ޓޭލާ ސްވިފްޓްގެ ދެވަނަ އަލްބަމް "ފިއަލެސް" އާ ލަވަތަކެއް ހިމަނައިގެން ނެރެނީ

މިދިޔަ އަހަރު ދެ އަލްބަމް ނެރުނު އެމެރިކާގެ މަޝްހޫރު ލަވަކިޔުންތެރިޔާ ޓޭލާ ސްވިފްޓް ނެރުނު ކެރިއަރުގެ ދެވަނަ އަލްބަމް "ފިއަލެސް" ކުރީގެ ލަވަތަކާ އެކު، ބައެއް އާ ލަވަތައް ހިމަނައިގެން އަލުން ނެރެން ނިންމައިފި އެވެ.

މިކަން ސޯޝަލް މީޑިއާގައި ވެސް ހިއްސާކޮށް ހުނަރުވެރި ލަވަކިޔުންތެރިޔާ ވަނީ "ފިއަލެސް" ގެ ލަވަތަކުގެ ތެރޭގައި ހިމެނޭ "ލަވް ސްޓޯރީ" އާ ވާޝަނެއް ވެސް ހުކުރު ދުވަހު ނެރެފަ އެވެ.

"ފިއަލެސް" އަންނަ އެޕްރީލް މަހުގެ 9 ގައި އަލުން ނެރޭ އިރު އަލްބަމްގައި ޖުމްލަ 26 ލަވަ ހިމެނޭނެ އެވެ. އޭގެ ތެރެއިން ހަަ ލަވަ އަކީ މުޅިން އާ ލަވަތަކެވެ.

ދިހަ ގްރެމީ އެވޯޑް ވެސް ހާސިލުކޮށްފައިވާ ޓޭލާ ބުނި ގޮތުގައި އަލްބަމްގައި އަލަށް ހިމެނޭ ލަވަތަކަކީ އޭނާގެ ފުރާވަރުގެ ދުވަސްވަރު ތައްޔާރުކުރި ލަވަތެކެވެ.

އެގޮތުން އެ ހަ ލަވަ އަކީ އުމުރުން 16-18 އަހަރާ ދެމެދު ހަދާފައިވާ އެކަމަކު ކުރިން އެއްވެސް ވަރަކަށް އަޑު އަހާފައި ނުވާނެ މުޅިން އާ ލަވަތަކެއް ކަމަށް ބުންޏެވެ.

ޓޭލާގެ "ފިއަލެސް" އަކީ 2008 ގައި ނެރުނު އަލްބަމެކެވެ. އޭނާގެ އަލަތު އަލްބަމަކީ އަމިއްލަ ނަން ދީފައިވާ 2006 ގެ "ޓޭލާ ސްވިފްޓް" އެވެ.

ކާމިޔާބު ލަވަކިޔުންތެރިޔާ މިހާތަނަށް ނުވަ އަލްބަމް ނެރެފައިވާ އިރު މިދިޔަ އަހަރު ނެރުނު ދެ އަލްބަމަކީ ޖުލައިގައި ނެރުނު "ފޯކްލޯ" އާއި ޑިސެމްބަރުގައި ނެރުނު "އެވަމޯ" އެވެ.