ދިއްދޫގެ ކާފިއު 12 ގަޑިއިރަށް އިތުރުކޮށްފި

ހއ. ދިއްދޫގައި ކޮވިޑުގެ ހާލަތު ގޯސްވުމުގެ ސަބަބުން މިއަދުން ފެށިގެން ކޮންމެ ދުވަހެއްގެ 12 ގަޑިއިރަށް ކާފިއުގެ ވަގުތު އިތުރުކުރަން ނިންމައިފި އެވެ.

ކައުންސިލުގެ ރައީސް އަބްދުﷲ ރަޝީދު "މިހާރު" އަށް މިއަދު ވިދާޅުވީ، މިއަދުން ފެށިގެން 14 ދުވަހުގެ މުއްދަތަކަށް ދިއްދޫގައި ކާފިއުގެ ވަގުތު 8 ގަޑިއިރުން 12 ގަޑިއިރަށް އިތުރުކުރަން ނިންމާފައިވާ ކަމަށެވެ. އިއްޔެއާ ހަމައަށް އެ ރަށުގައި ކާފިއު ހިންގަމުން އައީ ރޭގަނޑު 9:00 އިން ފަތިހު 5:00 އަށެވެ.

ދިއްދޫގައި އަޅާފައިވާ ފިޔަވަޅުތަކަކީ:

- ކާފިއު ނޫން ވަގުތު ތަކުގައި ޒަރޫރީ ބޭނުމަށް ވެސް ބޭރަށް ނުކުމެވޭނީ ފުލުހުންގެ ޕޯޓަލް މެދުވެރިކޮށް ހުއްދަ ނަގައިގެން.

- ތިން މީހުންނަށް ވުރެ ގިނަ މީހުން އެއްތަންވެ ނޫޅެވޭނެ. މާސްކު އެޅުމާއި އެކު ގައިދުރުކަން ބަހަައްޓަން ޖެހޭނެ.

- އެއް ގެ އިން އަނެއް ގެ އަށް ޒިޔާރަތް ނުކުރެވޭނެ.

- ރޯގާގެ އަލާމާތްތައް ހުރި މީހުން އެއްވެސް ތަނަކަށް ގޮސްގެން ނުވާނެ.

- ކުޑަކުދިންނާއި އުމުރުން ދުވަސްވީ މީހުންނާއި ބަލި މީހުން މިސްކިތްތަކަށް ދިއުން ރަނގަޅެއް ނޫން. މިސްކިތްތަކަށް ދާން ވާނީ ގެއިން ވުލޫއުކޮށްގެން، މުސައްލަ ހިފައިގެން.

- ގިނަ ވަގުތު މިސްކިތުގައި މަޑުކޮށްގެން ނުވާނެ.

- ފިހާރަތަކަށް އެއްފަހަރާ މީހުންނަށް ވަދެވޭނެ އަދަދެއް ކަނޑައަޅައި ކިޔޫގައި އާންމުންނަށް ގައިދުރުކަންމަތީ ތިބެވޭނެ އިންތިޒާމެއް ހަމަޖައްސަން ޖެހޭ.

- ނަމާދު ވަގުތުތައް ފިޔަވައި ވިޔަފާރިތައް ހެނދުނު 7:00 އިން ހަވީރު 4:00 އަށް ހުޅުވުމާއި ހަވީރު 4:00 އިން ރޭގަނޑު 10:00 އަށް ޑެލިވަރީގެ ހިދުމަތް ދޭ ގޮތަށް ހަމަޖެއްސުން.

- ކާ ތަންތަނުން ޑެލިވަރީ އާއި ޓޭކްއަވޭގެ ހިދުމަތަށް ބަދަލުކުރުން.

- ހޮޅުއަށި ފަދަ އާންމު ތަންތަނަށް މީހުން އެއްވެ އުޅުން މަނާ.

- ޖިމްތަކާއި ސެލޫންތައް ބަންދު.

ދިއްދޫގައި ކޮވިޑުގެ ހާލަތު ގޯސްވުމުގެ ސަބަބުން މިދިޔަ ޖޫން 24 އިން ފެށިގެން އެ ރަށަށް އަރައިފޭބުން ވެސް ވަނީ މަނާކޮށްފަ އެވެ. މިއީ އެ ނިންމުން ނިންމާފައިވާ ދެވަނަ ފަހަރެވެ.

ވޭތުވެދިޔަ 24 ގަޑިއިރުތެރޭގައި ކޮވިޑަށް ޕޮޒިޓިވްވި ހަތަރު މީހުންނާ އެކު ދިއްދޫން ޖުމުލަ 102 މީހުން ވަނީ ޕޮޒިޓިވްވެފަ އެވެ. އޭގެ ތެރެއިން އެކަކު ވަނީ މަރުވެފަ އެވެ.