ޑައިވަރު ޒޫނާ އަށް ބައިނަލްއަގުވާމީ އެވޯޑެއް

ޕުރޮފެޝަނަލް އެސޯސިއޭޝަން އޮފް ޑައިވިން އިންސްޓެކްޓާ (ޕަޑީ) ކޯސް ޑައިރެކްޓަރުކަން ލިބުނު ފުރަތަމަ ދިވެހި އަންހެން ޑައިވަރު، ޒޫނާ ނަސީމަށް ބައިނަލްއަގުވާމީ އެވޯޑެއް ލިބިއްޖެ އެވެ.

އިނގިރޭސިވިލާތުގެ ބޯޓް އިންޓަނޭޝަނަލް މެގަޒި އާއި ބްލޫ މެރީން ފައުންޑޭޝަނުން ދެމުން އަންނަ އޯޝަން އެވޯޑް މިއަހަރު އަށް ފަރާތަކަށް ލިބުނުއިރު ޒޫނާ ހިމެނެނީ "ލޯކަލް ހީރޯ" ކެޓަގަރީގަ އެވެ. އޭނާ އަށް އެ އެވޯޑް ދީފައިވަނީ ކަނޑުގެ ތިމާވެށި ހިމާޔަތް ކުރަން މަސައްކަތް ކޮށްފައިވާތީ އެކަން އަގު ވަޒަން ކުރުމުގެ ގޮތުންނެވެ.

މިއީ އޯޝަން އެވޯޑް ދިން ހަތަރު ވަނަ ފަހަރެވެ. އަދި ދިވެއްސަކު އެ އެވޯޑް ހާސިލް ކުރި ފުރަތަމަ ފަހަރެވެ.

ކުޅަދާނަ ޑައިވަރު ޒޫނާ ބުނީ މިއީ އޭނާގެ ހަޔާތުގައި އެންމެ އުފާވި ދުވަސް ކަމަށެވެ. އެ އެވޯޑާއެކު އޭނާ އަށް އިތުރު ހިތްވަރެއް ލިބިގެން ދިޔަ ކަމަށާއި އެކަން ހާސިލް ކުރެވުނީ އެތައް ބައެއްގެ އެއްބާރުލުމާއި އެހީތެރި ކަމާއެކު ކަމަށް ޒޫނާ ބުންޏެވެ.

ޑައިވް ކުރާތާ 21 އަށް ވުރެ ގިނަ އަހަރުވެފައިވާ ޒޫނާ އަކީ ރާއްޖޭގެ އެންމެ ތަޖުރިބާކާރު އަންހެން ޑައިވް އިންސްޓްރަކްޓަރެވެ. އެތައް ހާސް ޑައިވެއް ކޮށް އެތައް ބަޔަކަށް ޑައިވް ކުރަން ދަސްކޮށްދީފައިވެ އެވެ. އުމުރުން ކިރިޔާ 18 އަހަރު ފުރުނު ތަނާ ޕަޑީގެ ޑައިވް މާސްޓާ ސެޓްފިކެޓް ހާސިލްކޮށް، ފީނައިގަތް ގޮތަށް ޒޫނާ ހަމަނޭވާ ލީ ރާއްޖޭގެ މުހިއްމު ޑައިވް ސްޕޮޓްތައް ދަސްކޮށްފަ އެވެ.