ސިޔާމް، ޔާމީނަށް ފާޑު ވިދާޅުވެ، ރައީސަށް ތައުރީފް އޮއްސާލައްވައިފި

ރައްޔިތުންގެ ހައްގުގައި ރައީސް އިބްރާހީމް މުހައްމަދު ސޯލިހު ކުރައްވަމުން ގެންދަވަނީ ބުރަ އަދި ރަނގަޅު މަސައްކަތްތަކެއް ކަމަށް ވިދާޅުވެ، މީދޫ ދާއިރާގެ މެމްބަރު އަދި އެމްޑީއޭގެ ލީޑަރު އަހުމަދު ސިޔާމް މުހައްމަދު، ރައީސަށް ރޭ ވަރަށް ބޮޑަށް ތައުރީފް ކުރައްވައިފި އެވެ. އަދި ސިޔާމް ވަނީ ކުރީގެ ރައީސް އަބްދުﷲ ޔާމީނަށް ވަރަށް ބޮޑަށް ފާޑު ވެސް ވިދާޅުވެފަ އެވެ.

ސީއެންއެމްގެ ޕްރޮގްރާމެއްގައި ވާހަކަ ދައްކަވަމުން، ޓޫރިޒަމް ވިޔަފާރިވެރިޔާ ވިދާޅުވީ ރައީސް އިބްރާހިމް މުހަންމަދު ސޯލިހަކީ އޭނާގެ ވަރަށް ގާތް އެކުވެރިއެއް ކަމަށެވެ.

"އަނެއްކާ ވަރަށް ރަނގަޅަށް މީހުންނާ ދޭތެރޭގައި [ރައީސް] މުއާމަލާތް ކުރައްވާނީ. އެހެންވީމަ އަޅުގަނޑަށް އަބަދުވެސް ވަރަށް ކަމުދާ ބޭފުޅެއް އިބްރާހީމް މުހައްމަދު ސޯލިހަކީ،" އެމްޑީޕީގެ އެތެރޭގައި މިހާރު ޖެހިފައިވާ މައްސަލަތަކުގައި ސިޔާމް ނަންގަވާނީ ރައީސް، ނުވަތަ ރައްޔިތުންގެ މަޖިލީހުގެ ރައީސް މުހަންމަދު ނަޝީދުގެ ކޮޅުތޯ އެހުމުން ސިޔާމް ޖަވާބު ދެއްވި އެވެ.

އޭނާ ވިދާޅުވީ ރައީސް ވަނީ މަޖިލީހުގައި އެކުގައި ވިއްސަކަށް އަހަރު ދުވަހު މަސައްކަތް ކުރައްވާފައިވާ ކަމަށާއި، އެމަނިކުފާނަކީ އެންމެ އަހުލާގު ރަނގަޅު ބޭފުޅާ ކަމަށެވެ.

އޭނާ ވިދާޅުވީ، ރައީސަކީ ކަންކަން ކުރައްވަން އެނގިވަޑައިގަންނަވާ ބޭފުޅެއް ކަމަށެވެ. ކޮވިޑް-19 ގެ މި ދަނޑިވަޅުގައި ވެސް އެމަނިކުފާނުގެ މަސައްކަތްޕުޅު ބައްޓަންވެފައިވާ ގޮތަށް ސިޔާމް ތައުރީފް ކުރެއްވި އެވެ. އޭނާ ވިދާޅުވީ ރާއްޖެއިން ނަގާފައިވާ ލޯނުތައް ވެސް ކޮވިޑްގެ ތެރޭގައި ސަރުކާރުން އަނބުރާ ދައްކަމުން ގެންދާ ކަމަށެވެ.

"މި ސަރުކާރު ހަމަ ރަނގަޅު. ގޯހެއް ނޫން މި ސަރުކާރު. އެއީ ދުނިޔޭގެ އެހެން ގައުމުތައް މެނޭޖްކުރުމުގެ ބައްޓަމަށް ބަލާއިރު އެހެން ގައުމުތަކަށް ވުރެ މި ގައުމު ރަނގަޅު. އެހެންވީމަ އިބްރާހީމް މުހައްމަދު ސޯލިހު ކުރައްވަމުން އެ ގެންދަވަނީ ވަރަށް ބުރަ، ރަނގަޅު، ރައްޔިތުންގެ ހައްގުގައި ކުރައްވާ މަސައްކަތްތަކެއް،" އޭނާ ވިދާޅުވި އެވެ.

ޔާމީންގެ ވެރިކަމުގައި ހިތްހަމަނުޖެހޭ ކަންކަން ފެނުނު

ސިޔާމް ވިދާޅުވި ގޮތުގައި 2013 ވަނަ އަހަރު ރައީސް ޔާމީން، އޭނާއާ ބައްދަލުކުރައްވައި، ކޯލިޝަން ސަރުކާރުގައި ބައިވެރިވުމަށް ހުށަހެޅުއްވި އެވެ. ޕީޕީއެމް ވެރިކަމަށް އައީ އެމްޑީއޭ އާ އެކު ކޯލިޝަން ހަދައި، ސިޔާމްގެ ވެސް ވަރަށް ބޮޑު އެހީތެރިކަމެއް އޮވެގެންނެވެ.

"އޭރު ރައީސް ޔާމީން ހުންނެވީ ގިނިކަންޏާ. އެހެންނަމަވެސް އަޅުގަނޑު އެމަނިކުފާނާ އެއްކޮށް ބައިވެރިވުމާ އެކު ވަރަށް ބޮޑަށް ދިރުމެއް އައިސް، އޭރު އަޅުގަނޑުމެން އެދުނު ފަދަ ވެރިކަމެއް އައީ."

ސިޔާމް ވިދާޅުވި ގޮތުގައި ޔާމީނަކީ އޭނާގެ ޒަމާންވީ ރަހުމަތްތެރިއެއް ނަމަވެސް 2018 ވަނަ އަހަރާ ހަމައަށް އައިއިރު ޔާމީނާއި ސިޔާމްގެ ޕާޓީއާ ދެމެދު ދެބަސްވުން ވަނީ ފެށިފަ އެވެ. އެހެންވެ، އިތުރު ދައުރަކަށް ޔާމީން ކުރިމަތިލައްވަން ކޯލިޝަން ހަދަން ބޭނުން ނުވީ ކަމަށް ސިޔާމް ވިދާޅުވި އެވެ.

"ސިޔާސީ ގޮތުން ކުރަންޖެހޭ ބައެއް ކަންތައްތަކާއި ނުކުރަންޖެހޭ ބައެއް ކަންތައްތައް ހުންނާނެ. އަދި ސިޔާސީ ގޮތުން އަޅުގަނޑު ހިތްހަމަނުޖެހޭ ކަންތައްތަކެއް ރައީސް ޔާމީންގެ ވެރިކަމުގައި ކުރެވިގެންދިޔަ. ރަނގަޅު ކަންތައްތައް ވެސް އެމަނިކުފާނުގެ ވެރިކަމުގައި ކުރައްވާފައި އެބަހުރި،" ޖެހުނީ ސީދާ ކޮން މައްސަލައެއް ކަން ވިދާޅުނުވެ، ސިޔާމް ވިދާޅުވި އެވެ.

"އެހެންނަމަވެސް އެމަނިކުފާނާ އެކު އެ ވަގުތު އަޅުގަނޑުމެންނަށް ކުރިއަށް ނުދެވުނީ އަޅުގަނޑުމެން ޕާޓީން ވެސް ކައުންސިލުން ވެސް އެކަމަށް އެއްބަސް ނުވެވިގެން."

ސިޔާމް ވިދާޅުވި ގޮތުގައި މި ސަރުކާރުން ވެސް އޭނާ އަށް 25 ޕަސެންޓްގެ ހިއްސާއާ އެކު އެގްރީމެންޓް ފޮނުވި އެވެ. އެކަމަކު، އޭނާ ވިދާޅުވީ ރައީސް ޔާމީނަކީ ރަހުމަތްތެރިއަކަށް ވާތީ، އެހެން ދިމާއަކަށް ވެސް ވަޑައިގަންނަވަން ބޭނުންވެ ވަޑައިނުގަތީ ކަމަށެވެ.

ސިޔާމްގެ ވިޔަފާރިއާ ގުޅިގެން އާންމުން ދައްކަމުން އަންނަ ބައެއް ވާހަކަތަކަށް ވެސް އޭނާ ޖަވާބު ދެއްވި އެވެ. ވިދާޅުވީ، ރައީސް އޭނާގެ ވިޔަފާރީގެ ކާމިޔާބަކީ ޔާމީން ނޫން ކަމަށާއި ވިޔަފާރި ކުރިއަރުވަން ޔާމީން ވެދެއްވި އެހީތެރިކަމެއް ވެސް ނެތް ކަމަށެވެ.

"ޔާމީން ކޮށްދެއްވި އެއްވެސް ކަމެއް ނޯންނާނެ. ޔާމީން ދިން ރަށެއް ވެސް ނޯންނާނެ. ޔާމީން ދިން އެހެން އެއްޗެއް ވެސް ނޯންނާނެ."