މުހިއްމު މަސައްކަތްތަކަށް ރަށްރަށަށް ދާ މީހުން ކަރަންޓީން ވާން ނުޖެހޭ ގޮތަށް ހަމަޖައްސައިފި

ބައެއް މުހިއްމު މަސައްކަތްތަކަށް މާލެ އިން ރަށްރަށް ދާ މީހުން ކަރަންޓީން ވާން ނުޖެހޭ ގޮތަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިންް މިއަދު ހަމަޖައްސައިފި އެވެ.

ކޮވިޑް-19 ފެތުރުން ކޮންޓްރޯލް ކުރަން މިދިޔަ އޭޕްރީލް 15 ން ފެށިގެން ގާތްގަނޑަކަށް ތިން މަސް ދުވަހަށް މާލެ ލޮކްޑައުން ކުރި ފަހުން، މާލެ އިން އެހެން ރަށްރަަށަށް ދަތުރުކުރުން ފުރަތަމަ އޮތީ މަނާކޮށްފަ އެވެ. އޭގެ ފަހުން ހުއްދަ ދިނީ 14 ދުވަހަށް ކަރަންޓީް ވާ ގޮތަށް ރަށްރަށް ދަތުރުކުރުމަށެވެ.

އެކަމަކު، އެޗްޕީއޭ އިން މިއަދު ނެރުނު އުސޫލުގައިވާ ގޮތުން މައިގަނޑު ހަ ދާއިރާއަކަށް ބަހާލައިގެން ކުރަން ޖެހޭ މަސައްކަތްތަކަށް، ކޮވިޑް ފެތުރިފައި އޮތް ރަށަކުން އެހެން ރަށަކަށް މީހަކަށް ދަތުރުކުރެވިދާނެ އެވެ. ނަމަވެސް އެގޮތަށް ދަތުރުކުރެވޭޭނީ ހުއްދަ ހޯދައިގެންނެވެ.

ހުއްދަ ދޭނެ ދާއިރާތައް:

- ކޭބަލް އަދި މީޑިއާ ނެޓްވޯކްގެ ހިދުމަތްތައް.

- ބޭންކްގެ ހިދުމަތްތައް.

- ކަރަންޓާއި ފެނުގެ ހިދުމަތް ފަދަ ޔުޓިލިޓީ ހިދުމަތްތައް.

- ސިއްހީ ހިދުމަތްދޭ ތަންތަނުގެ ކަންތައްތައް ބެލުމާއި ވަގުތީ ގޮތުން ދޭން ޖެހޭ ހިދުމަތްތައް.

- މެއިންޓަނެންސް މަސައްކަތްތައް.

- ސަރުކާރާއި އަމިއްލަ ފަރާތްތަކުން ރަށްރަށުގައި ހިންގާ ޕްރޮޖެކްޓްތައް.

މި ދާއިރާތައް ވަކިން ފާހަގަކުރުމަށް ފަހު ވެސް އުސޫލުގައި ބުނެފައި ވަނީ އާއްމު ހިދުމަތްތަކާ ބެހޭ އެ ނޫން މަަސައްކަތްތަައް ކުރަން ވެސް ހުއްދަ ލިބޭނެ ކަމަށެެވެ.

އެކިއެކި މަސައްކަތްތައް ކުރަން ރަށްރަށަށް ދިއުމަށް ހުއްދަ ދޭ ގޮތަށް ހެދި ނަމަވެސް އެގޮތުން ކުރާ ދަތުރުގައި އަމަލުކުރަން ޖެހޭ މިންގަނޑުތަކެއް ވެސް އެޗްޕީއޭގެ އުސޫލުގައި ކަނޑައަޅާފައިވެ އެވެ. އެގޮތުން މާލެ އިން ނުވަތަ ކޮވިޑް ފެތުރިފައިވާ އެހެން ރަށަކުން ބަލި އަދި ނުފެތުރި އޮތް ރަށަކަށް ދަތުުކުރާ މީހާ އުޅެން ޖެހޭނީ އޭނާ ކުރަން ދިޔަ މަސައްކަތަށް ހާއްސަ ވެފައިވާ ތަނުގަ އެވެ. ޒަރޫރީ ހާލަތެއްގައި ނޫނީ ރަށުގެ އެެހެން ތަންތަނަށް ދިއުން މަނާވާނެ އެެވެ.

މަސައްކަތެއް ކުރަން ރަށަކަށް ބަޔަކު ފޮނުވާ މުއައްސަސާ ނުވަތަ ކުންފުނިން ހަމަޖައްސަން ޖެހޭނެ އިންތިޒާމުތަކުގެ ތެރޭގައި ފޮނުވާ މީހުން ރަށުގެ އެހެން މީހުންނާ ވަކިން ދިރިއުޅެވޭނެ ގޮތް ހަމަޖެއްސުމާއި އެއީ ކޮވިޑް ޖެހިފައިވާ މީހެއްގެ ކޮންޓެކްޓެއް ނޫންކަަން ކަށަވަރުކުރުން ހިމެނެ އެވެ. އެ ރަށަކަށް ދާ މަސައްކަތެއް ނިމުމާ އެކު ރަށުން އަވަހަށް ފައިބަން ޖެހެ އެވެ.