އާދީއްތަ ދުވަހުން ފެށިފެން ސްޓިމިއުލަސް ލޯނަށް އެދެވޭނެ

ކޮވިޑް-19 ގެ ސަބަބުން ކުދި އަދި މެދު ފަންތީގެ ވިޔަފާރިތަކަށް އެހީވުމަށް ސަރުކާރުން ހުޅުވާލި ސްޓިމިއުލަސް ލޯން ސްކީމުގެ ދަށުން ލޯނަށް އެދުމުގެ ފުރުސަތު އާދީއްތަ ދުވަހުން ހުޅުވާލާނެ ކަމަށް ބީއެމްއެލް އިން ބުނެފި އެވެ.

ބީއެމްއެލް އިން ނެރުނު ބަޔާނެއްގައި ބުނީ ލޯނަށް އެދި ހުށަހެޅުމުގެ ފޯމާއި ހުށަހަޅަން ޖެހޭ ގޮތުގެ މައުލޫމާތު ބޭންކުގެ ވެބްސައިޓުން ލިބެން ހުންނާނެ ކަމަށެވެ.

ސްޓިމިއުލަސް ލޯން ސްކީމް ދަށުން ކުދި އަދި މެދު ފަންތީގެ ވިޔަފާރިތަކަށް ލޯނު ދޫކުރަން ފަށާނެ ކަމަށް ސަރުކާރުން އިއުލާން ކުރީ މިދިޔަ މަހުގެ 27 ވަނަ ދުވަހު އެވެ. މި ސްކީމްގެ ދަށުން ވިޔަފާރިތަކަށް 10 މިލިއަން ރުފިޔާއާ ހަމައަށް އެދި ހުށަހެޅޭނެ އެވެ.

މިއީ ރަހުނަކާނުލައި ހަ ޕަސެންޓުގެ ކުޑަ އިންޓްރެސްޓު ރޭޓާއެކު ދޫކުރާ ލޯނެކެވެ. މި ލޯނު ދައްކަން ވިޔަފާރިތަކަށް ހަތަރު އަހަރުގެ މުއްދަތެއް ލިބޭނެ އެވެ.

ސްޓިމިއުލަސް އިކޮނޮމިކް ޕެކޭޖުގެ ދަށުން ދޫކުރާ ލޯނުތަކަކީ ޔޫރަޕިއަން އިންވެސްޓްމަންޓް ބޭންކް (އީއައިބީ) އިން ދޭ 20 މިލިއަން ޔޫރޯ (375 މިލިއަން ރުފިޔާ)ގެ ފެސިލިޓީގެ ދަށުން ދޫކުރާ ލޯނުތަކެއް ކަމަށް ރައީސް އިބްރާހިމް މުހައްދު ސޯލިހު ވަނީ ވިދާޅުވެފަ އެވެ.

އީއައިބީ އިން ވަނީ މިދިޔަ އަހަރު ވެސް ރާއްޖޭގެ ވިޔަފާރިތަކަށް އެހީވުމަށް 20 މިލިއަން ޔޫރޯގެ ފެސިލިޓީއެއް ހަމަޖައްސައިފަ އެވެ. މި ފެސިލިޓީގެ ދަށުން ގިނަ އަދަދެއްގެ ވިޔަފާރިތަކަށް ވަނީ ލޯނުތައް ދޫކޮށްފަ އެވެ.

މިދިޔަ އަހަރު ސްޓިމިޔުލަސް ޕެކޭޖުގެ ދަށުން 3،000 އަށްވުރެ މަދު މުވައްޒަފުން މަސައްކަތް ކުރާ ހުރިހާ ބާވަތެއްގެ ކުންފުނިތަކަށް ވަނީ ލޯނު ދޫކޮށްފަ އެވެ. މި ލޯނުތަކަށް އެދި ހުށަހެޅުމުގެ ފުރުސަތު ދެ ފަހަރެއްގެ މަތިން ހުޅުވާލިއިރު ފެސިލިޓީގެ އަދަދަށް ލޯނު ދޫކުރެވުމުން މި އަހަރުގެ މާޗު މަހު އެ ލޯނުތައް ދިނުން ވަނީ ހުއްޓާލައިފަ އެވެ.