މަސްޖިދުއް ނަބަވީއާ އެކު ސައުދީގެ މިސްކިތްތައް ހުޅުވައިފި

މައްކާ (މެއި 31) - ކޮރޯނާވައިރަސް ފެތުރުން ހުއްޓުވަން އެޅި ރައްކާތެރިކަމުގެ ފިޔަވަޅެއްގެ ގޮތުން، ގާތްގަނޑަކަށް ދެ މަހާއި ބައިގެ މުއްދަތަކަށް ސައުދީގެ މިސްކިތްތައް ބަންދު ކުރުމަށް ފަހު މަދީނާގެ މަސްޖިދުއް ނަބަވީއާ އެކު މިސްކިތްތައް ރޭ ފަތިސް ނަމާދުން ފެށިގެން އާއްމުންނަށް ހުޅުވާލައިފި އެވެ.

ނަމަވެސް މައްކާގެ މާތްވެގެންވާ ހަރަމްފުޅު އަދިވެސް ވަނީ އާއްމުންނަށް ބަންދުކޮށްފަ އެވެ. މަސްޖިދުލް ހަރާމްގައި ޖަމާއަތުގައި ނަމާދު ކުރާނީ އިމާމުންނާއި ހަރަމްފުޅުގެ މުވައްޒަފުން އެކަންޏެވެ.

މަދީނާގައި ހުންނަ ކީރިތި ރަސޫލާގެ މިސްކިތްކޮޅު ހުޅުވި ނަމަވެސް މިސްކިތުގެ 40 ޕަސެންޓް ފުރުމާ އެކު ބަންދުކުރާނެ އެވެ. މިސްކިތުގެ ދޫލަތައް ވަނީ ނަގައިފަ އެވެ.

ސައުދީ އަރަބިއާ އިން މިހާތަނަށް ވަނީ 83,384 މީހުން ކޮރޯނާވައިރަހަށް ޕޮޒިޓިވްވެ 480 މީހުން މަރުވެފަ އެވެ.

ސައުދީގެ މިސްކިތްތައް ހުޅުވި ނަމަވެސް އަޅާފައިވާ ފިޔަވަޅުތައް

- އުމްރާގެ އަޅުކަން އަދިވެސް ވަނީ މެދުކަނޑާލާފައި

- މަސްޖިދުލް ހަރާމް އާއްމުންނަށް ހުޅުވާލައިފައެއް ނުވޭ

- މިސްކިތަށް ދާ ކޮންމެ މީހަކު މާސްކް އެޅުން މަޖްބޫރު

- އަމިއްލަ މުސައްލާ ގެންދަން ޖެހޭ

- ކުޑަ ކުދިން މިސްކިތަށް ދިއުން މަނާ

- ދެ ސަފު ދެމެދުގަ އާއި ނަމާދަށް ތިބޭ މީހުންގެ މެދުގައި ހުސްތައް ބޭއްވުން

- ޒަމްޒަމް ފެން ފޯރުކޮށް ދިނުން ހުއްޓާލުން

- ނަބަވީގެ ރައުޟާ އާއި ރިޔާޟުލް ޖައްނާ އަށް ޒިޔާރަތް ކުރުން މެދުކަނޑާލުން

ދެ މަހަށް ވުރެ ގިނަ ދުވަހަށް ފަހު ގުދުސްގެ މަސްޖިދުލް އަގްސާ ވެސް މިއަދު ވަނީ އާއްމުންނަށް ނަމާދު ކުރަން ހުޅުވާލައިފަ އެވެ. ނަމަވެސް ރައްކާތެރިކަމުގެ ފިޔަވަޅުތަކާ އެކު އެވެ.