ވައިގެ ތެރޭގައި ޖެހުނު ދެ ބޯޓު ވެސް އާދަޔާ ހިލާފް ގޮތަކަށް ސަލާމަތްވެއްޖެ

އެމެރިކާގެ ކޮލަރާޑޯގައި ކުޑަ ދެ މަތިންދާބޯޓު ވައިގެ ތެރޭގައި ޖެހި އެކްސިޑެންޓު ވުމަށް ފަހު ވެސް ދެ ބޯޓު ވެސް ރައްކާތެރިކަމާ އެކު ލޭންޑްކޮށްފި އެވެ.

މި ހާދިސާ ހިނގި އިރު ދެ ބޯޓުގެ ތެރެއިން ކުޑަ ބޯޓުގައި ވައިކުޑައެއް ވެސް ހަރުކޮށްފައި އިނެވެ.

ދެ ބޯޓު ޖެހުނީ ކޮން ބޯޓަކުން ހެދި ގޯހަކުން ކަމެއް އަދި ނޭނގެ އެވެ. ކަމާ ބެހޭ ފަރާތްތަކުން ހާދިސާ ތަހުގީގުކުރަމުން އަންނަ އިރު ބުނީ ވައިގެ ތެރޭގައި އެކްސިޑެންޓުވި ދެ ބޯޓު ވެސް ސަލާމަތްވި ގޮތް ވަރަށް އާދަޔާ ހިލާފް ކަމަށެވެ.

ދެ ބޯޓުގެ މަންޒަރުތައް ފެންނަ ފޮޓޯތަކާއި ވީޑިއޯތައް ވެސް އާންމުވެފަ ވާއިރު ވައިކުޑަ ހަރުކޮށްފައި އިން ކުޑަ ބޯޓު އޮތީ ލޭންޑް ކުރި އިރު އެއް ބައި، ވަކިވެފަ އެވެ. އެ ބޯޓު ލޭންޑްކުރީ ހަނަފަސް ހިސާބަކަށެވެ. އަދި ބޮޑުކޮށް އޮތް ފެހި ކުލައިގެ ބޯޓުގެ މެދަކާ ހިސާބުން އޮތީ ބޮޑު ބައެއް ވަކިވެފަ އެވެ. އެ ބޯޓު ލޭންޑްކުރީ އެ ދަތުރަށް ނައްޓައިލި އެއާޕޯޓަށެވެ.

އެއިން ކޮންމެ ބޯޓެއްގައި ވެސް އިނީ އެންމެ މީހެކެވެ. އެއިން އެއްވެސް މީހަކަށް އެއްވެސް ގެއްލުމެއް ނުވެ އެވެ.

ހާދިސާ ހިނގި އެރަފޯ ކައުންޓީގެ ޝެރިފްސް އޮފީހުގެ ތަރުޖަމާނު ޑިޕިއުޓީ ޖޯން ބާޓްމަން ވިދާޅުވި ގޮތުގައި އެ މީހުން ލަފާކުރީ ދެ ބޯޓް ޖެހުނު ހާދިސާގެ ސަބަބުން ވަރަށް ބޮޑު ގެއްލުމެއް ކުރިމަތިވާނެ ކަމަށެވެ.

"އެކަމަކު މިއީ ހަމަ އަޖައިބެއް ކަހަލަ ހާދިސާއެއް. ހަމަ ވަރަށް ސޭފްކޮށް ދެ ބޯޓު ވެސް ލޭންޑްކުރީ. މީގެ ކުރިން ދުވަހަކު ވެސް ނުދެކެން ވައިކުޑަ ހަރުކޮށްފައި ހުރި ބޯޓެއް އެހާ ސޭފްކޮށް ލޭންޑްކުރި ތަނެއް ވެސް،" އެ ބޯޓަކީ ސިރިސް އެސްއާރް22 މަރުކާގެ އެއްޗެއްކަން ފާހަގަކުރަމުން އޭނާ ވިދާޅުވި އެވެ.