ކޮވިޑް ކޭހެއް ފެނުމުން، ކުޅުދުއްފުށްޓަށް އަރައިފޭބުން މަނާކޮށްފި

އުތުރުގެ އެންމެ އާބާދީ ބޮޑު ރަށް، ހދ. ކުޅުދުއްފުށްޓާ މާލެއާ ދެމެދު ދަތުރުކުރާ ބޯޓެއްގެ ކެޕްޓަން ކޮވިޑަށް ޕޮޒިޓިވް ވުމާ ގުޅިގެން ކުޅުދުއްފުށި މޮނިޓަރިން އަށް ލައިފި އެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިރޭ ބުނީ ކުޅުދުއްފުށްޓަށް އަރައި ފޭބުން މަނާކޮށްް މޮނިޓާ ކުރަން ފެށީ އެރަށުގެ އުޅަނދަކުން ކޮވިޑްގެ ކޭހެއް ފެނިގެން ކަމަށާއި އެ ރަށް މޮނިޓަރިން އަށް ލާފައި ވަނީ ކޮންޓެކްޓް ޓްރޭސިން ނިމެންދެން ކަމަށެވެ.

ކުޅުދުއްފުށީ ކައުންސިލަށް އެޗްޕީއޭއިން ފޮނުވި ލިއުމުގައިވާ ގޮތުން އެ ރަށަށް އަރާ ފޭބުން މަނާކުރީ މިރޭ 8:45 އިން ފެށިގެންނެވެ. އެ ލިއުމުގައި އަންގާފައި އޮތީ އެޗްޕީއޭއިން ވަކި ގޮތެއް އަންގަންދެން އެ ރަށަށް އަރައި ފޭބުން މަނާކޮށްފައިވާ ކަމަށެވެ.

ރާއްްޖޭގައި ކޮވިޑް 19- ފެތުރެން ފެށިފަހުން މާލެއާ ގުޅުމެއް ނެތް ކޭހެއް އަދި ނުފެނެ އެވެ. ރާއްޖޭގައި އެބަލި ޖެހުނު މީހުންގެ އަދަދު 10،000 ވުރެ މަތިވީ މިރެ އެވެ. އެ އަދަދަށް މީހުންނަށް ބަލި ޖެހުނު އިރު މާލެ ފިޔަވާ އެ ބަލީގެ މީހުން ފެނިފައި ވަނީ ކުޅުދުއްފުށްޓާ އެކު 25 ރަށުންނެވެ. އޭގެ އިތުރުން 15 ރިސޯޓަކުން ވެސް ކޭސްތައް ފެނިފައި ވެއެވެ.

ރާއްޖޭން ކޮވިޑް ޖެހުނު މީހުންގެ ތެރެއިން 34 މީހަކު އެބަލީގައި މަރުވި އިރު 8500 އަށް ވުރެ ގިނަ މީހުން ވަނީ އެ ބަލިން ރަނގަޅުވެފަ އެވެ. އެކްޓިވް ކޭސްތަކުގެ އަދަދަކީ މިހާރު 1308 އެވެ.