ޗައިނާގައި ރާއްޖެ އިޝްތިހާރު ކުރަން ބޮޑު ދެ އިވެންޓެއް

ޗައިނާގައި ރާއްޖެ އިޝްތިހާރު ކުރުމަށް އެމްއެމްޕީއާރުސީން އެ ގައުމުގައި ދެ ކެމްޕޭނެއް ފަށައިފި އެވެ.

އެމްއެމްޕީއާރުސީން ބުނި ގޮތުގައި ޗައިނާގައި ކުރިއަށްގެންދަނީ އޮންލައިން ރޯޑް ޝޯއަކާއި ވީޗެޓު މެދުވެރިކޮށް ހިންގާ ކެމްޕޭނެކެވެ. މީގެ ތެރެއިން އޮންލައިން ރޯޑް ޝޯގައި ލައިވް ވެބިނާތަކާއި އޮންލައިން އެގްޒަބިޝަންތަކާއި "ވަން އޮން ވަން" ބައްދަލުވުންތައް ހިމެނޭނެ އެވެ.

ލައިވް ވެބިނާ އަކީ ޗައިނާގެ ޓޫރިސްޓުންނަށް ރާއްޖެ އަކީ މި ވަގުތު ވެސް ރައްކާތެރި މަންޒިލެއްކަން ކަށަވަރުކޮށްދިނުމަށް ބާއްވާ ވެބިނާއެއް ކަަމަށް އެމްއެމްޕީއާރުސީން ބުންޏެވެ. އަދި އޮންލައިން އެގްޒެބިޝަނުގައި ރާއްޖެއަށް ދަތުރުކުރުމާ ގުޅޭ އެންމެ ފަހުގެ މައުލޫމާތު ހިއްސާކުރާނެ ކަމަށް އެ ކުންފުނިން ބުންޏެވެ. މި އެގްޒަބިޝަން ކުރިއަށްދާނީ އަންނަ އަހަރުގެ ފެބަރުއަރީ މަހުގެ ނިޔަލަށެވެ.

އެމްއެމްޕީއާރުސީގެ އޮންލައިން ރޯޑް ޝޯގައި ރާއްޖޭގެ ޓޫރިޒަމް ދާއިރާގެ 11 ކުންފުންޏަކުން ބައިވެރިވާނެ އެވެ.

ވީ ޗެޓުގެ "އިންފޮމޭޝަން ޕޯޓަލް ފޯ ޓްރެވަލް ޓްރޭޑް"ގައި ކުރިއަށްގެންދާ ކެމްޕޭނަކީ އެ ޕޯޓަލް މެދުވެރިކޮށް ރާއްޖެއަށް ދަތުރުކުމާގުޅޭ އެންމެ ފަހުގެ މައުލޫމާތު ފޯރުކޮށްދިނުމަށް ހިންގާ ކެމްޕޭނެކެވެ. ޗައިނާގެ އެންމެން ކަހަލަ ގޮތަކަށް ވީޗެޓް ބޭނުންކުރެ އެވެ.

ކޮވިޑް-19ގެ ސަބަބުން ރާއްޖޭގެ ބޯޑަރު ބަންދުކުރުމާ ހަމައަށް ރާއްޖެއަށް އެންމެ ގިނަ ޓޫރިސްޓުން އައީ ޗައިނާއިންނެވެ. ނަމަވެސް ކޮވިޑް-19އާ ހެދި ޗައިނާ ޓޫރިސްޓުން އައުން ވަނީ ހުއްޓިފަ އެވެ.