ޓެނިސް ތަރިން ވެކްސިނާ ދެކޮޅު މައްސަލަ އައިޓީއެފްގެ ސަމާލުކަމަށް

ނިއު ޔޯކް (އޮގަސްޓް 31) - ޔޫއެސް އޯޕަން ޓެނިސް މުބާރާތަށް ދުނިޔޭގެ އެންމެ މޮޅު ކުޅުންތެރިން ނިއުޔޯކަށް ޖާމާވެފައިވާއިރު ކޮވިޑް-19 އިން ރައްކާތެރިވުމަށް ޖަހާ ވެކްސިން ޖަހަން ދުނިޔޭގެ ޓެނިސް ފެޑްރޭޝަން، އައިޓީއެފް އިން ބާރު އަޅައިފި އެވެ.

ޓެނިހުގެ އެންމެ މަޝްހޫރު ތަރިން ވެކްސިން ޖަހަން ބޭނުން ނުވާ މައްސަލަ އައިޓީއެފްގެ ސަމާލު ކަމަށް ވަނީ އައިސްފަ އެވެ. ދުނިޔޭގެ ޓެނިހުގެ ފިރިހެން ރޭންކިންގެ ތިން ވަނަ ކުޅުންތެރިޔާ ސްޓެފަނޯސް ސިޓްސީޕާސް ވަނީ ވެކްސިން ޖަހަން ބޭނުން ނުވާކަން ހަމަވާ ގޮތަށް ވާހަކަ ދައްކައިފަ އެވެ.

އޭނާ އެކަންޏެއް ވެސް ނޫނެނެވެ. މަޝްހޫރު އެހެން ބައެއް ކުޅުންތެރިން ވެސް ވަނީ ވެކްސިން ޖަހަން ބޭނުން ނުވާކަން ހާމަކޮށް ވާހަކަ ދައްކައިފަ އެވެ. ދުނިޔޭގެ އަންހެން ރޭންކިންގެ ދެ ވަނަ އަރީނާ ސަބަލެންކާ ވެސް ވަނީ ވެކްސިނަށް އިތުބާރު ނުކުރާކަން ހާމަވާ ގޮތަށް ވާހަކަ ދައްކައިފަ އެވެ.

"ހަމަ ހަގީގަތުގައި ވެސް އަހަރެން އެއަށް (ވެކްސިނަށް) އިތުބާރު ނުކުރަން،" ސަބަލެންކާ މާޗު މަހު ބުނެފައި ވެ އެވެ. "އަހަރެން ބޭނުމެއް ނެތް އަހަރެންގެ އާއިލާ ވެސް އެ ޖާހަކަށް. ވެކްސިން ޖަހަން ޖެހޭ ނަމަ ވެކްސިން ޖެހުމުގެ ކުރިން އެކަމާ އަހަރެން ވަރަށް ބޮޑަށް ވިސްނާނަން."

އޭރު އޭނާ ދެއްކި ވާހަކަތައް ފަހުން ބަދަލުކުރި ކަމެއް އެނގިފައެއް ނުވެ އެވެ

އައިޓީއެފްގެ ސަބް އެސޯސިއޭޝަންތައް މެދުވެރިކޮށް އެ ފެޑްރޭޝަނުން ދަނީ ކުޅުންތެރިން ވެކްސިން ޖަހަން ބާރު އަޅަމުންނެވެ. ވިމެން ޓެނިސް އެސޯސިއޭޝަންގެ ސްޕޯކްޕާސަން ވިދާޅުވީ އެ އެސޯސިއޭޝަންގެ ދަށުގައިވާ ކުޅުންތެރިންގެ 50 ޕަސެންޓް ވެކްސިން ފުރިހަމަކޮށްފައިވާ ކަމަށެވެ. އަދި އެ އެސޯސިއޭޝަންގެ ޓާގެޓަކީ މި އަހަރު ނިމެންވާއިރު 85 ޕަސެންޓް ކުޅުންތެރިން ވެކްސިން ޖެހުން ކަމަށް އޭނާ ވިދާޅުވި އެވެ.

"އެކަމަކު ވެކްސިން ޖެހުމަކީ ކުޅުންތެރިންގެ އަމިއްލަ ނިންމުމެއް،" ޑަބްލިއުޓީއޭގެ ސްޕޯކްސް ޕާސަންގެ ފަރާތުން ނެރެފައިވާ ބަޔާނުގައި ބުނެފައިވެ އެވެ. "ކުޅުންތެރިންގެ އެ ނިންމުމަށް އަހަރެމެން އިހުތިރާމް ކުރަން."

ފިރިހެން ކުޅުންތެރިންގެ އެސޯސިއޭޝަން، އޭޓީޕީން ބުނެފައި ވަނީ އެ އެސޯސިއޭޝަންގެ ދަށުގައިވާ ކުޅުންތެރިންގެ ތެރެއިން 50 ޕަސެންޓަށް ވުރެ ގިނަ ކުޅުންތެރިން ވެކްސިން ޖަހާފައިވާ ކަމަށެވެ.

"އަހަރެމެން މިދަނީ ވަރަށް ބޮޑަށް އެކަމަށް ބާރު އަޅަަމުން. އަދި ވެކްސިންގައި ހުރި ސައިންޓިފިކް ފައިދާތަކާއި އޭގެ މުހިންމުކަން އަހަރެމެން މިދަނީ ހާމަ ކޮށްދެމުން،" އޭޓީޕީގެ ސްޕޯކްޕާސަން ވިދާޅުވި އެވެ.