލުހުން ބުނާ ގޮތުގައި ދަގަނޑު ދޮރު ޖަހައި ސެކިއުރިޓީ ވަރުގަދަކޮށްގެން މާލޭގައި ކެފޭ އުސޫލުން ޑްރަގް ބޭނުން ކުރަން މީހުން ދާ ވިއްސަކަށް ގެ މާލޭގައި އެބަ ހުއްޓެވެ.

ކެފޭ އުސޫލުން ޑްރަގުގެ ވިޔަފާރި ކުރަން ގެ ދިން ކަމަށް ބުނާ މައްސަލައިގައި ދައުވާ ކުރީ މ. ބްރައިޓްފްލާވާ ގޭގެ ވެރިޔާ ހުސެއިން ޔޫސުފްގެ މައްޗަށެވެ.

ޕީޖީ އޮފީހުން ބުނި ގޮތުގައި އޭނާއަށް ދައުވާ ކުރީ، އެ ގޭގައި މީހުން މަސްތުވާތަކެތި ބޭނުންކޮށް، ވިޔަފާރިކޮށް، ޕެޑަލްކުރާ ކަމަށް ގަބޫލު ކުރެވޭ ހާލަތު އޮވެ، ނުވަތަ އެގޮތަށް ގަބޫލު ކުރުމުގެ ފުރުސަތު އޮވެ، އެކަން ހުއްދަ ކޮށްފައިވާތީ ކަމަށެވެ. މިއީ މިފަދަ މައްސަލައެއްގައި ދައުވާ ކުރި ފުރަތަމަ ފަހަރެވެ.

އޭނާގެ މައްޗަށް ކުރީ "ގެއެއް ނުވަތަ އިމާރާތެއް ނުވަތަ ގެއަކުން ނުވަތަ އިމާރާތަކުން ބައެއްގައި، ޖަދުވަލު އެކެއްގައިވާ މަސްތުވާ އެއްޗެއް ނުވަތަ ޖަދުވަލު ދޭއެއްގައިވާ މަސްތުވާއެއްޗެއް ޓްރެފިކް ކުރުމަށް ނުވަތަ ޕެޑަލް ކުރުމަށް ނުވަތަ އުފެއްދުމަށް ނުވަތަ އެއިން ކަމެއް ކުރުމަށްކަން ގަބޫލު ކުރެވޭ ހާލު، ނުވަތަ އެގޮތަށް ގަބޫލު ކުރާނެ ފުރުސަތު އޮވެ، އެތަނުގެ ވެރިފަރާތުން ނުވަތަ އެތަނެއްގައި އުޅޭ ފަރާތުން ނުވަތަ އެތަނެއްގެ މަސްއޫލިއްޔަތު އުފުލާ ފަރާތުން ހުއްދަ ދިނުން ނުވަތަ ހުއްދަ ކުރުމުގެ" ކުށުގެ ދައުވާ އެވެެ.

ކެފޭ އުސޫލުން ގެތަކުގައި ޑްރަގް ވިޔަފާރި ކުރަން ގެތަކުގެ ވެރިފަރާތްތަކުން އެއްބާރުލުންދޭތީ އެކަން ހުއްޓުވަން އުނދަގޫވާ ކަމަށް ވެސް ފުލުހުން ބުނެފައިވެ އެވެ. ނަމަވެސް، އެފަދަ ގެތަކަށް ގޭގެ ވެރިފަރާތް ނޫން މީހުން ވަނުން ހުއްޓުވޭނެ ގޮތެއް ފުލުހުންނަށް ގާނޫނީ ގޮތުން ނޯވެ އެވެ.