އާކްޓިކު ސަރަހައްދުން ކަނޑު އަޑިން ގޮތް ނޭނގޭ އަޑެއް އިވެނީ

އޮޓާވާ (ނޮވެމްބަރު 5) - އާކްޓިކް ނުވަތަ ނޯތު ޕޯލް ހިމެނޭ ސަރަހައްދުގެ ކަނޑު އަޑިން ގޮތް ނޭނގޭ އަޑެއް އިވެމުންދާތީ ކެނެޑާ ސިފައިން އެކަން ބަލަން ފަށައިފި ކަމަށް އޮފިޝަލުން ބުނެފި އެވެ.

އެލާމެއް ގޮތަށް އިވޭ އަޑު ރިޕޯޓްކޮށްފައި ވަނީ އެ ސަރަހައްދުގައި އުޅޭ ބައެއް މީހުންނެވެ. އޮފިޝަލުން ބުނީ މި އަޑު އިވޭތީ އެއީ ކިހިނެއްވާ ކަމެއްތޯ ބެލުމަށް މަތިންދާ ބޯޓުތަކުން މަލްޓި ސެންސާ ބޭނުންކޮށްގެން ބެލުންތައް ވެސް ބަލާފައިވާ ކަމަށެެވެ. ނަމަވެސް އެއީ ކޮން ގޮތަކުން އިވޭ އަޑެއްކަން މިހާތަނަށް ހޯދިފައި ނުވާ ކަމަށް ކެނެޑާ ސިފައިން ބުނެ އެވެ. އެ ސަރަހައްދު އޮބްޒާވް ކުރި ސިފައިންނަށް އެ ތާނގައި އުޅޭ ކަމަށް ފާހަގަވީ ވޭލް އާއި ވޯލްރަސް އެވެ. އޮޓާވާގެ ނޭޝަނަލް ޑިފެންސް ޑިޕާޓްމަންޓުގެ ތަރުޖަމާނަކު ވެސް ބުނީ އެކި ގޮތް ގޮތުން ހޯދުންތައް ހޯދަމުން ދިޔަ އިރު ވެސް އެ އަޑު އިވޭ ސަބަބެއް ނޭނގުނު ކަމަށެވެ.

ގާނޫނު ހަދާ މަޖިލީހުގެ މެންބަރެއް ކަމަށްވާ ޕޯލް ގުއައްސާ ބުނީ ސަމާގެ ދުވަސްވަރު އެ އަޑު މެދު ނުކެނޑި އިވޭ ކަމަށާއި އަދި އެއީ ސަމާ އާއި ވިންޓާގައި ޝިކާރަ ކުރުމަށް މަޝްހޫރު ސަރަހައްދެއް ކަމަށެވެ.

އިވެމުންދާ ގޮތް ނޭނގޭ އަޑާ ބެހޭ ގޮތުން ކެނެޑާގެ ނޫސްތަކުން ތަފާތު ގޮތް ގޮތަށް ވާހަކަތައް ފަތުރާފައިވެ އެވެ. މީގެ ތެރޭން އެއްގޮތެއް ކަމަށް ބުނެފައި ވަނީ އަޑު އިވެމުން ދަނީ މައިނިން ކުންފުންޏަކުން ކުރިއަށް ގެންދާ ސޯނާ ސާވޭއެއްގެ ސަބަބުން ކަމަށެވެ. އެއް ތިއަރީ އަކީ އެއީ އެ ސަރަހައްދުން ޝިކާރަކޮށްފާނެތީ ޖަނަވާރުތައް ދުރުކުރަން ގްރީންޕީސް އިން ގަސްދުގައި ފޮނުވަމުންދާ އަޑެއް ކަމަށެވެ. އަނެއް ބަޔަކު ބުނަނީ އެއީ އަސްކަރީ ސަބްމެރިންއެއްގެ އަޑު ކަމަށެވެ.

ނަމަވެސް މައިން ނަގާ ކުންފުނިތަކުން ބުނެފައި ވަނީ އެ ސަރަހައްދުގައި އެއްވެސް މަސައްކަތެއް ނުކުރާ ކަމަށެވެ. ގްރީންޕީސް އިން ވެސް ބުނެފައި ވަނީ އެ މީހުން އެއްވެސް ކަމެއް ނުކުރާ ކަމަށެވެ. އަދި ކެނެޑާ ސިފައިން ވަނީ އެ ސަރަހައްދުގައި ސަބްމެރިންނެއް ދަތުރު ނުކުރާނެ ކަމަށް ބުނެފަ އެވެ.