އަދާލަތު ޕާޓީގެ ރައީސަކަށް އަނެއްކާވެސް އިމްރާން އިންތިޚާބުކޮށްފި

އަދާލަތު ޕާޓީގެ ރައީސަކަށް ޝެއިޚު އިމްރާން އަބްދުﷲ އަނެއްކާވެސް މިރޭ އިންތިޚާބުކޮށްފި އެވެ. މިއީ އެ ޕާޓީގެ ރައީސްކަމަށް އޭނާ އިންތިޚާބުކުރި ދެވަނަ ފަހަރެވެ.

މި ސަރުކާރުގެ ކޯލިޝަންގައި ހިމެނޭ އަދާލަތު ޕާޓީގެ ރައީސާއި ނައިބު ރައީސް ހޮވުމަށް އޮންލައިންކޮށް ބޭއްވި އިންތިޚާބުގެ ވަގުތީ ނަތީޖާ ދައްކާ ގޮތުން، ރައީސްގެ މަގާމަށް އިންތިޚާބުކުރީ ހޯމް މިނިސްޓަރުގެ މަގާމުގައި ވެސް ހުންނެވި އިމްރާނެވެ. ނައިބު ރައީސަކަށް އިންތިޚާބުކުރީ، އިމްރާންގެ ރަނިން މޭޓުގެ ގޮތުގައި ހުންނެވި އަހުމަދު ޝަރީފެވެ.

ވަގުތީ ނަތީޖާ ދައްކާ ގޮތުން އިމްރާނަށް ލިބިވަޑައިގަތީ ލިބިވަޑައިގަތީ 921 ވޯޓެވެ. އޭނާއާ ވާދަކުރެއްވި އިސްލާމިކް މިނިސްޓަރު ޑރ. އަހުމަދު ޒާހިރަށް ހޯއްދެވުނީ 167 ވޯޓެވެ.

އީ-ވޯޓިން ނިޒާމެއްގެ ތެރެއިން ކުރިޔަށް ގެންދިޔަ މި އިންތިހާބުގައި 1،088 މީހުން ވޯޓުލި ކަމަށް އަދާލަތު ޕާޓީން ބުންޏެވެ. ވޯޓުލުމަށް ރަޖިސްޓަރީ ވެފައި ވަނީ 4،556 މީހެކެވެ.

އިންތިހާބާ ގުޅިގެން މިހާތަނަށް ނުވަ ޝަކުވާއެއް ލިބިފައިވާ ކަމަށް ވެސް އަދާލަތު ޕާޓީން ބުނެ އެވެ. އެ ޝަކުވާތަށް ބެލުމަށް ފަހު ކުރިއަށް އޮތް ފަސް ދުވަސް ތެރޭގައި އިންތިހާބުގެ ދާއިމީ ނަތީޖާ އިއުލާން ކުރާނެ ކަމަށް ބުންޏެވެ.