ހާމިދު ދެ އަހަރަށް ޖަލަށްލީ ރަނގަޅަށް: ސުޕްރީމް ކޯޓު

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ ޚިޔާނާތާ ގުޅިގެން ވިޔަފާރިވެރިޔާ ހާމިދު އިސްމާއިލް ދެ އަހަރަށް ޖަލަށްލާން ކުރި ހުކުމް ސުޕްރީމް ކޯޓުން ވެސް މިއަދު ދަމަހައްޓައިފި އެވެ.

ހާމިދު ދެ އަހަރާއި ނުވަ މަހަށް ޖަލަށްލާން ކްރިމިނަލް ކޯޓުން 2016 ގައި ހުކުމްކުރީ ޅ. މާބިންހުރާ ކުއްޔަށް ދޫކުރުމުން ދައުލަތަށް ލިބެންޖެހޭ ފަސް މިލިއަން ޑޮލަރަށް ޚިޔާނާތްތެރިވި މައްސަލާގަ އެވެ. އެ މައްސަލާގައި ހާމިދުގެ އިތުރުން ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަށް އަހަރަށް ޖަލަށްލި އެވެ. އަދީބުގެ ޖަލު ހުކުމް ބާތިލް ކުރިޔަސް، ޒިޔަތުުގެ ޖަލު ހުކުމް އޮތީ ދަމަހައްޓައިފަ އެވެ. ހާމިދުގެ ޖަލު ހުކުމް ތަންފީޒުކޮށް ނިމި، 2018 ގައި އޭނާ ވަނީ މިނިވަންވެފަ އެވެ.

ހާމިދުގެ ޖަލު ހުކުމް ހައި ކޯޓުން ދެމެހެއްޓި މައްސަލަ އޭނާގެ ފަރާތުން އިސްތިއުނާފް ކުރުމުން ސުޕްރީމް ކޯޓުން މިއަދު ކުރި ހުކުމުގައިވަނީ ހާމިދުގެ މައްޗަށް ކުށް ސާބިތުވާ މިންވަރުގެ ހެކި ދައުލަތުން ހުށަހަޅާފައިވާ ކަމަށެވެ. އެކަމަކު ހާމިދުގެ މައްޗަށް ދަށު ކޯޓުން ކަނޑައެޅީ ގާނޫނުލް އުގޫބާތުގެ ދަށުން އެ ކުށަށް ދޭންޖެހޭ އަދަބަށް ވުރެ ކުޑަ އަދަބެއް ކަމަށާއި އަދި ގާނޫނުލް އުގޫބާތު އޮތްގޮތުން ހާމިދުގެ މައްޗަށް އަންނަން ޖެހޭނީ ތިން އަހަރުގެ ޖަލު ހުކުމެއް ކަމަށް އެ ހުކުމުގައިވެ އެވެ. އެކަމަކު އަދަބުގެ ބައި ދައުލަތުން އިސްތިއުނާފް ކޮށްފައި ނެތުމުން އެ އަދަބަށް މިހާރު ބަދަލު ނުގެނެވޭނެ ކަމަށް އެ ހުކުމުގައިވެ އެވެ.

އެ މައްސަލަ ބެއްލެވި ތިން ފަނޑިޔާރުންގެ އިއްތިފާގުން ކުރެއްވި ހުކުމުގައިވަނީ ހާމިދުުގެ ޖަލު ހުކުމަށް ބަދަލު ގެންނަންޖެހޭ ސަބަބެއް ނެތް ކަމަށެވެ.

އެ މައްސަލަ ބެއްލެވީ ފަނޑިޔާރު އަލީ ރަޝީދު އާއި ފަނޑިޔާރު މަހާޒް އަލީ ޒާހިރުގެ އިތުރުން ފަނޑިޔާރު ޑރ. މުހައްމަދު އިބްރާހިމެވެ.