ޗައިނާ ޓޫރިސްޓުން 56 ޕަސެންޓް މަދުވި: އެމްއެމްއޭ

ކޮވިޑް-19 ފެތުރޭތީ އެޅި ފިޔަވަޅުތަކާ އެކު، މިއަހަރުގެ ފުރަތަމަ ތިން މަހު ޗައިނާ އިން ރާއްޖެ އައި ޓޫރިސްޓުންގެ އަދަދު 56 ޕަސެންޓް މަދުވި ކަމަށް މަރުކަޒީ ބޭންކް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.

ކޮވިޑް-19 އިން ރައްކާތެރިވާން އެޅި ފިޔަވަޅުތަކުގައި ރާއްޖޭ ބޯޑަރު ބަންދުކޮށް ޓޫރިޒަމް ވެސް ހުއްޓުމަކަށް އައިސްފައި ވަނިކޮށް، މި އަހަރުގެ ފުރަތަމަ ކުއާޓާއާ ގުޅޭ ގޮތުން އެމްއެމްއޭ އިން އާންމުކޮށްފައިވާ ތަފާސްހިސާބުތަކުން ދައްކާ ގޮތުން ރާއްޖޭގެ ޓޫރިޒަމް ދާއިރާ ވަނީ 21 ޕަސެންޓަށް ދަށަށް ގޮސްފަ އެވެ. މީގެ އިތުރުން މީހުން ރިސޯޓުތަކުގައި ހޭދަކުރާ ރޭ ގެ އަދަދު ވެސް ވަނީ 11 ޕަސެންޓް ދަށަށް ގޮސްފަ އެވެ.

އެންމެ ފުރަތަމަ އެންމެ ބޮޑަށް ކޮވިޑް-19 ފެތުރު ޗައިނާ އިން މިއަހަރުގެ މިހާތަނަށް އައިސްފައިވަނީ 33،000 ޓޫރިސްޓުންނެވެ. މިދިޔަ އަހަރު ނިމުނު އިރު ޗައިނާ އިން 284،000 އަށް ވުރެ ގިނަ ޓޫރިސްޓުން ޒިޔާރަތްކޮށްފައިވެ އެވެ. މިއަހަރުގެ ފުރަތަމަ ތިން މަހު ރާއްޖެ އަށް 382،000 ޓޫރިސްޓުން ޒިޔާރަތްކުރި އެވެ. ސަރުކާރުގެ އަމާޒަކީ މި މަހު 15 ގައި ބޯޑަރު ހުޅުވުމާ އެކު މިއަހަރު ނިމޭ އިރު ރާއްޖެ އަށް އަންނަ ޓޫރިސްޓުންގެ އަދަދު 900،000 އަށް އެރުވުމެވެ.

ފުރަތަމަ ކުއާޓާގައި ޔޫރަޕުން އައި ޓޫރިސްޓުންގެ އަދަދު 11 ޕަސެންޓަށް ދަށަށް ގޮސްފައިވެ އެވެ. އެގޮތުން ޖަރުމަނުން އައި ޓޫރިސްޓުން 24 ޕަސެންޓަށް ދަށަށް ދިޔަ އިރު އިޓަލީން 11 ޕަސެންޓް، އަދި އިނގިރޭސިވިލާތުން އައި ޓޫރިސްޓުން ނުވަ ޕަސެންޓަށް ދަށަށް ގޮސްފައިވެ އެވެ.

ފުރަތަމަ ކުއާޓާގައި ރާއްޖެ އަށް އައި ޓޫރިސްޓުން މަދުވި ނަމަވެސް މިއަހަރުގެ ޖެނުއަރީ އާއި ފެބްރުއަރީގައި އައި ޓޫރިސްޓުން މިދިޔަ އަހަރަށް ވުރެ ގިނަ އެވެ. ނަމަވެސް މާޗް މަހު އައި ޓޫރިސްޓުންގެ އަދަދު ވަނީ ވަރަށް ބޮޑަށް ދަށަށް ގޮސްފަ އެވެ. އެއްވެސް ގައުމަކުން ޓޫރިސްޓުން ނާދެވޭ ގޮތަށް ރާއްޖޭގެ ބޯޑަރު ބަންދުކުރީ މާޗް 27 ގަ އެވެ. އެންމެ ފުރަތަމަ ވެސް މަނާކުރީ ޗައިނާ އިން ރާއްޖެ އަށް މީހުން އައުމެވެ.

ދުނިޔޭގެ ޓޫރިޒަމް ޖަމިއްޔާ ޔޫއެންޑަބްލިއުޓީއޯ އިން ލަފާކޮށްފައިވާ ގޮތުގައި މިއަހަރުގެ ފުރަތަމަ ކުއާޓާގައި ޓޫރިސްޓުން ދަތުރުކުރާ މިންވަރު ވަނީ 22 ޕަސެންޓަށް ދަށަށް ގޮސްފަ އެވެ. މިކަމުގެ އެންމެ ބޮޑު ގެއްލުމަކާ ކުރިމަތިވެފައިވަނީ އޭޝިއާ އާއި ޕެސިފިކްގެ ގައުމުތަކަށެވެ. މި މުއްދަތުގައި އެ ސަރަހައްދުތަކުގެ ޓޫރިޒަމް ދާއިރާ 35 ޕަސެންޓަށް ދަށްވެފައިވާ ކަމަށް ޔޫއެންޑަބްލިއުޓީއޯ އިން ބުނެފައިވެ އެވެ.

ރާއްޖޭގެ އިގްތިސާދަށް ސީދާ ގޮތުން އެންމެ ބޮޑު އާމްދަނީއެއް ލިބޭ ޓޫރިޒަމް ދާއިރާއަށް ކޮވިޑް-19 ފެތުރޭތީ ބޮޑު ލޮޅުމެއް އަރާފައިވާ އިރު މިއަހަރުގެ ފުރަތަމަ ކުއާޓާގައި ރާއްޖޭގެ މައި އެއާޕޯޓަށް ޖެއްސި ފްލައިޓްތަކުގެ އަދަދު ވެސް ވަނީ ރެކޯޑް އަދަދަކަށް ދަށަށް ގޮސްފަ އެވެ. އެގޮތުން މިދިޔަ އަހަރަށް ވުރެ 15 ޕަސެންޓް ދަށަށް ގޮސްފައިވެ އެވެ.

ރާއްޖޭގައި 150 ރިސޯޓު އޮޕަރޭޓް ކުރަމުން އަންނަ އިރު 600 އަށް ވުރެ ގިނަ ގެސްޓްހައުސް އަންނަނީ ހިންގަމުނެވެ.