އެންމެ ގޯސް ހާލަތުގައި ރާއްޖޭގެ އުފެއްދުންތެރިކަން މައިނަސް 29 ޕަސެންޓަށް ދަށްވާނެ: ފިނޭންސް

ކޮވިޑް-19ގެ ސަބަބުން ރާއްޖޭގެ އިގްތިސާދު އެންމެ ގޯސްވާ ހާލަތުގައި އުފެއްދުންތެރިކަން މައިނަސް 29 ޕަސެންޓަށް ވެއްޓި 34 ބިލިއަން ރުފިޔާ އުނިވާނެ ކަމަށް ސަރުކާރުން ލަފާކޮށްފި އެވެ.

ރާއްޖޭގެ ހާލަތު އޮތް ގޮތަށް ބަލައި ފިނޭންސް މިނިސްޓްރީން ވަނީ ފަސް ސިނާރިއޯއެއް އެކުލަވާލައިފަ އެވެ. މި ސިނާރިއޯތަކަށް ބަލާއިރު ރާއްޖޭގެ އުފެއްދުންތެރިކަން މި އަހަރު ހުންނާނެ ކަމަށް ފިނޭންސުން އެންމެ ފުރަތަމަ ލަފާ ކުރީ 7.5 ޕަސެންޓުގަ އެވެ. އެއީ 98.4 ބިލިއަން ރުފިޔާ އެވެ. ނަމަވެސް އިގްތިސާދަށް މިހާރު އަންނަ ބަދަލުތަކުގެ ސަބަބުން މި އަދަދު 64.5 ބިލިއަން ރުފިޔާ އަށް ވެއްޓޭނެ ކަމަށް އެ މިނިސްޓްރީން ލަފާކުރެ އެވެ.

އިގްތިސާދަށް އެންމެ ބޮޑު އަސަރެއް ކުރާނީ ރާއްޖެ އަށް އަންނަ ޓޫރިސްޓުންގެ ނިސްބަތް 78 ޕަސެންޓު ދަށްވުމުންނެވެ. އެއީ އެނދުގެ ގޮތުން ބަލާ ނަމަ 74 ޕަސެންޓެވެ.

ކޮވިޑް-19އާ ގުޅިގެން، މުޅި ޓޫރިޒަމް އިންޑަސްޓްރީ ހުއްޓިފައި އޮތް އިރު، މި ދާއިރާގައި މަސައްކަތް ކުރާ ގިނަ ބައެއްގެ މުސާރަ ކުޑަކޮށް، ވަޒީފާ އިން ވަކިކުރުމުގެ ޝަކުވާ ވަނީ އިތުރުވެފަ އެވެ. އެހެން ކަމަށް ވާ ނަމަ އެ ދާއިރާ އިން ރާއްޖޭގެ އުފެއްދުންތެރިކަމަށް ހިއްސާކުރާ މިންވަރު ކުރިމަގުގައި ވަރަށް ބޮޑުތަނުން ދަށްވާނެ އެވެ.

ރާއްޖޭގެ އެންމެ ފަހުގެ ބޯހިމެނުމުގެ ހިސާބުތައް ދައްކާގޮތުގައި ވަޒީފާގެ ބާޒާރުގެ 13.9 ޕަސެންޓު ހިއްސާ ކުރަނީ ޓޫރިޒަމް އިންޑަަސްޓްރީގަ އެވެ. ވަޒީފާ އަދާނުކުރާ ރޭޓު ދެނެގަންނާނެ ތަފާސްހިސާބުތައް ގަވައިދުން ބެލެހެއްޓުމުގެ އިންތިޒާމެއް އަދި ހަމަޖެހިފައި ނުވާތީ، ސީދާ އަންނާނެ ބަދަލު އަންދާޒާ ނުކުރެވުނު ނަމަވެސް، ވަޒީފާ އިން ވަކިކުރާ މީހުން އިންތިހާ އަށް ގިނަވާނެ ކަމަށް ފިނޭންސް މިނިސްޓްރީން ލަފާކުރެ އެވެ.

އެންމެ ގޯސް ހާލަތުގައި އިތުރު ދާއިރާތަކުން ވެސް އުފެއްދުންތެރިކަން ދަށްވާނެ ކަމަށް އެ މިނިސްޓްރީ ލަފާކުރެ އެވެ. މީގެ ތެރޭގައި އިމާރާތް ކުރުމުގެ ދާއިރާ އާއި ވިޔަފާރީގެ ދާއިރާ އާއި ދަތުރުފަތުރާއި މުވާސަލާތުގެ ދާއިރާ ހިމެނެ އެވެ.

މީގެ އިތުރުން، ކޮވިޑް-19ގެ ސަބަބުން ދިމާވެދާނެ އެންމެ ގޯސް ހާލަތުގައި ދައުލަތުގެ އާމްދަނީ އާއި ހިލޭ އެހީ ވެސް ދަށް ވާނެ ކަމަށް ފިނޭންސުން ބުނެ އެވެ. އެގޮތުން މި އަހަރުގެ ބަޖެޓުގައި 29.9 ބިލިއަން ރުފިޔާގެ އާމްދަނިއެއް ލިބޭނެ ކަމަށް ލަފާ ކޮށްފައިވާއިރު، އެންމެ ގޯސް ހާލަތުގައި މި އަދަދު 11.6 ބިލިއަން ރުފިޔާ އަށް ވެއްޓެނޭ ކަމަށް ވަނީ ލަފާ ކޮށްފަ އެވެ.

ސައުތު އޭޝިއާގައި ވެސް އެންމެ ބޮޑު އަސަރެއް ކުރާނީ ރާއްޖެ އަށް ކަމަށް ވޯލްޑު ބޭންކުން ވެސް ވަނީ ބުނެފަ އެވެ. އަދި މިހާލަތުން އަރައިގަންނަން ވަގުތުުން ވަގުތަށް ފިޔަވަޅު ނާޅައިފި ނަމަ އިގްތިސާދު ދަށްުވުމުގެ ހާލަތު އިޔާދަ ނުކުރެވޭ ވަރަށް ވެއްޓުމަކީ އެކަށީގެންވާ ކަމެއް ކަމަށް ވެސް ވޯލްޑު ބޭންކުން ވަނީ ބުނެފަ އެވެ.