އާ ކްލަސްޓާތައް ފެންނަން ފެށި ފަހުން، ބެއިޖިން އިން މިއަދު އާ ކޭހެއް ނުފެނޭ

ބެއިޖިން (ޖުލައި 7) - ޗައިނާގެ ވެރިރަށް ބެއިޖިން އިން ކޮރޯނާވައިރަހުގެ އާ ކްލަސްޓާތައް ފެންނަން ފެށި ފަހުން މިއަދަކީ އަލަށް އެއްވެސް ކޭހެއް ރިޕޯޓް ނުކުރާ ފުރަތަމަ ދުވަސް ކަމަށް އޮފިޝަލުން ވިދާޅުވެއްޖެ އެވެ.

ޖޫން މަހު މެދުތެރޭގައި އާ ކްލާސްޓާއް ބެއިޖިން އިން ފެންނަށް ފެށި ފަހުން ވަނީ 335 މީހުން ޕޮޒިޓިވްވެފަ އެވެ. ފުރަތަމަ ކްލަސްޓާ ފެނިފައި ވަނީ ބެއިޖިންގެ ހޯލްސޭލް ބާޒާރެއް ކަމަށްވާ ޒިންފާދީންނެވެ.

ބެއިޖިންގެ ހެލްތު ކޮމިޝަނުން ބުނެފައި ވަނީ އިއްޔެ ވެސް ފެނިފައި ވަނީ ބަލީގެ އަލާމާތްތައް ނެތް ޕޮޒިޓިވް އެންމެ ކޭހެއް ކަމަށެވެ. ޗައިނާ އިން ކޭސްތައް ގުނުމުގައި އަލާމާތްތައް ނުފެންނަ ކޭސްތައް ނުހިމަނަ އެވެ.

ޖޫން 11 ގެ ފަހުން ބެއިޖިން އިން ވަނީ 11 މިލިއަން މީހުން ޓެސްޓްކޮށްފަ އެވެ. އެއީ ގާތްގަނޑަކަށް ވެރިރަށުގެ އާބާދީގެ ދެބައިކުޅަ އެއްބައެވެ. ބެއިޖިންގެ އާބާދީ ޓެސްޓް ކުރަން ހުޅުވާލުމުން އެތައް ބަޔަކު ވަނީ ޓެސްޓިން ސެންޓަރުތަކަށް އަމިއްލަ އަށް ގޮސް ޓެސްޓްކޮށްފަ އެވެ.

ބެއިޖިން އިން ފެންނަ ކޭސްތައް މަދުވުމުން ވަނީ ލޮކްޑައުންކުރި ބައެއް ހިސާބުތަކަށް ވެސް މިހާރު ލުއިދޭން ފަށައިފަ އެވެ. ބެއިޖިންގެ ސެންޓަ ފޯ ޑިޒީޒް ކޮންޓްރޯލްގެ ޑިރެކްޓަރު ޕަންގް ޒިންހުއޯ ވިދާޅުވީ ހުރިހާ ކަމެއް ވެސް މިހާރު ހަމައަކަށް އެޅެމުން އަންނަ ކަމަށެވެ.

ބެއިޖިންގެ ކްލަސްޓާ ފެނުމުގެ ކުރިން ޗައިނާ އިން ވަނީ ކޮރޯނާވައިރަސް ކޮންޓްރޯލްކޮށްފަ އެވެ. މިދިޔަ އަހަރުގެ ޑިސެމްބަރު މަހު ފަހުކޮޅު ވޫހާން ސިޓީން ފެނުނު ވައިރަހަށް ޗައިނާގެ 83,565 މީހުން ޕޮޒިޓިވްވެ 4,634 މީހުން ވަނީ މަރުވެފަ އެވެ.