ޝާފީ އާއި ބެންޖޯ ސަސް އަށް

ފުރަތަމަ ޑިވިޝަނުގައި ގިނަ އަހަރުތަކެއް ވަންދެން ކުޅެފައިވާ ތަޖުރިބާކާރު ދެ ޑިފެންޑަރުން ކަމަށްވާ އަހުމަދު ޝާފިއު (ޝާފީ) އަދި އަބްދުﷲ ހަނީފް (ބެންޖޯ) މި ފަހަރު އަލަށް ފުރަތަމަ ޑިވިޝަނުގައި ވާދަކުރާ ސުޕަ ޔުނައިޓެޑް ސްޕޯޓްސް (ސަސް) އަށް ސޮއިކޮށްފި އެވެ.

އަހުމަދު ނާޝިދު (ނާދު)ގެ ކޯޗުކަމުގައި ކުޅޭ ސަސް އަށް މި ފަހަރު ސޮއިކުރި ކުޅުންތެރިންގެ ތެރޭގައި ޝާފީ އާއި ބެންޖޯގެ އިތުރުން ޓީސީ ސްޕޯޓްސް ކްލަބްގެ ކެޕްޓަން އަހުމަދު ފައްރާހު (ފައްރަ) ހިމެނެ އެވެ. އަދި ކުރިން ޓީސީ އާއި ދެ ވަނަ ޑިވިޝަނުގެ ޓީމުތަކަށް ކުޅެފައިވާ ޒުވާން ކުޅުންތެރިޔާ އަހުމަދު އައިހަމް ސަސް އަށް ސޮއިކުރިއިރު، ސަސް އަށް މިދިޔަ އަހަރުތަކުގައި ކުޅުނު އަހުމަދު ފަރުހާން (ގައްބެ) ވެސް ވަނީ އެ ޓީމާ އެކު ހަދާފައިވާ ކޮންޓްރެކްޓް އާ ކޮށްފަ އެވެ.

ސަސް އަކީ އައްޑު އަށް އުފަން ބެންޖޯ، 35، ފުރަތަަމަ ޑިވިޝަނުގައި ކުޅޭ ހަތް ވަނަ ކްލަބް އެވެ. އައިއެފްސީން ފަށައި އެ ޓީމުގެ ނަން ވީބީ އައްޑޫ އެފްސީ އަށް ބަދަލުކުރި ފަހުން ވެސް އެ ޓީމަށް ކުޅުނެވެ. އޭގެ ފަހުން ބެންޖޯ ވަނީ ނިއު ރޭޑިއަންޓާއި ކްލަބް ވެލެންސިއާ، މާޒިޔާ އަދި ކްލަބް އީގަލްސް އަށް ވެސް ކުޅެފަ އެވެ. އޭނާ އެންމެ ފަހުން ފެނުނީ ޓީސީންނެވެ. ޑިފެންޑަރެއްގެ އިތުރުން ޑިފެންސިވް މިޑްފީލްޑަރަކަށް ވެސް ކުޅޭ ބެންޖޯ ވަނީ ފުރަތަމަ ޑިވިޝަނުގައި އެތައް ކާމިޔާބީތަކެއް ހޯދައިފަ އެވެ.

ގައުމީ ޓީމުގެ ޑިފެންސްލައިނުގައި ގިނަ މެޗުތަކެއް ކުޅެފައިވާ ޝާފީ، 33، ވަނީ ފުރަތަމަ ޑިވިޝަނުގެ ގިނަ ކްލަބްތަކަށް ކުޅެފަ އެވެ. ސަސް އަކީ ފުރަތަމަ ޑިވިޝަނުގައި ޝާފީ ވެސް ފެންނާނެ ހަތް ވަނަ ކްލަބް އެވެ. އޭނާ ވަނީ މާޒިޔާ، ނިއު ރޭޑިއަންޓް، ވެލެންސިއާ، ގްރީން ސްޓްރީޓްސް، ވިކްޓްރީ އަދި ޔުނައިޓެޑް ވިކްޓްރީ އަށް މީގެ ކުރިން ކުޅެފަ އެވެ. ފުރަތަމަ ޑިވިޝަނުގެ ގިނަ ކުޅުންތެރިންތަކެއް ނިސްބަތްވާ ބ، އޭދަފުށްޓައް ނިސްބަތްވާ ޝާފީ އަކީ ޑިފެންޑަރެއްގެ އިތުރުން މެދުތެރެއަށް ވެސް ކުޅޭ ކުޅުންތެރިއެކެވެ.

މީގެ ކުރިން ސަސްގެ އޮފިޝަލަކު "މިހާރު" އަށް ބުނީ މިއީ އެ ކްލަބް ފުރަތަމަ ޑިވިޝަނުގައި ކުޅޭ ފުރަތަމަ އަހަރު ކަމަށްވާތީ ސަސްގެ ވިސްނުން އޮތީ މި ޑިވިޝަނުގައި އޮވެލުމަށާއި ގަދަ ހައެއްގެ ތެރޭގައި ހިމެނޭ ވަރުގެ ސްކޮޑެއް އެކުލަވާލުމަށެވެ. އެ ގޮތުން އެ ޓީމުގެ ވިސްނުމަކީ ފުރަތަމަ ޑިވިޝަނުގައި ކުރިން ކުޅެފައިވާ 10 ވަރަކަށް ކުޅުންތެރިންގެ އިތުރުން ކީޕަރެއް ހިމެނޭ ގޮތަށް ބިދޭސީ ހަތަރު ކުޅުންތެރިން ގެންނާށެވެ.

ކުޅުންތެރިން ގެނެސް ޓީމު އެކުލަވާލުމަށް ފަހު ވަރަށް އަވަހަށް ސަސްގެ ޕްރެކްޓިސްތައް ފަށަން ވަނީ ނިންމައިފަ އެވެ.