އިންތިހާބަށް 3،000އަށް ވުރެ ގިނަ ފުލުހުން ނެރޭނެ: ޕޮލިސް

އަންނަ ޖެނުއަރީ މަހު ބާއްވާ ލޯކަލް ކައުންސިލް އިންތިހާބުގެ ސެކިއުރިޓީ ބެލެހެއްޓުމަށް 3،000އަށް ވުރެ ގިނަ ފުލުހުން ނެރޭނެ ކަމަށް ފުލުސް އޮފީހުން މިއަދު ބުނެފި އެވެ.

އިންތިހާބުގެ ސެކިއުރިޓީ އާއި އެހެން ކަންކަމާ ގުޅޭގޮތުން، އިލެކްޝަންސް ކޮމިޝަނަށް އެހީތެރިކަން ދިނުމަށް އިސްކަންދަރު ބިލްޑިންގައި ބޭއްވި ސޮއި ކުރުމުގެ ރަސްމިއްޔާތުގައި، ފުލުހުންގެ ސެންޓްރަލް އޮޕަރޭޝަންސް ކޮމާންޑަރު ހަމްދޫން ރަޝީދު ވިދާޅުވީ އިންތިހާބަށް ފުލުހުންގެ ސެކިއުރިޓީ ވަރަށް ވަރުގަދަ ކޮށްފައިވާ ކަމަށެވެ.

އެގޮތުން މިހާރު ޓްރެއިނިން ހަދަމުން އަންނަ ފުލުހުންނާއެކު، 3،000އަށް ވުރެ ގިނަ ފުލުހުން އިންތިހާބުގެ ސެކިއުރިޓީ ބެލެހެއްޓުމުގައި އުޅޭނެ ކަމަށް ވިދާޅުވި އެވެ.

ސިނާއީ ރަށްތަކާއި ރިސޯޓުތަކުގެ އިތުރުން ރާއްޖޭގެ ހުރިހާ ރަށެއްގައި 470 ވޯޓު ފޮށި ބަހައްޓާއިރު މި ހުރިހާ ފޮއްޓެއްގެ ސެކިއުރިޓީ ބެލެހެއްޓުމަށް ފުލުހުން ހަރަކާތްތެރިވާނެ އެވެ. އަދި އަންނަ މަހު 14ގައި އިންތިހާބު ބާއްވާއިރު އާއި ވޯޓުގެ ނަތީޖާ ގުނާއިރު އެ ސަރަހައްދުތަކުގެ ސެކިއުރިޓީ ފުލުހުން ބަލަހަައްޓާނެ އެވެ.

"އިންތިހާބުގައި އަޅުގަނޑުމެންގެ މުޅި ޕޮލިސް ފޯސް އެކި ރަށްތަކަށް ބަހާލާނަން. އަޅުގަނޑުމެންގެ ފުލް ސްޓްރެންތުގައި މަސައްކަތް ކުރާނީ،" ހަމްދޫން ވިދާޅުވި އެވެ.

އޭނާ ވިދާޅުވީ އިންތިހާބުގެ ސެކިއުރިޓީ ބެލެހެއްޓުމަށް ވޭތުވެދިޔަ ދެ މަސް ދުވަހުން ފެށިގެން ފުލުހުން ތަމްރީނުކޮށް، އެކި ސަރަހައްދުތަކަށް ފުލުހުން ބަހާލުމުގެ މަސައްކަތް ކުރަމުން އަންނަ ކަމަށެވެ.

އިންތިހާބުގެ ސަލާމަތީ ކަންކަން ބަލަހައްޓައި، އީސީއާއެކު މަސައްކަތް ކުރުމުގެ އެއްބަސްވުމުގައި ފުލުހުންގެ ފަރާތުން ސޮއި ކުރެއްވީ ޕޮލިސް ކޮމިޝަނަރު އަހުމަދު އަރީފެވެ. އަދި އީސީގެ ފަރާތުން ސޮއި ކުރެއްވީ އެތަނުގެ ރައީސް އަހުމަދުު ސުލައިމާނެވެ.

ނޫސްވެރިންނާ ވާހަކަ ދައްކަވަމުން، އީސީގެ ނައިބު ރައީސް އަމްޖަދު މުސްތަފާ ވިދާޅުވީ އެ އެމްއޯޔޫގެ މައިގަނޑު ބޭނުމަކީ ގާނޫނީ ގޮތުން އެ ކޮމިޝަނުން އަދާ ކުރަން ޖެހޭ ޒިންމާތައް އަދާ ކުރުމުގައި ފުލުހުންގެ އެހީތެރިކަން ހޯދުން ކަމަށެވެ. އަދި އިންތިހާބުގެ ތެރޭގައި އާއި އޭގެ ފަހުން ވެސް ދިމާވާ ގާނޫނީ މަސައްކަތްތަކާއި އިންތިހާބަށް ހުރަސް އެޅޭ އަމަލުތަކާއި ހިންގަފާނެ ހަމަނުޖެހުންތައް ހައްލު ކުރުމަށް ފުލުހުންނާ ގުޅިގެން މަސައްކަތް ކުރުން، އެމްއޯޔޫގެ މަގްސަދުތަކުގެ ތެރޭގައި ހިމެނޭ ކަމަށް ވިދާޅުވި އެވެ.

ފުލުހުން ބުނީ އެހެން ފަހަރުތަކެކޭ އެއްގޮތަށް މި އަހަރުގެ އިންތިހާބަކީ ވެސް އަމާން އޮމާން، އަދި ކެންޑިޑޭޓުންނާއި އާއްމުންނަށް މިނިވަންކަމާއެކު ވޯޓުލެވޭނެ އިންތިހާބަކަށް ހެދުމަށް މަސައްކަތް ކުރާނެ ކަމަށެވެ.

ލޯކަލް ކައުންސިލް އިންތިހާބުގައި ބައިވެރިވުމުގެ ފުރުސަތު މިހާރު ހުޅުވާލާފައިވާއިރު، ޖުމުލަ 653 ކައުންސިލަރުން އިންތިހާބު ކުރާނެ އެވެ.