ހާލަންޑް ކްލަބް ދޫކޮށްލުމުގެ ފުރުސަތު އެބައޮތް: ޑޯޓްމަންޑް

މިއުނިކް (މާޗް 15) - މި ސީޒަނުގައި ބޮރޫސިއާ ޑޯޓްމަންޑް ނެރޭ ނަތީޖާތަކަށް ބެލުމަށް ފަހު ހާލަތު މެދުވެރިވާ ގޮތަކުން އެ ޓީމުގެ ތަރި އާލިން ބްރައުޓް ހާލަންޑް ވިއްކާލަން ޖެހިދާނެ ކަމަށް އެ ކްލަބުގެ ސްޕޯޓިން ޑިރެކްޓަރު މައިކަލް ޒޯކް ބުނެފި އެވެ.

ގިނަ ކްލަބްތަކަކުން ހާލަންޑްގެ ސޮއި ހޯދަން ކިއޫ ހަދާފައިވަނިކޮށް ޑޯޓްމަންޑުން އޭނާ ގެންދިޔައީ މިދިޔަ އަހަރުގެ ޖެނުއަރީ މަހު ރެޑްބުލް ސަލްޒްބާގަށް 20 މިލިއަން ޔޫރޯގެ ފީއެއް ދައްކާފައި ހަތަރު އަހަރުގެ ކޮންޓްރެކްޓެއްގަ އެވެ. އުމުރުން 20 އަހަރުގެ ހާލަންޑް ދައްކާ ތަފާތު މޮޅު ކުޅުމުގެ ސަބަބުން އޭނާ ހޯދަން މެންޗެސްޓާ ސިޓީ އާއި މެންޗެސްޓާ ޔުނައިޓެޑްގެ އިތުރުން ރެއާލް މެޑްރިޑާއި ބާސެލޯނާ އިން މަސައްކަތްކުރާ ކަމަށް ރިޕޯޓްތައް ބުނެ އެވެ.

ދާދި ފަހުން ހާލަންޑްގެ އޭޖެންޓް މިނޯ ރައިއޯލާ ދިން އިންޓަވިއުއެއްގައި ވަނީ ހާލަންޑް ގަނެވޭނެ ފެންވަރުގެ 10 ވަރަކަށް ކްލަބް ދުނިޔޭގައި އެބައޮތް ކަމަށާއި މި ސީޒަން ނިމުމުން ހާލަންޑްގެ މުސްތަގުބަލާ ގުޅޭ މުހިއްމު ނިންމުމެއް ޑޯޓްމަންޑުން ނިންމަންޖެހޭނެ ކަމަށް ބުނެފަ އެވެ.

ރައިއޯލާގެ ވާހަކަތަކާ ގުޅިގެން އޭރު ޒޯކް ބުނީ ހާލަންޑް އެހާ އަވަހަށް ވިއްކާލަން ޖެހޭނެ ކަމަށް ނުދެކޭ ކަމަށެވެ. އެކަމަކު ޖަރުމަނު މީޑިއާ އަށް ދާދި ފަހުން ދިން އިންޓަވިއުއެއްގައި ޒޯކް ބުނީ ހާލަންޑް ދޫކޮށްލަން ޖެހިދާނެ ފަދަ ހާލަތެއް މިހާރު އެބައޮތް ކަމަށެވެ.

"އަހަރެމެން އެބަޖެހޭ އަންނަ ސީޒަނުގައި ޗެމްޕިއަންސް ލީގުގައި ކުޅެން. އެހެންނޫނީ ހާލަންޑް ވިއްކާލުމަކީ ކުރަން ޖެހިދާނެ ކަމެއް. އެއީ ހާލަންޑް ލެވަލްގެ ކުޅުންތެރިއެއް ހިފެހެއްޓޭނީ އެންމެ ޓޮޕް ލެވަލްގައި އަހަރެމެން އޮވެގެން. މި ބުނީ ޗެމްޕިއަންސް ލީގު ފަދަ މުބާރާތްތަކުގައި އޮވެގެން،" ޒޯކް ބުންޏެވެ.

ހާލަންޑް ވަނީ މި ސީޒަނުގައި މިހާތަނަށް ހުރިހާ މުބާރާތެއްގައި ޑޯޓްމަންޑަށް 31 ގޯލު ޖަހައިދީފަ އެވެ.

ޑޯޓްމަންޑް މި ވަގުތު އޮތީ ޖަރުމަނު ލީގުގެ ފަސް ވަނައިގަ އެވެ. އެއީ 25 މެޗުން 42 ޕޮއިންޓާ އެކު އެވެ. ޖަރުމަނު ލީގުން ޗެމްޕިއަންސް ލީގުގެ ޖާގަ ލިބެނީ ގަދަ ހަތަރު ޓީމަށެވެ. ޑޯޓްމަންޑް ވަނީ ސެވިއްޔާ ކަޓުވާލުމަށް ފަހު ޗެމްޕިއަންސް ލީގުގެ ކުއާޓާ ފައިނަލުން ފުރުސަތު ހޯދައިފަ އެވެ.