ޝަހީމްގެ ރައްދު އިމްރާނަށް: ކެބިނެޓު ދޫކުރާކަށް ނުޖެހޭ!

އިސްލާމިކް އެފެއާޒް މިނިސްޓަރު ޑރ. މުހައްމަދު ޝަހީމް އަލީ ސައީދު އަދާލަތު ޕާޓީއާ ގުޅިވަޑައިގަންނަވަން ނިންމެވުމާ އެކު، އޭނާ އަށް އަމާޒު ކުރައްވައި އެ ޕާޓީގެ ރައީސް ޝައިހު އިމްރާން އަބްދުﷲ ވިދާޅުވި ވާހަކަ އަށް ޝަހީމް މިރޭ ރައްދު ދެއްވައިފި އެވެ.

އެމްޑީޕީގެ ވެރިކަން 2023 ގައި ބަދަލުވި ފަހުން ސިޔާސީ ގޮތުން ރަސްމީކޮށް ވަކި ފަޅިއަކަށް ނާރާ އޮތް އަދާލަތު ޕާޓީއާ ގުޅިވަޑައިގެން މި އަހަރުގެ ފަހުކޮޅު ބާއްވާ އަދާލަތު ޕާޓީގެ ރައީސްގެ އިންތިހާބުގައި ވާދަކުރައްވާނެ ކަން މިއަދު ހަވީރު ޝަހީމް އިއުލާން ކުރެއްވުމާ އެކު އޭނާއާ ދެކޮޅަށް އަދި އެއްކޮޅަށް ވެސް ވަނީ ބަހުސް ފަށައިފަ އެވެ.

ޝަހީމްއާ ދެކޮޅަށް "އެންމެ ވަރުގަދަ ރައްދެއް" ދެއްވީ އަދާލަތު ޕާޓީގެ ހަރަކާތްތަކާ މި ވަގުތު ވަރަށް ދުރުގައި ތައިލެންޑުގައި ދިރިއުޅުއްވާ އެ ޕާޓީގެ ރައީސް އިމްރާނެވެ.

އިމްރާން ވިދާޅުވީ "ރައީސް މުއިއްޒުގެ ދޯހަޅިކަމާ ހުރެ ގައުމު ވެއްޓިފައި މި އޮތް ހާލަތުން ސަލާމަތް ކުރުމަށް" ހާލިސްކަމާ އެކު މިހާރުގެ ކެބިނެޓު ދޫކުރައްވައި އަދާލަތު ޕާޓީގެ ލީޑަޝިޕަށް ޝަހީމް ވާދަކުރައްވާ ނަމަ އެކަމަށް އުފަލާ އެކު މަރުހަބާ ދަންނަވާ ކަމަށެވެ.

އެކަމަކު، އޭގެ ރައްދުގައި ޝަހީމް ވިދާޅުވީ، އަދާލަތު ޕާޓީގެ ލީޑަޝިޕަށް ވާދަކުރައްވަން ކެބިނެޓު ދޫކުރައްވަން ޖެހިވަޑައިނުގަންނަވާނެ ކަމަށެވެ. އަދި އެ ޕާޓީގެ މެމްބަރަކު ކެބިނެޓުގައި ހުންނެވުމަށް ވެސް އަސާސީ ގަވާއިދު މަނާ ނުކުރާ ކަމަށް އޭނާ ވިދާޅުވި އެވެ.

"އަދާލަތު ޕާޓީގެ ރައީސްކަމަށް މެމްބަރުން އަޅުގަނޑު އިންތިހާބު ކުރައްވައިފި ނަމަ ކޮންގްރެސް އިން ނިންމާ ގޮތަކަށް ޕާޓީ އާއިގެން ކުރިއަށް ދާނަން، އިންޝާ ﷲ،" ޝަހީމްގެ ރައްދުގައި ވިދާޅުވި އެވެ

އަދާލަތު ޕާޓީގެ އެންމެ ސީނިއާ މުއައްސިސުންގެ ތެރޭގައި ވެސް ހިމެނިވަޑައިގަންނަވާ ޝަހީމް ވަނީ އެ ޕާޓީގައި 12 އަހަރު ހިދުމަތް ކުރައްވައިފަ އެވެ. އަދި އަދާލަތު ޕާޓީގެ ސްލޮޓެއްގައި ކުރީގެ ރައީސް މުހައްމަދު ވަހީދުގެ ވެރިކަމުގައި އިސްލާމިކް މިނިސްޓަރުކަން ވެސް ކުރެއްވި އެވެ.

ރައީސް މުއިއްޒުގެ ސަރުކާރު ދިފާއު ކުރުމުގައި އެންމެ އިސްކޮށް އުޅުއްވާ ބޭފުޅުންގެ ތެރޭގައި ހިމެނިވަޑައިގަންނަވާ ޝަހީމަކީ މިހާރު އެއްވެސް ސިޔާސީ ޕާޓީއެއްގެ މެމްބަރެއް ނޫން ކަމަށް އޭނާ ވިދާޅުވި އެވެ.

ޝަހީމް ވިދާޅުވި ގޮތުގައި ޕީޕީއެމް އުވުމާ ހަމައަށް އޭނާ ހުންނެވީ އެ ޕާޓީގަ އެވެ. ނަމަވެސް އޭގެ ފަހުން ޕީއެންސީއާ ވެސް ގުޅިވަޑައިނުގަންނަވާ ކަމަށް ޝަހީމް ވިދާޅުވި އެވެ.

އަދާލަތު ޕާޓީއާ އަލުން ގުޅިވަޑައިގަތުމަށް ޝަހީމް ނިންމެވުމުން އިމްރާންގެ ބަހުގެ ހަމަލައެއް ދެއްވި ނަމަވެސް އެ ޕާޓީގެ ލީޑަޝިޕްގެ އެހެން ބައެއް ބޭފުޅުން ވަނީ ޝަހީމްގެ ނިންމެވުމަށް މަރުހަބާ ވިދާޅުވެފަ އެވެ.

އޭގެ ތެރޭގައި އަދާލަތު ޕާޓީގެ އިލްމުވެރިންގެ މަޖިލީހުގެ ރައީސް ޝައިހު އިލްޔާސް ހުސައިނާއި އެ ޕާޓީގެ ނައިބު ރައީސް އަބްދުﷲ ރަޝީދާއި އިލްމުވެރިންގެ މަޖިލީހުގެ މެމްބަރު ޝައިހު މުހައްމަދު އަނިލް އާއި ޑރ. އިޔާޒް މުހައްމަދު ލަތީފް ވެސް ހިމެނިވަޑައިގަންނަވަ އެވެ.

ރާއްޖޭގެ ސިޔާސީ ކަންކަމުގައި އަދާލަތު ޕާޓީ މިހާރު "ހިމޭނުން" އޮތަސް އެ ޕާޓީގެ ރައީސް އިމްރާން ދޭތެރެދޭތެރެއިން ސޯޝަލް މީޑިއާގައި އޭނާގެ ހިޔާލު އެކި ކަންކަމުގައި ފާޅުކުރައްވަ އެވެ.