އިންސްޓަގްރާމް ޕޭޖް "ހައްވަން ކޭކްސް" ބީއެމްއެލްގެ އެހީގައި ބޭކަރީއަކަށް

އަލަށް ފަށައިގަންނަ ވިޔަފާރިތަކާއި ކުދި ވިޔަފާރިތަކަށް ބީއެމްއެލްއިން ދޫކުރާ ގްރާންޓް ކާމިޔާބު ކުރި އިންސްޓަގްރާމް ބޭކާ "ހައްވަން ބޭކްސް"ގެ ބޭކަރީ ހުޅުވައިފި އެވެ.

"އައިނާސް ބައި ހައްވަން ކޭކްސް"ގެ ނަމުގައި ހުޅުވި މި ބޭކަރީ އަކީ މިދިޔަ އަހަރު ބީއެމްއެލްއިން ދޫކުރި ގްރާންޓް ކާމިޔާބުކޮށް ލިބުނު ފަސް ލައްކަ ރުފިޔާގެ އެހީގައި ހުޅުވި ބޭކަރީ އެކެވެ.

ބޭކަރީގެ އޯނަރު ހައްވާ ސޫޒަން އަކީ 2010 ވަނަ އަހަރުން ފެށިގެން ހޮބީއެއްގެ ގޮތުގައި ކޭކު އަޅަން ފެށި ބޭކާއެކެވެ. މި މަސައްކަތް ވިޔަފާރިއެއްގެ ގޮތުގައި ފުޅާކޮށް ފުލް ޓައިމް ބޭކާއެއްގެ ގޮތުގައި މި މަސައްކަތް ފެށީ 2019 ވަނަ އަހަރު ކަމަށް އޭނާ ބުންޏެވެ.

ސޫޒަން ބުނީ އާއިލާގެ އެއްބާރުލުމާއި ބީއެމްއެލްގެ އެހީ ނުލިބުނު ނަމަ ގެއިން ފެށި މަސައްކަތް ފުޅާކޮށް ބޭކަރީއަކަށް ނުހެދޭނެ ކަމަށެވެ.

"ބީއެމްއެލްއިން ދޭން ފެށި މި ގްރާންޓަކީ އަޅުގަނޑުމެން ފަދަ ކުދި ވިޔަފާރިކުރާ ފަރާތްތަކަށް ވަރަށް މުހިންމު އެއްޗެއް. އެ ފަދަ އެހީއަކާ ނުލާ މިހާ ހިސާބަކަށް ނާދެވުނީސް. އަދި އާއިލާގެ އެންމެންގެ އެހީއާ ނުލައި ވެސް މިހިސާބަށް ނާދެވުނީސް. ވަރަށް ބޮޑަށް ބީއެމްއެލްގެ އެހީ އާއި އާއިލާގެ އެއްބާރުލުމަށް ޝުކުރުވެރިވަން." ސޫޒަން ބުންޏެވެ.

ސޫޒަން ބުނީ މި ބޭކަރީ އަކީ ޓޭކްއަވޭ ސްޓައިލަށް އެކި ޝޯޓް އީޓްސް ލިބެން ހުންނާނެ ތަނެއް ކަމަށެވެ. އަދި މި ތަނުން ރެޑިލީ އެވައިލަބަލް ކޭކު ހުންނާނެ ކަމަށާއި ހަފްލާތަކަށް ކޭކު ޕްރީ އޯޑަރު ކޮށް ކަސްޓަމް ޑިޒައިންތަކަށް ކޭކު ހެއްދޭނެ ކަމަށް ވެސް ބުންޏެވެ.

"އަޅުގަނޑުގެ އަމާޒަކީ މި ތަނަށް އިންވެސްޓުކޮށްފަ މި ހުރި އިކުއިޕްމަންޓުގެ އެހީގައި ހަފްލާތަކަށް ކޭޓާކުރެވޭނެ ފެންވަރަށް ބޭކަރީ ގެންދިއުން. އަދި މި ތަނުގައި ކޭކު އެޅުން ދަސްކޮށްދޭ ކްލާސްތައް ފެށުން." ސޫޒަން ބުންޏެވެ.

ބީއެމްއެލްއިން މި ދިޔަ އަހަރު ގްރާންޓު ދޫކުރި ޕްރޮޕޯޒަލްތަކުގެ ތެރެއިން ނުފަށާ ހުރި ދެ ވިޔަފާރި ވަރަށް އަވަހަށް ފަށާނެ ކަމަށް އެ ބެންކުން ބުންޏެވެ. އަދި މި އަހަރު ގްރާންޓު ދޭން ހުޅުވާލި ފުރުސަތަށް ގިނަ އަދަދެއްގެ ޕްރޮޕޯޒަލް ހުށަހަޅާފައިވާ ކަމަށާއި ގްރާންޓު ލިބުނު ދެ ވިޔަފާރި ވަރަށް އަވަހަށް އިއުލާނުކުރާނެ ކަމަށް ވެސް އެ ބެންކުން ބުންޏެވެ.

ބީއެމްއެލްއިން މި ދިޔަ އަހަރު ފެށި “ސްޓާޓް އަޕް ގްރާންޓް” ކާމިޔާބު ކުރާ ކޮންމެ ޕްރޮޕޯޒަލްއަކަށް 500،000ރ. ގެ ހިލޭ އެހީ ދެ އެވެ.