އައިފޯނު 7 ލިބުނުތަ؟ މުޅި ރާއްޖޭން ވިކި ހުސްވެއްޖެ

އެޕަލް ކުންފުނިން އަލަށް ނެރުނު އައިފޯނު 7 ރާއްޖޭގައި ވިއްކަން ފެށިތާ ހައެއްކަ ގަޑިއިރުގެ ތެރޭގައި ވިކި ހުސްވެއްޖެ އެވެ.

ރާއްޖޭގައި އެންމެ ފުރަތަމަ އައިފޯނު 7 އަދި 7 ޕްލަސް ނެރުނީ އުރީދޫންނެވެ. އުރީދޫން މިއަދު ހެނދުނު 9:00 ގައި އައިފޯނު ނެރުނު އިރު، ގަލޮޅު ބިއްލޫރިގެ ކުރިމަތިން ހުންނަ އެ ކުންފުނީގެ އެކްސްޕީރިއަންސް ސެންޓަރު ކުރިމަތީގައި ވަރަށް ބޮޑު ކިއޫއެއް ހަދާފައި އޮތެވެ. ބައެއް މީހުން ފަތިހު 3:00 އިން ފެށިގެން ކިއޫ އަށް އަރައި ތިއްބެވެ.

އެ ކުންފުނީގެ އެސިސްޓަންޓް މެނޭޖަރު ޕަބްލިކް ރިލޭޝަންސް ނޫރާ އިބްރާހިމް ޒާހިރު މިރޭ ވިދާޅުވީ މާލޭގެ އިތުރުން އުރީދޫގެ ފިހާރަ ހުރި ކޮންމެ ރަށަކަށް ކޮންމެވެސް ވަރަކަށް ފޯނު ފޮނުވި ކަމަށެވެ. އެ ހުރިހާ ފޯނެއް މިއަދު ހަވީރާ ހަމައަށް ވިކި ހުސްވެފައިވާ ކަމަށް އޭނާ ވިދާޅުވި އެވެ.

"ވަރަށް އަވަހަށް އާ ސްޓޮކެއް ލިބޭނެ،" ނޫރާ ވިދާޅުވި އެވެ.

އުރީދޫން ވިއްކި ފޯނުގެ އަދަދެއް އޭނާ ވިދާޅެއް ނުވެ އެވެ. އެކަމަކު، އޭނާ ފާހަގަކުރެއްވި ގޮތުގައި މިދިޔަ އަހަރު އައިފޯނު 6 އެސް ނެރުނުއިރު ވިއްކި ފޯނުގެ އަދަދަށް ވުރެ މި އަހަރު ވިއްކި އަދަދު ވަރަށް ބޮޑު ތަން އިތުރެވެ.

އުރީދޫން ޕްރީ އޯޑަރު ނުނަގާ އައިފޯނު ވިއްކިޔަސް، ވާދަވެރި ދިރާގުން މިދިޔަ ހަފުތާގައި އައިފޯނަށް އޯޑަރު ނެގި އެވެ. އެކަމަކު، ފޯނަށް އޮތް ޑިމާންޑް ބޮޑުވެ، 24 ގަޑިއިރު ވެސް ނުވަނީސް އޯޑަރު ނެގުން ހުއްޓާލި އެވެ.

ދިރާގުގެ ޕަބްލިކް ރިލޭޝަންސް މެނޭޖަރު އިމްޖާދު ޖަލީލް މިރޭ ވިދާޅުވި ގޮތުގައި އައިފޯނު 7 އަދި 7 ޕްލަސް އަށް ރަޖިސްޓްރީކޮށް، ފައިސާ ދައްކާފައިވާ ފަރާތްތަކާ ފޯނު ހަވާލުކުރުމުގެ މަސައްކަތް މިއަދު ހެނދުނުން ފެށިގެން އަންނަނީ ކުރަމުންނެވެ. ދިރާގަށް ވެސް ލިބުނީ ވަކި އަދަދެއްގެ ފޯނު ކަމަށް ވާތީ، ރަޖިސްޓްރީކުރި މީހުންނަށް ފޯނު ދޫކުރެވޭނީ މަޑުމަޑުންކަން އޭނާ ފާހަގަކުރެއްވި އެވެ.

"އަޅުގަނޑުމެން ބެލީ ޒަމާނީ ގޮތްތައް ބޭނުންކޮށްގެން، ކޮންމެ ބޭފުޅަކަށް ވެސް ގޭގައި އިންނަވައިގެން ފަސޭހަކަމާ އެކު ފޯނު ހޯދޭނެ ފަދަ ގޮތަކަށް ކަންކަން ހަމަޖެއްސުމަށް،" އިމްޖާދު ވިދާޅުވި އެވެ.

މުވާސަލާތީ ހިދުމަތް ދޭ ރާއްޖޭގެ އެންމެ ބޮޑު ކުންފުނި ކަމަށް ވާ ދިރާގަކީ، އިމްޖާދު ވިދާޅުވި ގޮތުގައި، އެންމެ ގިނަ އަދަދެއްގެ އައިފޯން 7 ރާއްޖޭގައި ވިއްކި ފަރާތެވެ. މާލޭގެ އިތުރުން، ރަށްރަށުގައި ތިބި ފަރާތްތަކަށް ވެސް ފޯނު ފޯރުކޮށްދޭން މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.

"މިހާ ބޮޑު ޑިމާންޑެއް އޮތީމަ އިތުުރު ސްޓޮކެއް ގެނެވޭތޯ މި ބަލަނީ،" އިމްޖާދު ވިދާޅުވި އެވެ.

ރާއްޖެ އަށް އައިފޯން ސަޕްލައިކުރާ އެޕަލްގެ ރީޖަނަލް ޑިސްޓްރިބިއުޓަރު އަދި ސްޓޮކިސްޓް ސޮފްޓްޓަޗް އިން ކުރިން ބުނެފައިވާ ގޮތުގައި ރާއްޖޭގައި ވިއްކަން ގެނައި އައިފޯން 7 އަދި 7 ޕްލަސްގެ ސްޓޮކް ކުރިއަށް ވުރެ 120 ޕަސެންޓް ވަނީ އިތުރުކޮށްފަ އެވެ.

އެ ކުންފުނީގެ ސީއޯއޯ މުހައްމަދު ރިފާއު މިރޭ ވިދާޅުވި ގޮތުގައި އެ ކުންފުނިން ވަނީ ދިރާގާއި އުރީދޫގެ އިތުރުން އެޕަލްގެ އުފެއްދުންތައް ރާއްޖޭގައި ވިއްކުމުގެ ހުއްދަ އޮންނަ އެޑްއޮން، އެލް މޮބައިލް އަދި އެސްޓާސް އަށް ވެސް ފޯނު ފޯރުކޮށްދީފަ އެވެ. އެ ހުރިހާ ތަނަކަށް ދިން ފޯނު ވެސް މިހާރު ވިކި ހުސްވެފައިވާކަން އޭނާ ފާހަގަކުރެއްވި އެވެ.

"ރާއްޖޭގައި އެންމެ މަގުބޫލު ފޯނަކީ އައިފޯނުކަން ވަރަށް ރަނގަޅަށް އެނގިގެން ހިނގައްޖެ،" ރިފާއު ވިދާޅުވި އެވެ.

އައިފޯނު 7 ގެ އާ ސްޓޮކެއް ރާއްޖެ ގެންނަން ސޮފްޓްޓަޗުން މިހާރު އަންނަނީ އެޕަލްއާ ވާހަކަ ދައްކަމުންނެވެ.

އައިފޯން 7 އާއި 7 ޕްލަސްގައި އެޕަލް އިން ވަނީ ގިނަ އާ ކަންތައްތަކެއް ހިމަނައިފަ އެވެ. އޭގެ ތެރޭގައި ޕްލަސްގައި ހަރުކޮށްފައިވާ ދެ ލެންސް ހިމެނޭ ކެމެރާ އާއި ދެ ސްޕީކަރު ހިމެނޭ ސްޓީރިއޯ ސައުންޑް ސިސްޓަމާއި ވަޔަލެސްކޮށް ހެޑްފޯނު ގުޅުމާއި ފެން ނުވަނުން ހިމެނެ އެވެ. އަދި ކުރިއަށް ވުރެ ބޮޑު ބެޓެރިއެއް އަޅުވައި ސްކްރީން ވެސް މިހާރު ބާޒާރުގައި ހުރި އައިފޯނަށް ވުރެ 25 ޕަސެންޓް އަލިގަދަ ކޮށްފަ އެވެ.

ދުނިޔޭގެ ވަރަށް ގިނަ ގައުމުތަކުގައި އައިފޯން 7 ވިއްކަން ފަށާފައި ވާއިރު، ރާއްޖެއެކޭ އެއްގޮތަށް އެ ތަންތަނުގައި ވެސް މާ ގިނައިރެއް ނުވެ ފޯނު ވަނީ ވިކި ހުސްވެފަ އެވެ. ހާއްސަކޮށް، މި ފަހަރު އަލަށް ނެރުނު ޖެޓް ބްލެކް ފޯނުތައް އެއްވެސް ގޮތަކަށް ނުލިބެ އެވެ. ރާއްޖޭގައި ވެސް މިއަދު އައިފޯނު ނެރުނުއިރު އެ ވައްތަރުގެ ފޯނު ވިއްކާފައެއް ނުވެ އެވެ.