ދެއްވަދޫން އިތުރު 17 މީހަކު ކޮވިޑަށް ޕޮޒިޓިވްވެ އެކްޓިވް ކޭސްތައް 30 އިން މައްޗަށް

ގއ. ދެއްވަދޫން އިތުރު 17 މީހަކު ކޮވިޑަށް ޕޮޒިޓިވްވެއްޖެ އެވެ.

އެ ރަށު ކައުންސިލްގެ މެމްބަރަކު މިއަދު ވިދާޅުވީ ރޭގެ 12 އާ ހަމައަށް 17 މީހަކު ޕޮޒިޓިވްވިކަން އަންގާފައިވާ ކަމަށެވެ. އެއާއެކު އެ ރަށުގައި އެކްޓިވް ކޭސްތަކުގެ އަދަދު 33 އަށް އެރީ އެވެ.

އެންމެ ފަހުން ޕޮޒިޓިވްވެފައިވަނީ ޑައިރެކްޓް ކޮންޓެކްޓަކަށް ވެގެންނާއި ރެންޑަމްކޮށް ސާމްޕަލް ނެގި ބައެއްގެ އެވެ. އެ ތަނުން އެއްވެސް މީހެއްގެ ހާލު ސީރިއަސް ނޫން ކަމަށް ކައުންސިލުން ބުނެ އެވެ. އެހެންވެ އެ މީހުން ބައިތިއްބާފައިވަނީ އެ މީހުންގެ ގޭގަ އެވެ.

ދެއްވަދޫން 10 މީހަކު ކޮވިޑަށް ޕޮޒިޓިވްވުމުން އެ ރަށް މޮނިޓަރިންގެ ހާލަތަށް ގެނައީ މިދިޔަ ބުރާސްފަތި ދުވަހެވެ.

ކައުންސިލް މެމްބަރު ވިދާޅުވިގޮތުގައި ޕޮޒިޓިވްވި މީހުންގެ އެވްރެޖް އުމުރު އުޅެނީ 18-50 ގަ އެވެ. އެ ރަށުން މިހާތަނަށް ޕޮޒިޓިވްވި އުމުރުން އެންމެ ދުވަސްވީ މީހަކީ 70 އަހަރުގެ ފިރިހެނެކެވެ. އޭނާ ވަނީ އެ އަތޮޅު ވިލިނގިލީގައި ހަދާފައިވާ ކޮވިޑް ފެސިލިޓީއަށް ބަދަލުކޮށްފަ އެވެ.

"އެއްވެސް މީހެއްގެ ހާލު ސީރިއަސްއެއް ނޫން އިރާދަކުރެއްވިއްޔާ،" އޭނާ ވިދާޅުވި އެވެ.

ދެއްވަދޫން 200 އަށްވުރެ ގިނަ މީހުން ޓެސްޓުކޮށްފައިވާއިރު މިހާރު ވެސް ސާމްޕަލް ނަގަމުން އެބަ ދެ އެވެ. ޓެސްޓުކުރުމަށް ސާމްޕަލް ފޮނުވަނީ މާލެއަށެވެ.

ރަށުގެ 56 ގެ މި ވަގުތު އޮތީ ކަރަންޓީނުގެ ހާލަތުގަ އެވެ. ބާކީ ހުރީ 150 ވަރަކަށް ގެ އެވެ.