ޑީޖޭއޭގެ އިހުމާލުން ގެއްލުނު ކެންޑިޑެސީ އަލުން ދޭން އަންގައިފި

ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ އިހުމާލެއްގެ ސަބަބުން ރ. ދުވާފަރު ކައުންސިލްގެ ބައި އިލެކްޝަންގައި ވާދަކުރުމުގެ ފުރުސަތު ގެއްލުނު މީހަކަށް އެ ފުރުސަތު ދޭން ސުޕްރީމް ކޯޓުން މިއަދު އަމުރުކޮށްފި އެވެ.

މި މަހުގެ ފަހުކޮޅު ބާއްވާ ދުވާފަރު ކައުންސިލްގެ ބައި އިލެކްޝަންގައި ވާދަކުރާ އަބްދުالله ނަޒީމްގެ ކެންޑިޑެސީ ބަލައިނުގަތުމަށް އިލެކްޝަންސް ކޮމިޝަނުން ނިންމީ ޑީޖޭއޭ އިން އޭނާގެ ދަރަނީގެ ރެކޯޑް ދޫކުރިއިރު އޮޅިގެން ބައެއް ރެކޯޑްތައް ހިމަނާފައި ނެތުމުންނެވެ.

ފަހުން ޑީޖޭއޭ އިން އެ ރެކޯޑްތައް ނަޒީމަށް ދިނަސް، އިލެކްޝަންސް ކޮމިޝަނުން ނިންމީ ވަގުތު ހަމަވެފައިވާތީ އެ ލިޔުންތައް ބަލައިނުގަތުމަށާއި އޭނާގެ ކެންޑިޑެސީ ބަލައިނުގަތުމަށެވެ.

އެ މައްސަލަ ނަޒީމްގެ ފަރާތުން ސުޕްރީމް ކޯޓަށް ހުށަހެޅުމުން އެ ކޯޓުން މިއަދު ކުރި ހުކުމުގައި ވަނީ ދަރަނީގެ ރެކޯޑް ފުރިހަމަނުވީ ޑީޖޭއޭ އަށް އެރި އޮޅުމެއްގެ ސަބަބުން ކަން އެ އިދާރާގެ ބަހުން އެނގޭ ކަމަށެވެ. ކޮމިޝަނުން ގޮތެއް ނިންމުމުގެ ކުރިން އެ ދުވަހު އެ ލިޔުންތައް ފުރިހަމަކޮށް. ނަޒީމްގެ ރެކޯޑް ހުށަހަޅާފައިވާތީ އޭނާގެ ކެންޑިޑެސީ ބަލައިގަންނަން ޖެހޭ ކަމަށް ހުކުމުގައިވެ އެވެ.

އެގޮތަށް މައްސަލަ ނިންމީ ފަނޑިޔާރު ހުސްނުއްސުއޫދާއި ފަނޑިޔާރު މަހާޒް އަލީ ޒާހިރު އަދި ފަނޑިޔާރު އައިޝާ ޝުޖޫންގެ އިއްތިފާގުންނެވެ.