ޅަދަރީންގައި ދީނުގެ ރަނގަޅު މައުލޫމާތު ހަރުލައްވަން ރައީސް ގޮވާލައްވައިފި

ޅަދަރީންގެ ހިތްތަކުގައި އިސްލާމްދީނުގެ ރަނގަޅު މައުލޫމާތު ހަރުލައްވައިދިނުމަށް ރާއްޖޭގެ ދީނީ އިލްމުވެރިންނާއި، ތަރުބަވީ މުއައްސަސާތަކާއި މުދައްރިސުންނަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް އިލްތިމާސް ކުރައްވައިފިއެވެ.

މާދަމާ ފާހަގަކުރާ ރާއްޖެ އިސްލާމްވީ ދުވަހާ ގުޅިގެން ނެރުއްވި ތަހުނިޔާގެ ހިތާބެއްގައި ރައީސް ވިދާޅުވީ އިސްލާމްދީނުގެ ސާފު އަގީދާއިން އިން ބޭރުވެގެންދަނީ ރަނގަޅު މައުލޫމާތު ނޭނގޭތީ ކަމަށެވެ. އަދި ދީނީގޮތުން ހައްދުފަހަނައަޅައި، ލާއިންސާނީ ހަރުކަށި އަމަލުތަކަށް އަރައިގަންނަނީ ވެސް ދީނުގެ ލުއިފަސޭހަކަމާއި ރަހުމާއި އޯގާތެރިކަމާއި ހަމްދަރުދީގެ މަތިވެރި އުސޫލުތަކާއި ހަމަތައް ނޭނގޭތީ ކަމަށެވެ.

ހިތާބުގައި ރައީސް ވިދާޅުވީ ރާއްޖޭގައި އޮތް އެކުވެރިކަމާއި އެއްބައިވަންތަކަމުގެ އަސާސަކީ ވެސް އިސްލާމީ އަގީދާ ކަމަށެވެ. ރާއްޖެއަށް ބޭރުން ކުރިމަތިވާ އެކި އެކި ލާދީނީ އޮއިވަރުތަކުން ދިފާއުކޮށްދޭ އައްޑަނައަކީ ވެސް ދިވެހިންގެ އަގީދާގެ ސާބިތުކަމާއި ހަރުދަނާ ކަން ކަމަށް ވެސް އެމަނިކުފާނު ވިދާޅުވި އެވެ.

ރައީސް ވިދާޅުވީ ރަނގަޅު ނޫން މައުލޫމާތުގެ ސަބަބުން އެތައް ދިވެހިންނަކަށް މަގު އޮޅި ލޯބިވާ އާއިލާތަކާ ވަކިވެ ދުނިޔެ ދޫކުރަމުން ދާ ކަމީ ދިވެހިން ހިތާމަކުރާ ކަމެއް ކަމަށެވެ. ދީނުގެ ހަރުކަށި ފިކުރުތަކުގެ ސަބަބުން ވެސް އެތައް ޒުވާނުންނެއް މަގުއޮޅެމުންދާކަން މިއަދު ހަނދާނުގައި ބަހައްޓަންޖެހޭކަމަށް ވެސް ވިދާޅުވި އެވެ.

ރައީސް ފާހަގަކުރައްވާފައި އެވަނީ ބޭރު ގައުމުތަކުގައި ހިނގަމުންދާ އެކި އެކި ހަނގުރާމަތަކުގައި ބައިވެރިވަމުންދާ މީހުންގެ ވާހަކަ ކަމަށް ބެލެވެ އެވެ. ސޫރިޔާ އާއި އިރާގުގައި ހިނގަމުންދާ ހަނގުރާމައިގައި ބައެއް ޒުވާނުން ބައިވެރިވެ، ބައެއް މީހުން ވަނީ މަރުވެފަ އެވެ.